短篇散文集: 《我對你，這一生，那個可比》

今日心血來潮，打開舊手機，睇返以前嘅sms，望返08年嘅自己，真係又幼稚，又無聊（我唔排除今日嘅自己依然冇變甚至進化到一個更高嘅層次）。一路睇住啲信息，9唔搭8嘅9up又有，同朋友嗌交嘅又有，睇睇下，睇到當日同阿靜啱啱分手嗰段時間，無論係邊個安慰我，梗係會搭句時間會沖淡一切，攪到呢句嘢就好似條蔥咁，買條菜搭條蔥咩。

其實每逢我哋發生啲唔如意嘅事個陣，身邊嘅人一定會講句等時間沖淡佢啦。雖然我唔否定呢句嘢，之但係，屌你咩，針唔吉到你肉，你唔知痛。就算發生同一件事，係唔同性格嘅人身上都已經唔同效果啦。好，我唔拗呢啲咁主觀嘅嘢，講嘅客觀嘅嘢。

時間。幾耐呀？一日？一個月？一年？定係五年、十年甚至到死之前嘅一刻呀？其實真係因人而異咋喎，氹人說話入面，如果要選十大廢話之首應該都非呢句莫屬啦掛！

有位朋友當時話，分手咋麻 好快冇事架啦，你兩個月後分分鐘唔記得咗佢啦，到時你仲記得佢先講嘢啦。到兩個月個陣，佢又話，你半年後仲記得佢先算啦。又到半年後，佢話，一年先同我講啦。終於兩年都過咗，佢幾乎嘔血咁同我講：「對唔住，係我錯，我唔應該低估你對佢嘅感情嘅……」當然，我冇怪佢，佢對人念舊情深嘅信任度咁低，可能都只係由社會所做成，可能睇得多啲mk換女快過換手機，又或者佢自己俾人換得快過自己換手機咁啫。我回咗佢一句：「你賭個唔識死心嘅人會死心，咁係你唔識死，you know？」

水能載舟，亦能覆舟。時間可以沖淡一切，但時間亦都可以證明一切。我一直堅守呢個信念，一直以為用時間可以打動到鍾意嘅人，但原來到最後，即使感動全世界，都感動唔到你……





呢個時候梗會有啲仆街走出嚟話：「可能你唔夠努力啫。」

屌你咩，我仲差啲咩呀？到之後我聽完阿強嘅經歷我終於明。

阿強佢由中一開始一直都好努力咁去愛阿Mary，即係個啲24小時I am ready啊，近乎送錢咁，Mary要乜買乜呀之類。但阿Mary一直都冇受，點知半年前阿強同我講，佢同Mary年尾結婚。我聽完之後，個樣仲呆過馬明拎唔到視帝。

「你好似年頭先同我講阿Mary又唔個同咗邊個飛機師定禮儀師一齊咋喎！定係你有戀Mary情意結，揀個又係叫Mary嘅貪佢夠親切感呀？嗱，唔係你要死唔俾你死，但出嚟過過目先啦，豬嘅你要，索嘅我難為少少幫你啃咗佢啦，做兄弟做到咁都算唔話得啦掛！」其實我覺得我呢番言論已經好仁慈，都未問佢個Mary係咪做援交俾佢包起咗。

「仆街啦你，係我鍾意咗咁多年嗰個嚟架。」





「屌，佢係咪有咩痛腳係你手呀，定係佢吞咗你幾億要負責任呀？佢肯嫁你？共產黨都收皮喎。」

「佢話喎，玩咗咁多年，都想有個愛佢又肯照顧佢嘅男人肯同佢走埋下半世喎，阿恆，我努力咗咁多年，我終於得咗啦！」最後幾隻字仲要肉緊化兼高8度咁表示出嚟，真係少啲訓練都俾佢嘅發姣姣死。

嘩，我屌，呢番說話嘅原意大概係想講「哎呀，俾男人玩咗咁多年，都變得又黑又闊又鬆又殘啦，係時時候搵返條水魚啃咗佢啦，啊，阿強唔錯喎，有車有樓，假假地都係間廣告公司老闆，唉，勉強啲受咗佢啦。」但係Mary竟然可以包裝到係阿強嘅努力打動咗佢，真係仆街到呢！當然，見阿強咁興奮，我都冇理由推佢落谷底嘅，但而家佢明俾人當係飯票喎，仲好似執到金咁，真係可悲……

但呢個故事話咗俾我知一樣嘢，其實你乜都冇差，差嘅係你一直鍾意嗰個未到想定落嚟嘅年齡，而最重要嘅一點係，你照下塊鏡就知你係冇享受愛情嘅資格。唔明？你睇下個樣似唔似張飯票咁？夠鐘會搵你開餐架啦，而家呢就未夠鐘放飯，你食住自己先啦。

不過，明白同實行係兩回事，我就同阿強一樣，當局者迷，依然相信時間可以證明一切……





即使感動到全世界，都感動唔到你……我仍然會繼續用時間去證明，我對你，這一生，那個可比……