短篇散文集: 《小學生書展遊記》

其實咁多年黎我都冇去過書展，主要原因真係唔知有咩書好買加上唔鍾意同人迫。 

不過今年咁多位高登作家出書，而且故事文筆同樣吸引，我呢個無聊人當然要保持我一貫嘅無聊作風，入去買返本黎支持下啦。 

但入場嘅最主要嘅原因當然就係一睹咁多作家嘅風采。難得星期日呢個熱門時間，幾位作者都可以係簽名會上佔一席位，都可算係錦上添花。 

而係書展入面，我認為最有觀賞價值嘅並唔係個啲乜模物模，而係幾個出新書嘅作家同埋墨出版嘅靚仔老闆。 

咳嗯…唔好誤會，我並唔係單指佢地嘅外貌，而係望住呢班新進作家同其他前輩之別。望住呢班第一次出書嘅作家同埋第一次參展嘅出版社，佢地都有個共通點，就係面上都掛住一張發自內心嘅微笑。或者真係我本人無聊得滯，有好多時間去觀察其他作家嘅行為。即使同樣掛住嘅微笑，有部分都明顯見到係皮笑肉不笑，有點機械式的笑容。 由唔知幾時開始，人愈黎愈難打從心底笑出黎 。細個會因為食到餐麥當奴，或者有得落街玩而興奮足一日，但人愈大就變得愈難滿足。 





「食m記咯」「唔好啦，又食劣食」 

慢慢由m記，茶記，明將，元綠，版前……要求愈黎愈高。 

公園慢慢變成貪食蛇，彈珠台，乜乜online，smartphone……戶外活動對而家嘅人黎講甚至係一種虐待。 

不過就係呢個慾望愈黎愈難得到滿足，虛假嘅笑容已經變成習慣嘅社會上，呢班作者嘅喜悅無疑係最動人。每一位寫手都會有個最原始嘅願望，希望自己嘅故事可以變成實體書。然而唔係每個人都可以實現呢個夢想，而係芸芸眾生當中有幸出書嘅咁多位，總算達成自己嘅夢想。要實現夢想最緊要睇嘅係機會，今日你地成功左，從你地身上所散發出嘅興奮，作為旁人嘅我都被感染。 

你地所展現最燦爛嘅笑容，真係好動人。呢種最單純最簡單嘅笑容，即使背負住銷量嘅壓力，但面對住自己嘅親筆著作嘅喜悅，相信真係非筆墨所能形容。作為出版社係壓力方面唔止比作者大，感受可能更加深，望住墨出版嘅chris個種緊張同興奮，個畫面真係好有趣（佢真人真係好靚仔架），我呢個無聊人係到呢再一次祝咁多位作家新書大賣。