[平行時空下的結局]後香港小男人網上日記: Week34　Sat

Week34　Sat

琴晚我睇完Kit封信之後，我send咗條wtapp俾Janet，約咗佢今晚食飯，點知佢有個會要開，於是改咗做聽晚。由於我唔想自己一個留係屋企亂諗嘢，所以決定返工，用工作麻醉自己。一返到去，Eric就入嚟搵我。

「點呀，肯返工啦咩，即係你諗通哂啦？」

「算喺掛…」我將Kit封信嘅大致上嘅內容同聽晚約Janet食飯諗住講分手嘅事話哂俾Eric知，亦同時對自己嘅行為作咗個總結，我真係一個仆街。

「既然阿Kit都講到咁，就咪話做兄弟嘅唔點醒你。如果你真係諗住同Janet分手，你就係真真正正嘅一條人渣。」





「我唔想拖住佢，佢係一個好女仔，佢絕對可以揀個更好嘅男人。」

「收皮啦，學咩人扮偉大，你而家同佢分手純粹係為左想彌補對阿Kit嘅錯，但咁做有用咩？佢人都走咗，加上講到明真心想你幸福，你估佢想見到你為咗佢而去破壞自己嘅幸福咩？咩唔想拖住人，講到尾跟本就係你自卑，你適唔適合佢，Janet係當事人佢會唔知？人地咁多人唔揀都剩係揀你，你仲講啲乜？問心，你唔愛Janet？如果你覺得傷害Janet，一個你都愛嘅人，只係為咗彌補你對阿Kit所造成嘅傷害，咁唔該你死咗佢算，你憑咩傷完一個又一個。如果唔想內疚而去傷害人，咁你跟本最唔應該留係呢個世上。」講完之後場面落入一片靜局。

今次我終於肯先開聲：「咁我而家應該點做？」點解我一問口就問埋啲咁白痴嘅問題架…

「如果你真係愛Janet嘅，咁你就應該去捉緊你嘅幸福，唔好俾佢再有機會走；如果你真係唔愛嘅話，你好好咁講清楚，長痛不如短痛。其實你對佢係點，我相信你個心已經有答案，所以，我只係一句，永遠心嘅諗法最緊要，唔好太在意所有外在因素。」講完Eric就行咗出房。

由收工到返屋企，我一直係咁問自己，我到底愛唔愛Janet？有幾愛？點解愛？甚至咩係愛？原來我做人做咗咁多年，連咩叫愛都未攪得清就已經做咗咁多次，興幸嘅係，我身邊總會有人幫我解答。





不知不覺諗到老豆返嚟，佢好識做咁冇問起我琴晚發生咩事。

反而係我問咗佢一條問題：「你愛唔愛呀媽呀？」

「梗係愛啦，唔係點會一齊咁多年，到而家都仲會成日去同佢傾計呀。」老豆答得好快，好理所當然，諗都唔洗諗一樣。

「咁Aunite Hui呢？」係我問完之後，老豆沉默咗好耐。

「愛，不過我哋亦都因為好多原因所以分開過，到今日我哋係返埋一齊，其實都算係一種緣份。」





係我未答得切嘅時候老豆繼續講：「其實你一齊過嘅人或多或少你都會對佢動過真心，話冇嘅就呃人嘅，問題係呢個世界有幾多人結婚對象係最愛個嗰？最緊要嘅係珍惜眼前個嗰。老土啲講句，如果有一日你發覺，你人生嘅路上面，可能會突然缺少咗某一樣你覺得好重要嘅嘢，無論如何，流過眼淚之後，你都要繼續行，比以前行得更快，行得更大步，總有一日，你會同佢再見面，一定會！」聽完之後，我第一個反應係笑咗出嚟，老豆你呢排睇得男人唔可以窮太多啦，啲咁老土嘅對白都背得出。不過我諗我今次真係明你想講咩。

我知道個天冥冥中自有安排，如果我注定要同阿Kit一齊，咁無論點我同佢到最後都會走埋一齊。同樣地，如果注定我同Janet要分開，無論我做唔做啲咩，我哋都係會分開，所以我決定，順其自然啦！