[有沙入眼]是咁的,我嘅職業係幫想自殺嘅人寫遺書: 159.肥仔
「好衰呀!次次都係咁!講比我知少忽肉咩!」
「唔會,但係我唔中意講你知。」miki即刻嗚嗚嗚咁打我搏頭
「係咪因為女呀?係咪姐?」
我無應,打電話比我嘅新客人
把聲聽落仲好細個,似小朋友
到個客搵倒我嘅時候,我就知,真係小朋友
目測可能係五六年級嘅肥仔,呢啲身形去日本做相撲手一定紅
產平頭裝,啲眼耳口鼻好似比人踩過一腳咁
我知喇,佢似懷仔
小學體育服包住嘅肥肉呼之欲出咁,佢一路行過黎啲肉就一路搖
佢向我點頭,又向miki點頭:「哥哥姐姐你地好。」
肥到成個不倒翁咁嘅細路
miki行過去,抹走肥仔圓面上殘留嘅白粉
「唔該姐姐。」
佢叫希仔,今年讀小五,十二歲,留左一次班
外號係肥撚、死肥仔、大肥西、六師弟、米芝蓮⋯⋯日日新鮮出爐花名一個,所以更多不能盡錄
今日放學佢先比同學用粉刷掟完,雖然洗左面,但係有少少未洗乾淨