〔異能〕〔餐廳〕《忘憂草》（齒輪兄弟會：庖丁）: 第二部01.法國
1992年，香港，大角咀。
一名男子正在收拾行李，房間四周已經堆置了數個大紙箱，看起來正要舉家搬遷。男子把最後一件衣物放進行李箱後，不禁抹了一把額上的汗。
「老公，執完嗱？」男子妻子剛好走進來，把手中的毛巾遞給自己的丈夫。
「嗯，陣間等司機黎就可以搬落去，我拜託左細佬遲啲寄去法國俾我地。」男子接過毛巾，一邊擦汗一邊回答。
「但係小懷仲細，我驚佢會唔適應……」
「無辦法，新總督上任之後，不斷招攬奇人異士。中國又好似作對咁，喺香港成立組織，仲要不惜滅口都要阻止英國帶走佢地。我怕我地再唔走，下個就到小懷啦。」男子嘆了口氣。
「點解會咁……」女士閒言不禁垂頭
「細佬個老闆係呢個組織嘅其中一個投資者，佢話呢個叫『O61』嘅組織根本有殺錯無放過……」
「爸爸，司機叔叔黎左啦。」一名約莫六七歲的小朋友站在門外。
「小懷？執好野未呀？」男子一把抱起自己的兒子。
「執好啦。」
「咁你幫媽咪拎行李落去啦，我同司機叔叔傾啲嘢先。」男子親了一口小孩，然後在孩子一面厭惡下離開房間。
在男子離開後，孩子拉了拉母親的衣袖，輕聲問：「我地係咪唔會再返黎啦？」
母親蹲下身子，撫摸著兒子的頭髮：「唔好唔開心啦，你去到一定會適應架。」
「嗯……」
那天，小孩在啟德機場的窗戶望著夕陽，萬萬沒想到下一次再站在這片土地，已經是很多年以後的事了……
………
……
…
「你喺度諗緊咩呀？」欣頴帶著傑克從便利店中走出來拍了拍站在玻璃窗前的我。
自從我邀請她與我和傑克一起去法國後，假期機票等等的東西很快便辦妥。與其說我急不及待回到法國，倒不如說我對尋找答案有一種逼切的盼望。
欣頴為了應付聖誕期間法國的寒冷天氣，帶了十分多的禦寒衣物，甚至尚未出發已經穿上了羽絨。我不忍告訴她，她現在和海洋公園中的企鵝有九分相似。連帶傑克也被包裹得像糉子一樣，反顯得只有一件大褸的我有點標奇立異。
「無，諗起細個啲嘢啫。」我一手接過她手中的口香糖，把它放進腰包中。一手把辦好了登機手續的護照還給她。
「係喎，你都無點同我講過你細個嘅事。」欣頴一邊收好護照一邊問。
「有機會嘅……點呀小傑克你？」我轉移話題看向小傑克。
傑克自從知道我們要去法國後，整個人處於亢奮狀態，昨晚更是通宵不願入睡。結果來到機場後，便開始變得昏昏欲睡。
「無事，我地係咪好快就到法國架啦？」傑克聽到問話後立刻搖了搖頭，撐開雙眼問。
「邊有咁快呀傻仔，仲要坐多十幾個鐘飛機。」
「坐飛機！坐飛機！」他又處於亢奮狀態了。
「欣欣！」一名女子在遠處一邊大叫一邊向我們奔過來，看樣子應該是欣頴的同事兼好友王婷，據說她和我的堂哥解憂關係密切。我極目遠眺，果然她身後站著一名正在搖頭的健壯男子。
「婷婷！」欣頴看見對方後亦喜不自禁。
「我幾驚趕唔切呀！你就好啦去法國過白色聖誕！呢個小朋友就係傑克？好得意呀……」雙方碰面後王婷連珠炮發地說過不停。
「嗯，係呢婷婷，陪我去買本雜誌吖。」欣頴看了我和解憂一眼，便把興奮的王婷和亢奮的傑克拉走了。
「佢係一個好女仔。」解憂待他們一行走遠後開口道。
「我知。」
「搞掂晒？」
「嗯，短期內應該都唔會再有佢地嘅人喺香港。至於維持到幾耐，就睇你地本事啦。」
「上面對趕走一個『外國勢力』好滿意，所以無追問我詳情，你可以放心。」
「麻煩晒你。」
說完後我們陷入了沉默，我知道他想要說什麼，但我對這件事並不想多提。
「去到……幫我同姑丈地打個招呼……」
「嗯。」
又是一輪沉默，剛好欣頴們回來，把我們解放了出來。
「解懷，差唔多要入閘啦。」欣頴回來後彷彿察覺到氣氛不對，打量了我們一眼。
「你同我好好睇住我地欣欣，佢有咩事你就知死！」王婷逼近我向我警告，我不禁看了解憂一眼，這麼有活力的女友，看來我堂兄平常應該不愁寂寞吧。
解憂回了我一個苦笑，把王婷拉開：「好啦唔好阻住人啦。」
然後對我點一點頭：「一路順風。」
「多謝。」
又對欣頴說：「手信我唔要朱古力架。」
「知道啦組長！」
就這樣我們步入了禁區，乘坐直往巴黎的飛機離開了香港。
飛機上的時間沒有什麼特別，除了在起飛時傑克怕得差點整個人彈起外，沒有什麼新奇事。唯一值得一提的話，大概就是飛機餐真的很難吃。
我因為「神速」的後遺症並不能睡覺，只好看著窗外發呆。
「諗緊咩呀？」醒過來的欣頴把頭湊過來，用朦朧的語氣問道。
我和欣頴變換了一下坐姿，把她擁在懷內：「無咩，我諗緊去到法國帶你去邊玩啫。」
「你去到仲有時間咩？」欣頴斜眼看著我笑道。
我孤疑地看著她，她接著道：
「我知你返去係有事要解決，但記得帶我周圍行，唔好浪費我啲假期呀。」
「欣頴……」
「嗯？」
「你真係好醒。」
「洗乜講！」
落機後，我拉著行李，抱著睡眼惺忪的傑克，和欣頴站在離境大堂。
「咁我地宜家去邊？」欣頴呵著白氣問道。
「等。」
「等？」
「尊敬嘅No.XIX，歡迎您返黎。」兩名穿著灰色大衣的男子走到我們身旁，躬身致意。
法國，我回來了。