短篇散文集: 《愚人節的玩笑》

又嚟到一年一度嘅毒撚情人節，作為其中一條毒撚嘅我梗係爭取機會，向心愛嘅女神表明心蹟架啦，於是我拎起電話…

「喂，阿穎，我有啲嘢想同你講呀…」

「講吖。」

「其實…一直以嚟…我…我都好鍾意你架…」

「吓…你講真架…」





「係呀，我一直以嚟都好鍾意你架！」

「um…咁你想點吖…」

「唔知…你…肯唔肯同我一齊呢…？」

「好呀！」

嗚呀~媽，我得咗啦！





「你講真架？」

「你唔信我呀？」

「唔係！咁…咁而家我哋…係咪即係…男女朋友呀…」

「你話係咪係囉！」

之後仲約埋第二日一齊出街。呢一晚，我真係開心到瞓唔著，尤其當望住佢臨瞓前send咗個帶住kiss嘅圖案嘅早抖過嚟，我簡直興奮到攬住個電話係張床到跳足幾粒鐘。





到咗第二日，我諗唔洗講落去大家都估到個劇情發展架啦。

無錯，第二日，我依時出現係約會地點，但並未見到阿穎嘅身影，於是我打咗俾佢。

「你係邊呀？」

「下，咩係邊呀？」

「我哋唔係約咗出街架咩…」

「下，我講笑咋喎，你唔係當真呀…」

呢一刻，我個腦變得一遍空白…原來噚日嘅一切…都係講笑…突如其來嘅無力感傳遍我全身…真係幾乎暈倒咁滯…

「冇…傻啦，鬼唔知講笑咩…」





「仲有冇嘢講呀？冇我收線架啦…」

「冇啦，拜…」

「唉，真係俾你個死蠢激死呀！」

「下？？」

「我話出街係講笑咋麻！」

「下…？？」

我嘴角不自覺咁微笑，就好似聽到啲絃外之音咁。





「噚日講嘅嘢，我俾多次機會你講多次！」

「下……」

「唔講就算架啦！」

我猶豫咁陣，深呼吸咗一下，鼓起生平最大嘅勇氣話：「阿穎，你係我嘅女神，我一直都好鍾意你架，可唔可以同我一齊呀？」

「好呀！」

下…4月2架啦喎…我冇聽錯吖麻…

「你…講真架？」

「你唔想咩？」





「唔係…只係點解…」

「點解會玩你出街？」

「係…」

「罰你囉！鬼叫你咁冇膽呀，表白都要靠愚人節！」

嘩…我呢刻嘅心情就好似坐完過山車咁，先由最高點直衝落谷底再嚟個360度大迴轉再衝返上天……

「咩啫…咁驚吖麻…」

「咁你而家又唔驚？」





「我…」

「唔玩你啦蠢人，我而家出嚟啦，等我呀~男朋友。」

------------------------------
咁易俾你哋估到我仲係9upper嚟嘅！嗱，其實就咁嘅，有啲廢話真係好廢，但都要講下架啦。

都市傳說話2月14日其實先係真正嘅愚人節。點解？呢一日，幾多無知少女俾啲仆街用甜言蜜語呃走咗個心（甚至個處），幾多人虛情假意咁對另一半，幾多個ol明明冇男友都要特登買花送俾自己…

而4月1日，幾多個怕羞內向嘅死毒撚，籍住呢個機會向女神表明心蹟，那怕失敗嘅時候要強顏歡笑咁講句愚人節快樂……

不過呢一日，就算成功又如何，女神嘅答案真定假其實都同個表白一樣，只有自己知，與其做隻只係敢係愚人節表白嘅無膽鬼，不如大膽係平常嘅日子表白啦，不嬲都話，講都有50%機會成功，嚟講，永遠都只可以睇住佢係人哋嘅懷抱中。

勇敢啲，咪成世做兵啦！