《唔⋯⋯ 其實我住在香b大廈⋯》: 42

我聽到這裡感到非常震驚！

原本以為我的出身是相當卑微的，現在，我不單成為了包租公，手握我爸爸擁有的數千萬物業，還竟然有兩個名人親戚⋯⋯

「咁⋯⋯你⋯ 就係嗰個囂仔？」
其實這問句只是肯定一下，他應該就是當年要我爸為他頂罪的那個⋯

「唉⋯ 無錯⋯之後我去咗間日本人公司度賣相機⋯ 做下做下就到今日⋯⋯」

他又從衫袋拿了兩張卡片出來給我



「月⋯ 幫我試下約你爸爸出黎⋯ 我想同佢道個歉⋯ 搵咗佢好多年都搵唔到⋯ 係你出咗事我先至查到原來你地咁多年都仲响度⋯」

「我既事⋯⋯ 點解你會知？」

「你覺得有咩原因會有間公司無端端賠錢比你，仲會有個高層特登走黎道歉？」
他的笑容反映了我的天真

「係因為你係我好朋友既仔⋯」



車子差不多回到大廈，他也總結了一下

「試下幫我吖！ 同埋如果有咩野你可以直接打比我⋯ 上面有我電話⋯ 張卡片袋好佢，唔係咁多人有我卡片，你拎出黎都可以旁下身既⋯」

「旁下身？」

他又笑了一下
「到你用得著就會明點解⋯」

我思前想後的回到家裡，考慮著是否應該再問問老爸有關以前的事，只是，我又怕再惹他生氣⋯ 特別是我知道了他原本可以在電影圈幹出一番成就，而我兩位叔叔今時今日的表現，也可能讓他感到不是味兒，也會為當天代囂仔認罪而覺得後悔⋯



所以如果我再把往事揭開，是否會令他再次回憶起那段傷痛？

我坐在書枱前面想著，沒有發覺爸爸原來已站在我身後， 他一手拿去我手中的卡片，望了一望

「你今日見過佢黎？」

我點一點頭

「佢應該講哂我以前既事你聽啦⋯」

「一啲啲啫⋯⋯」

「佢係咪叫你搵我出去？」



「⋯⋯係」
他早已料到會是這樣

「唉⋯⋯ 你同佢講我冇嬲佢喇⋯ 不過，我真係唔想見佢⋯ 」

「好⋯⋯」

老爸見我欲言又止，便嘆了一口氣

「唉⋯⋯ 你想問就問啦⋯⋯ 我知你想知我以前既事好耐⋯」

不過，我還沒有開口問，他已經自己慢慢說了出來

「當時囂仔有一日突然間約我出去，同我講話有急事要遠行⋯ 問佢咩事又唔講，只係叫我幫佢⋯ 我無諗過原來咁大件事，仲應承咗佢⋯」



老爸一邊說，一邊走進房間，從床底找出一個大箱⋯ 打開那個封了塵灰的箱子，拿出一件攝影師慣常穿著的背心外套⋯

「個衰仔當年就係學我著埋同一款衫，拎住副啤牌去四圍識女仔⋯ 結果一時認叻走去追咗個黑社會大哥既女朋友⋯」

「咁點解佢要扮你？」

「唉⋯⋯ 你老豆我當年都叫做有啲人識⋯ 我又經常著呢件綠色背心⋯就好似我既專利一樣⋯ 所以有唔少初入行既女仔咪比佢呃到⋯」

「佢借你個名去溝女？！你又由得佢既！」

「同佢咁多年兄弟⋯ 係呢行既就會識分架啦⋯ 諗住佢識極都係妹妹仔啫⋯⋯點知佢識人地個女朋友⋯」

「咁點解會搞到你？」

「因為個女仔一直以為佢就係我咁供咗出黎⋯ 到個老闆搵到黎片場搞大鑊已經太遲⋯ 我諗住反正都埋唔到欄咪認咗佢幫囂仔頂咗算數⋯」



他又從箱內找出一疊陳年黑白照

「當時呢幾層樓又供緊，個老闆又搵人黎搞我⋯ 咁啱當時洪勝有個叔父係打理呢一頭同埋搵我想租個單位黎做一樓一⋯ 」

他嘆著氣回憶當年的一個決定

「我都考慮咗好耐⋯ 不過因為你同你阿媽⋯ 我唔可以比自己有事，如果唔係你地孤兒寡婦就大件事，所以⋯」

「一方面放租比佢地減輕負擔，一方面搵佢地幫你手擺平？」

他點了點頭

「不過自此就冇人再敢搵我拍野喇⋯」



「而你兩個阿叔都以為我自甘墮落⋯ 又玩女人又開雞竇⋯所以同我斷絕來往⋯ 我見自己兄弟都咁，就更加唔敢同你媽咪講⋯⋯」

我發覺，原來我爸的人生比我所想像還要艱辛⋯ 他一個人扛下所有的問題，靜悄悄的為我和媽媽築起了一個溫室⋯ 雖然我們從來不覺得。



第二天，進行我的復仇計劃第一步

我約了人事部經理Jack，和市場部的Tim Leung到公司的天台⋯

他們一開始的態度相當不友善，把我當空氣一般看待⋯ 完全把我的電話當作那些植髮減肥廣告般草草掛線

很好！

於是我再用公司電郵發了一張照片給他們，並附上一句：

我在街上拾到一張照片，請問是你們本人嗎？ 見字請到天台一聚⋯

果然，兩頭好色的小麻鷹唯唯諾諾的走到天台等我

「韋晉月！你想點！」

「嘩⋯ 人事部經理真係有威嚴喔～」

對不起了，現在的我已經不是昨日的小嘍囉了⋯ 那復仇的惡魔早就植根我的心臟，是時候蛻變了！

「喂⋯⋯你⋯你拎張相威脅我地⋯ 我可以告你！」

「市場部既人真係有市場觸覺⋯ 但係就冇咩常識！ 我執到張相，問下係咪你地既都叫威脅？」

「好！ 張相唔係我地既⋯ 咁得啦！」
Jack 比我想像中強硬⋯ 那才好！那才好玩！

「係呀！ 你都影唔清個樣⋯得張相你改圖都得架！點可以咬定係我地？」
Jack 怒目白了Tim一眼，他這樣說不就等於承認那是他們嗎？

我笑了一下
「喔！ 咁就得⋯ 我將張相放上141同高登先！」

「喂！係咪玩野呀！ 你想點呀！𡃁仔！」
Jack發火想衝過來打我⋯ 我一下避開，順勢一手把他推落地⋯

「你諗清楚你同緊邊個講野先啦！契弟！ 而家係你地唔掂定我呀！」

我隨意拿出手機，播放了一段短片

片段中看見他們兩個逐家逐戶按鐘的情況，還有些角度是清楚看見他們的樣貌和進房情況⋯

Tim看到這裡已經軟攤在地⋯ 而Jack還想搶走我的手機⋯

「Jack！冇用架！ 佢唔止一份backup ⋯⋯」

「聰明！ 駛唔駛再比啲你睇？ 呃！唔係⋯ 係比你老婆同你女友睇⋯⋯」

「⋯⋯咁你想點？」

這兩頭小麻鷹終於被馴養了

「想你講聲對唔住⋯ 因為你對我好唔禮貌⋯」

Jack脹紅了臉，忍耐著一字一句的說

「⋯⋯我⋯⋯對⋯⋯唔⋯⋯」

「講笑咋！」

我馬上打斷了他
「Jack哥、 Tim哥⋯ 其實我有野想你地幫手⋯」

我的準備工作終於完成了第一步⋯


而就在我準備復仇的某天，明明的信息來了

「老公⋯ 我明天回來了⋯ 但是蓉兒說她要賺錢，想來哥給她一個房間工作可以嗎？」

正好我跟來哥在茶餐廳聊著，我遞給他看，當然，他二話不說就應承了

第二天，明明就幫蓉兒拖著行李回來，她靜悄悄跟我說，蓉兒好像跟人拍拖了⋯ 但是不知道什麼原因總是缺錢⋯

忘了說，自從明明跟我一起之後就已經沒有再幹平N桑拿了⋯ 但是，蓉兒就繼續一直做，直到最近⋯

因為聽明明說：她被解雇了

原因是，她被公司發現了偷偷跟客人幹了全套而差點給公安抓了⋯

就因為這樣，她便要來香港當個長期的七日鮮了⋯

她們兩個一去到三樓那房間，馬上關起了門來個姊妹淘⋯⋯

「明明你真的好幸福啊～～」
蓉兒在床上躺著亂轉

「為什麼這麼說喔⋯⋯」

「你老公這麼疼你，又這麼有錢⋯ 」

「嘻嘻～ 他呀⋯ 對我是真的不錯的呀⋯⋯」
明明甜笑著，一邊拍著枕頭
「有時候也想不到我會有這麼一天⋯ 家鄉缺錢所以傻傻的到香港幹⋯那些工作，竟然讓我遇到他⋯」

明明又握住她的手

「還好在平N的時候有你陪我⋯ 不然我都給欺負了⋯」

「傻妹！ 那如果我有事就要你幫我啦⋯⋯」
蓉兒笑著說

「嗯」
明明眼中充滿感激

咯咯！

明明代她打開了門

「阿嫂⋯ 佢地係時候開工喇⋯ 你而家跟咗阿月就唔好落黎咁多喇⋯費事啲麻甩佬眼望望啦⋯」

「哦，巧呀⋯ 吳街賴哥⋯ 梗和返汕去先喇⋯」
明明來香港多了，也多少聽得明白廣東話和學著說⋯

於是，她跟蓉兒道別後便回家準備晚飯⋯

這一晚，我的家又回復一片和諧，除了我和爸爸繼續被明明罵著她一離開，整個家就亂得像戰場一樣⋯ 但晚飯總是有一頓稱心的家常便飯⋯

「老公⋯ 吃過飯之後我們去逛街⋯ 巧吳巧呀」

「唔去喇⋯ 我一陣要落去做野⋯」

「月⋯ 咁夜仲有野搞？」
我爸又幫明明發聲了

「嗯⋯ 最多一陣整完仲早既話就出去行啦」

「哦⋯⋯」
她又扁著嘴在撒嬌了


但是，我實在恨不得馬上到工作室去，因為長毛今天致電給我 - 他已經偷偷的在各人的房間中安裝了攝錄鏡頭⋯ 即是說，我現在已經成為監察之王⋯

我知道，我為了完成復仇確實冷落了明明，但是，我被這狼狗侮辱，被他欺凌的影像還是瀝瀝在目⋯ 如果我不好好大幹一場，恐怕我這一生一世都會活在這屈辱之下⋯


其實明明真的很好，比我想像還要好，她只聽見我說有工作，只不過失望了一下便繼續開開心心的倚著我吃飯，對我要夜歸一事絕口不提。也許爸爸真的說得對，她真的很適合我。

只是⋯

我還離不開Tracy⋯⋯ 每天上班、下班、偶然午飯時間在街上，總會看到她的出現。 我不知道是真的剛巧遇上，還是是我太過留意她的存在⋯⋯ 可是，我一見到她，我整個人就會瘋狂的轉入她的旋渦之中