[平行時空下的結局]後香港小男人網上日記: 外傳----阿Kit篇
外傳----Kitty篇
記得當年，校園戀愛仍然未可以順理成章嘅年代，當時嘅追求者中最令我心動嘅就係阿賓。成績上佢稱唔上突出，外貌又唔出眾，點解會鍾意佢？或者因為佢嘅單純，佢嘅傻氣，又或者因為單純嘅鍾意。
記得當時嘅後樓梯，就係個到，我接受咗佢嘅表白。但係一個高材生戀上一個成績平平嘅男仔，當然會遭到身邊嘅長輩反對，由於父母極力嘅阻止，但我又唔願意妥協，最後我就被佢地送咗去外國讀書。
起初我都會諗，我相信我同阿賓可以經歷時間嘅考驗，我相信我哋最後一定會走返埋一齊。但係時間耐咗，到大學畢業，我開始諗，佢到低有冇記住我呢？佢會唔會已經忘記咗我…或者，從來只係我一廂情願咁以為佢會等我。所以我即使返到香港，我都打消咗搵佢嘅念頭。最後我接受咗另一個男人嘅追求……個嗰人就係我前夫。
當時我諗住我可以為咗呢個男人放棄阿賓，所以我都盡量唔再諗佢。一年後我同呢個男人結咗婚，我以為從此可以同老公好幸福咁生活落去。點知好景不常，我前夫被公司調咗返上大陸公幹，由於只係幾個月，所以我都不以為然，仲好放心佢一個月返落嚟一次，因為當時嘅我對佢係100%有信心。不過原來男人真係信唔過，佢最後俾我發現佢係上面有第二個女人，我好嬲，我好絕望，我對佢嘅信任竟然換嚟一個咁嘅結局。個陣嘅我曾經諗過去死，但就係呢個時候，我發現我竟然有咗，而唔知點解我唔忍心落咗佢，就係因為咁，我迫住要自己堅強，我唔可以死，不過從此之後，我對所有男人都失去信心，直到遇返阿賓。
我同佢嘅再一次相遇就係佢做嘢間廣告公司到，十幾年冇見，佢嘅外表雖然變得成熟咗，但從佢身上所散發出嚟嘅單純，依然仲係到。嗰晚傾完公事，我約咗佢食飯，我好想知道佢咁多年嚟嘅經歷，仲有…我好掛住佢…
係呢一餐飯入面，我發現原來佢仲未結婚，個刻嘅我真係有種莫名嘅興奮，甚至幻想唔知有冇可能再續前緣呢？但一諗起，我只不過係一個失婚嘅女人，仲要有個女，邊有男人真心肯照顧一個日日都提住自己唔係佢親生嘅人架…
呢餐飯之後無耐，佢又約咗我出嚟食飯，我好開心佢主動約我。點知出到嚟，佢竟然係問關於佢同其他女人嘅問題，我當時就好似坐完過山車一樣，頓時係天堂跌返落地獄。不過都係一件好事嚟嘅，起碼知道，佢呢十幾年嚟冇單方面等我，至少唔會令我咁內疚…
係呢段日子，我同佢都會定期約出嚟食飯，我哋可以無所不談，我就好似佢嘅軍師咁，或者可以話，好似一對舊朋友…唔通我同佢永遠都只可以行到呢步？過咗一排，佢之前提起嘅Suki，同返佢嘅前男友一齊，仲要係由阿賓自己親手將佢哋拉返埋一齊。聽到個陣我雖然表現得好冷靜，但其實我內心好興奮，我係到幻想我同佢終於都有機會。係跟住落嚟嘅幾個月，我同阿賓一直都徘徊係朋友嘅關係之間，都係得閒出黎食下飯咁。
有一日，公司叫我過日本跟個project，要去兩個星期，咁岩阿賓約我食飯，我就諗住個日同佢講呢件事，話聲佢知等佢唔洗擔心點解兩個星期都搵唔到我。點知個晚佢話要ot，叫我等，約7點最後攪到9點先出現，唔止，身邊仲要有個一睇就知未發育完成嘅細路女，佢唔係dry到要搵援交呀？後來佢介紹話係個廣告model，我梗係至少拎返個主導權啦，點知個小妹妹反擊一句「aunite拜拜」，我當然全程黑面啦。點知阿賓仲未知死，行行下仲覆wtapp，仲要覆個個「model」，所以我決定飯都唔食，直接走咗，去日本件事就梗係唔講，當係懲罰下佢都好。不過我為咗話佢知，我仲記得當年我哋嘅事，特登寄咗粒石俾佢，希望佢都記得啦……
就係我由日本返嚟嘅時候，我見到佢接我機，個刻真係由個心到甜出嚟，不過因為我仲要返公司，唯有同同事走先。第二日我就收到佢約我食飯嘅信息，其實我個心既緊張，又期待，唔知會唔會有啲咩特別事發生。
食飯個日，佢帶咗我返舊校附近，係咁講起以前嘅事，其實我已經感覺到佢之後想講咩，奈何我真係唔敢接受佢，因為我怕我會拖累佢。而到佢真係表白嘅時候，我真係百感交集，一方面好開心，好感動呢份愛跨越咗十幾年，今日再返嚟我手上，一方面我好後悔，好矛盾，我後悔當日讀完書返香港點解唔即時搵返佢，我好想自私咁同佢一齊，但又唔想因為個女而成為佢嘅負累。最後，我為咗佢可以得到更好嘅將來，我雖有忍痛放手，叫佢唔好再追我。
之後，我有收過阿賓嘅信息，希望可以做返朋友？賓啊，你唔好以為我真係咁蠢，我當然知道你咁做不過係想以退為進，你覺得只要一日係我身邊一日都仲有機會，不過件事唔係你諗得咁簡單，我有個女架，但你要我點開口同你講呀…過左幾日我再收到一條來自阿賓嘅信息，內容大致上都係想我信佢可以令我再次對男人有信心。不過阿賓，又點會知道，一直以嚟，我從來都冇對你失去過信心，今次，我只係對自己冇信心……
就係被瘋傳為世界末日前嘅一晚，阿賓約咗我出嚟，都係講返同一番說話，而我唔知係咪都俾末日預言所動搖，抑或我真係對阿賓咁有信心？我唔知，我只知，個晚我決定將我嘅下半生再次交到其他人手上……至少係佢發現我有個女之前，我的確係咁諗。但係呢個事實，始終都要俾佢知，而當佢發現個陣，從佢嘅反應我知道佢接受唔到，所以我叫咗佢走。我知道，我唔可以咁自私，要佢接受一個唔係佢親生嘅女。
過咗幾日，我見阿賓都冇再搵我，我知道佢可能已經決定咗，但可能我犯賤，始終好想親口聽到個答案，於是我發咗個wtapp俾佢，不過一直都顯示為一個tick即係佢未收到啦，可能電話冇電啫，我安慰住自己。幾個鐘後，我再發多個，但都係得一個tick，而因為我見到佢嘅最後上線時間仲顯示緊，但冇更新過，所以我知佢冇封到我。但係我開始擔心，佢會唔會發生咗咩事，不過我只可以擔心，乜都做唔到，唯有再發多個信息俾佢……
呢一晚，我朦朦朧朧咁發咗幾個夢，發發下又醒，瞓返又再發過。夢入面，阿賓就係我屋企門外，我一打開門，佢就將我抱得好緊，緊到生怕一鬆手我就會離佢而去咁。
「嘻嘻，你終於嚟搵我地嗱？」我真係好開心，佢肯揀我。
但係夢始終係夢，夢境冇帶到現實，我醒嘅時候，見到之前發俾阿賓嘅wtapp已經變哂兩個tick，不過佢依然未回我。就係我新嘅信息送出無幾耐，佢打嚟同我講因為公事上咗去大陸，我聽住佢講嘢，忍唔到流淚。阿賓啊，你明唔明我唔係怪你要返上去做嘢，而係點解你唔可以話聲俾我知，你知唔知我會好擔心你架……
係同佢嘈完之後嘅呢幾日，我一直等佢打俾我道歉，點知等極都等唔到，我開始係到諗，其實我憑咩要佢對我交代，我又憑咩發佢脾氣……我好驚佢因為呢次之後唔再搵我，於是，我決定親自去佢樓下等佢，同佢道歉……我等咗好耐，當我想打俾佢嘅時候，我見到佢係部私家車到走出嚟，隔離仲係一個好有氣質嘅妙齡少女，比起我，跟本已經超好多「班」。起初我都以為係普通同事，點知，我見到阿賓主動咁鍚咗佢一下，個刻我清楚知道，原來所謂嘅承諾，都不過係動聽嘅謊言。
阿賓，我冇怪你，要怪只好怪當初我返嚟都冇搵你，要怪就怪當初父母嘅反對，要怪就怪…「緣份」。個天俾我哋再一次相遇，再一次令我哋相愛，偏偏又要我哋開花不能結果，其實一切都冇得怨。你係世上難得嘅好男人，而我只係一個失婚嘅女人，我唔可以自私咁要求你揀我。不過，我真係有一個好自私嘅願望，如果真係有來生，我真係好希望可以陪你走過下半生嘅人…係我…
多謝你，阿賓，多謝曾經對我咁用心，多謝你對我嘅愛…
祝你永遠幸福……
阿賓，我愛你……
擦光所有火柴難令氣氛像從前閃耀，至少感激當日陪著我開甜蜜的玩笑……