[有沙入眼]是咁的，我嘅職業係幫想自殺嘅人寫遺書: 145.你仲唔冚家剷！

「你一早知道佢要自殺，亦知道佢會捐個心比人。」

「係呀，佢同我講好快就唔會再跟我啲投資計劃，問完就知佢要自殺。阿叔唔問住，繼續聽，你講丫。」

「你係咪知佢要去邊度自殺？」

「知丫，佢講過。」

「豪仔同我講過佢有將個心指定捐比邊個人。仲有，我見過豪仔張器官捐贈卡，但係唔見左。」





阿伯「唔～唔～」咁點頭

「最後個心去左你度。你搵人偷左張卡。」我拎翻之前趕去旺角搵嗰張捐贈卡出黎，雖然斷開兩半，但係我同miki總算喺間時鐘酒店嘅垃圾房搵倒

「係你叫老闆娘偷走張卡。」

聽完，阿伯哈哈哈哈咁笑：「係呀，叫人搵酒店老闆娘，開個價就搞得掂。唔止喎！我仲出錢比人改左電腦個資料庫。將個心捐比自己！」

即係話，老闆娘發現屍體之後，就拎走左豪仔張捐贈卡





因為醫生見唔倒張捐贈卡，所以入電腦嘅data base睇豪仔有無登記過器官捐贈

而資料庫一早已經比人改過

豪仔個心，就順理成章咁比阿伯搶左

miki即刻大叫：「認喇咩！今次你仲唔冚家剷！」