《十年又過去，我對你仍耿耿於懷》: 6

灣仔Pizza Bar，是我讀書最常去的酒吧，這個習慣一直未改，直到現在，我每次心情不佳想找人傾訴就會到這跟我的兄弟Fanco 聊天。 

我讓他看完我和安琪的對話，他只是默默地盯著我。 

當然，他知道我和安琪發生過的事，如何開始，如何結束，我如何傷害她，如何又被她傷害⋯⋯他知道我人生差不多每一件事。 

所以，我會把更多事情告訴他。 

他就像一個樹洞，我說了，他聽了⋯⋯從來不會記下我的聲音讓另一個人聽。 





「我係咪講錯嘢呀？」我問他。 
「其實，我都唔知你想同佢講乜。」他就是這麼直接。 
「我都唔知，但係我見到佢個status，我就忍唔住好想留言。」 
「好喇，個問題係，你想點吖？」 
「咩⋯⋯咩想點呀？」 
「咪係囉⋯⋯」 

他點起了一枝煙，男人老狗抽雲尼拿味捲煙，可謂做作的極致。 

「我唔明你個問題問乜呀⋯⋯」

他又看了看我一眼，他用怪異的眼神盯著我，就像用眼神已經把「朽木不可雕」數個字完美印在我臉上一樣。 
然而，有很多事，我就是這麼遲鈍。 

「OK，我簡單少少問你。你係咪想溝佢？你係咪鍾意佢？你係真係想關心佢定係想溝佢而開話題？如果你唔係想溝佢，你點解要問佢有無掛住你⋯⋯」 

「我只係想知，我係佢心目中個位置有幾高啫。」 

「高唔高關你叉事咩？」說完，他一口煙吐在我臉上。 





仿佛狠狠地給我來了一個耳光。 

「我連呢樣野都唔問得？」我有點委屈地說。 

「蔡梓豪，你收皮啦⋯⋯」他不慌不忙說。「你同佢經歷過啲乜嘢，你唔係唔知下話？你仲好意思問你係佢心目中嘅位置？你唔係唔記得，你同佢發生過咩事㗎？你問呢條問題都白撚痴嘅！」 

我和她發生過的事⋯⋯ 
要由十年前開始說起， 
那一年，我們都是中四學生。 

《羅生門 第一節 完》