《失蹤》: 第二季 第四回
一名17歲失蹤少女吳嘉欣擔任熱線輔導電話義工，在中午12時從住宅出發後便失蹤。而該機構中心職員表示吳嘉欣的確有當值紀錄，亦在簽到簿上發現她已經簽到，而其他義工亦表示見過佢，但當中心關門時侯，已經唔見吳嘉欣，當時他們認為吳嘉欣有事自行離去，但後來一直都搵唔返。
而阿石表示阿盈失蹤之前曾經調查過呢單失蹤個案，而我亦因此前去查明真相。
「我行緊嚟見你。」
「咪住咪住！Hey！有咩可以幫到你？」我有啲不知所措，順勢企起身望一望周圍，發現所有義工都已經離開工作室，只剩低我一個人喺到聽電話，於是我坐返低繼續聽電話。
「明哥哥，我無時間，我想嚟見你將真相話你知。」
「咩真相？你講緊咩？」我聽到呢句說話顯然有啲唔對路。
「呢度個社工阿Ray唔係好人嚟，你唔好信佢講嘢！」
「阿Ray？ 咪住先，阿欣！我想問你係咪曾經喺度做過熱線義工？」我想確認一下電話中嘅阿欣係咪失蹤少女吳嘉欣定只係同名嘅少女。
「你係咪懷疑我玩電話？你信我喇！」阿欣情緒開始激動，而且語氣亦都愈嚟愈急。
「阿欣......你打嚟個目的就係想講我知『真相』係咩？但我完全唔明你講緊咩.....」
「我親自嚟見你，你就會知道，嘻嘻。」對方一句嘻嘻令我感到無比嘅心寒，似係發現到獵物將會任佢擺佈嘅興奮語氣。
「見我？你呢家喺中心附近？」
「唔係，我已經喺你前面，嘻嘻！」
當我聽到阿欣咁講時侯，同時間我感受到我張枱塊板後面的確有個人企喺度。我慢慢咁放低電話聽筒，吞一吞口水，即刻企起身一望之下......
只見社工阿Ray企咗喺我前面。
「阿明，你地當值時間夠鐘喇，其他義工都去咗活動室做總結，你呢家仲聽緊Call？」阿Ray細細聲指住我手上個電話聽筒。
我一時之間嚟唔切反應，腦海好似諗唔到任何嘢咁，竟然講咗句:「呢個係一個叫吳嘉欣嘅女仔打嚟。」
阿Ray聽到後，仍然展露笑容，細心地說:「交比我，我會同佢講你地當值時間完結。你快啲去活動室做總結。」
「哦......」接著，我就將個電話聽筒交比阿Ray。然後我就收恰行裝離開工作室。走前仲聽到佢同對方講咗句:「喂，有咩可以幫到你呢？」
行到去活動室，好多義工都好輕鬆咁吹水講笑非常熱鬧，唯獨我一人同呢個氣場格格不入。我腦海仲諗緊頭先個電話，究竟係有人玩電話定係真係失蹤少
女吳嘉欣呢？
過咗一陣，另一個社工做咗個簡單總結後，所有義工都慢慢離開機構。而我走前，已經見到阿Ray同我地拜別，於是我走問佢頭先究竟係咩事。
「頭先嗰個？ 哦，你唔洗理，佢係我地嘅「客仔」嚟。經常都會打嚟扮吳嘉欣，頭先我處理咗佢，唔洗諗咁多。」
「扮吳嘉欣？」
「係呀，其實之前呢度有個義工叫吳嘉欣，有一次佢當值期間就失咗蹤，唔知點解慢慢傳下傳下變咗好多故仔，所以都有唔少人突登打嚟扮佢想嚇下你地班新義工。」
「如果係扮嘅話，咁佢都扮得幾似.....」
「你唔洗咁在意，佢一定同你講我唔係好人，唔好信我，同埋話你知真相係點呀？哈哈，呢啲長期『客仔』雖然貪玩，但都好有趣味性。呢度差唔多個個義工都聽過。」說罷，阿Ray拍拍我膊頭再說：「你係社工，你應該知道經常有人打嚟玩電話架喇，唔洗在意喎！」
「嗯。」或者我唔係在意，而係的確比頭先個電話所嚇親，特別話嚟見我嗰下真係心都跳埋出嚟。
第二日，我都開始投入返工作，始終無咁多假比我可以亂咁請，亦都唔想增加同事嘅工作量。而Karen亦照常回復崗位，當我地兩個獨處時侯，佢對我份外熱情，大概佢已經認為我地已經開始發展吧？
而事實上，當我知道阿盈更多嘅事之後，我對阿盈感覺反而更強烈，有時我都分唔清我究竟係對阿盈失蹤一事執著定真係鐘意，我同阿盈拍拖其實唔算太耐，只係......突然間消失咗，令我人生之中存在一點缺憾，呢種缺憾令我無辦法釋懷，我一定要知道真相，至少我要知道阿盈係生定係死。
「你呢排成日都返去做熱線義工嘅?」Karen問。
「無呀，橫掂放工都無咩嘢做，咪去做下義工。」我唔想將做義工嘅目的同Karen講，大概我唔想再拉佢落水。
「嗯......你放工邊會無嘢做喎，你又話同我去行街睇戲嘅？」Karen扁咀地說，亦開始對我撤驕。
「我梗係記得，只係呢排無咩戲好睇姐。」
Karen將個頭慢慢伸前喺我面前，一臉懷疑地問:「你唔係又靜靜雞去查啲古怪精怪嘅案呀？」
「傻喇，點會。見過鬼仲唔怕黑咩！得喇，總之我實會陪你，放心。」
「算你喇！哈！」說罷，Karen便繼續玩手上部電話。我見到呢部電話同以往Karen用嘅電話唔同，於是問:「換咗電話?」
「唔係喇，中心手機嚟，係用嚟同Client傾計。你新嚟梗係用新機喇，我地呢啲仲用緊舊機咋，打字好慢囉。」
剎那間，我呆呆咁望住Karen部手機，似乎我一直都遺忘咗一樣野。當日阿盈失蹤時侯，喺書展所聽嘅電話係佢一直用開嗰一部，而唔係中心所提供嘅手提電話，如果阿盈用平時嗰部，又點會收到Client爆Case嘅個案呢？更重要嘅係，中心當日並無打過比阿盈指爆Case嘅事。即係話，阿盈當日係收到另一個人嘅電話，而出咗去搵佢......
「做咩眼甘甘望住我？」Karen問。
「你仲記唔記得阿盈失蹤當日，中心係咪爆Case?」
「又問？ 以我所知阿盈係有返嚟中心，因為閉路影到佢，但時間好短。而且阿盈嘅Client都表示無人搵過佢地，其實你問我係咪爆Case，我諗得阿盈自己先知。」
呢件事令我知道，阿盈失蹤好大機會唔係因為Client所造成，而係人為，一個佢認識嘅人。
晚上，我如常地返去熱線機構擔當義工，當社工阿Ray分配座位時侯，我仍然在意第三排第一個位，一個曾經失蹤少女吳嘉欣坐嘅位。而且，我當日我利用易經占卦時竟然得出復卦嘅第五第六爻，係大凶嘅跡象。呢一點都令我有啲卻步唔想再查落去。但事到如今，我都要繼續落去，於是我趁義工去廁所時侯順手探下佢地口風。
「你地有冇聽過有個自稱叫吳嘉欣嘅人打嚟？」我問。
「哦！？你聽過呀？ 估唔到你返嚟第二日就聽到喎，我地個個都聽過哂，係咪話咩真相呀阿Ray唔係好人之類說話呀？」
「係呀！你地聽嘅內容都一樣？咁奇怪，照計如果你地個個都聽過，咁佢一定唔會再講同一番說話呀？起碼都作下其他故仔喇。」
「有時都聽過其他嘅，你咁新，梗係玩下你。」
照計睇，似乎我諗多咗，應該真係有人扮吳嘉欣嚟玩電話。咁又係嘅，如果真係失蹤少女吳嘉欣，又點會唔自己去報警同埋話嚟搵我丫。但事實上，我內心深處仍然好在意嗰個座位，於是我趁大家都忙緊時侯，偷偷地轉位去坐第三排第一個位。然後開始接聽電話，一路都無咩大問題出現，直至聽到第五個電話時侯，一個無來電嘅電話號碼打嚟。
「喂，有咩想同我地傾？」我問。此時，電話裡頭我聽得出有點沙沙聲，似乎訊號唔係收得咁好。
「我想搵阿Ray。」對方聲音係一名少女。
「唔好意思呀，我地呢度無阿Ray。如果有咩想同我地傾，可以......」
「社工陳Sir，姐係阿Ray。」
「不如咁呀，你留低你個名同電話，我轉頭叫社工陳Sir打比你丫?」
「無用，佢唔會打比我。」
「咁呀......你其實有咩嘢都可以同我傾。」
「我想搵女人嚟傾，之前盈姐姐仲喺唔喺到?」
「盈姐姐? 你指之前喺到做熱線義工嘅盈姐姐?」
「嗯。之前同佢傾開，佢仲話會嚟搵我，點知最後都無人嚟搵我。點解你地啲人咁鐘意呃人？阿Ray係咁，盈姐姐又係咁。」
「呀......你介唔介意話我知你叫咩名？」
「我講咗，你一定覺得我玩電話。算喇，既然佢地唔喺到，我都唔想再傾，係咁。」
「等陣等陣，我唔會覺得你玩電話，請你相信我。頭先你指阿Ray呃你？你點解咁覺得？」而事實上，我唔係好明白阿Ray點解咁多人對佢印象一般，大概應該真係出咗啲問題。
「你叫我做嘉欣。我之前都喺到做熱線義工，而且我一直都係阿Ray嘅Case。」
「嘉欣？你係吳嘉欣？你係阿Ray隻Case？」
「嗯。我有情緒問題，所以一直都有社工跟。後來我仲同阿Ray發生關係之後，佢對我態度就轉變，仲呃咗我嚟西貢。」
「我唔係好明白.....你係阿Ray個Client，但你同佢發生關係？而且仲呃咗你去西貢？咁你位置喺邊？你係咪之前失蹤少女吳嘉欣？」
「我鐘意咗佢，所以唔會介意同佢發生關係。只係，佢介意，因為社工唔可以同Client有性關係。可能佢驚我講出去，所以呃咗我去西貢掉低咗我。呢件事我講過比好多義工聽同求救，甚至係呢度嘅職員，但都無人信我。」
突然間，阿Ray拍拍手掌，於是我抬頭一望，只見阿Ray說:「咁多位義工，時間差唔多，聽多最後一個Call之後就去活動室做總結。」同時間，阿Ray見到我再次坐咗第三排第一個位，臉色顯然有點不悅。於是我趕緊同吳嘉欣再傾。
「咁你呢家位置喺邊？你唔打比其他人報警？你呢家安唔安全？」
「我就知我係西貢嘅山上面。而且我唔肚餓，唔凍又唔熱，大概我去咗結界。因為我之前都聽過唔少西貢有結界嘅故仔，哈，我諗我一早已經死咗。唯一可以做嘅，就係個電話只可以打到呢度比你地，唯有得閒搵下阿Ray傾下計或者搵你地傾。」
「既然係咁，你之前同咗盈姐姐講你喺西貢？」
「嗯，佢話會嚟搵我。我叫咗佢唔好，佢都要嚟。」
「咯咯。」阿Ray突然敲敲我張枱，然後細聲地說:「時間差唔多，交比我聽OK？」
我望住阿Ray嘅樣，從佢眼神同舉動我好清楚知道佢內裡一定有嘢唔想比人知道，特別我呢個返咗兩日義工就對吳嘉欣嘅事咁好奇嘅人，佢一定存有戒心。為咗唔想打草驚蛇，我直接同佢講:「對方收咗線。」然後我再電話聽筒放返原位收咗嘉欣條線。
阿Ray再一次展露笑容說:「既然係咁，你不如早啲去活動室。」我亦答應，但呢個人不得不防。
離開機構後，我隨即打電話比阿石聽話佢知件事係點，而阿石都話當初阿盈叫佢幫手查義工而忽略咗查當時職員原來吳嘉欣除咗係義工身份之外，仲係阿Ray嘅Client。
如果電話入面真係吳嘉欣，大概佢已經出咗事。而且阿Ray絕對有動機同理由去將嘉欣除去，以免兩者之間嘅事傳到比外人知道。不過我在意嘅，係阿盈如果真係前去搵吳嘉欣而出事，咁阿盈最終失蹤地點就係西貢。
我緊緊咁握緊拳頭，冷汗冒出，西貢結界一役令我飽受痛苦，而且西貢山上範圍龐大，結界處處，如果阿盈真係去咗西貢而出事，我估阿盈已經.......
於是，我拜託曾經係私家偵探嘅阿石去跟一跟阿Ray，睇下佢究竟係咩人。始終我有工作在身唔係咁方便，加上我個樣比阿Ray認得，阿石係最合適。
「無問題，交比我。我一定幫你查下，但你唔好再去做義工喇，廢事比佢覺得有可疑。」阿石一副充滿自信嘅語氣。大概重拾私家偵探嘅回憶吧?
「我陣間Send阿Ray張相比你睇......喂！掂唔掂架你？」我擔心地問。
「梗係掂喇!如果件事係真，呢個人渣我一定唔會放過佢！等我好消息喇！」
自此，我就無再返熱線機構做義工，而呢段日子我都交托比阿石去查阿Ｒａｙ。而我就趁呢段時間，深入研究西貢個地形同結界，目的係想搵出阿盈失蹤地點嘅可能性。
大概過咗兩星期，正當我熟睡時侯，手機電話突然響起。我瞓到迷迷糊糊咁準備聽時侯，見到來電顯示係阿石。心諗做咩撚咁夜打嚟呀？
「喂！阿石？家下幾點呀？」
此時，電話裡頭傳來阿石氣喘嘅聲音：「吓......吓.....明仔！有古怪！條友真係有古怪！佢夜晚晚走咗去西貢上山！」
我聽到後，即時嚇醒彈起身，我再追問：「佢上山做咩？」
「唔知......吓......佢走得好快好急!追撚死我!」
「阿石！唔好跟喇！返轉頭呀！呢家上山好危險呀！」
「傻嘅！跟咗兩星期都無料到，吓......難得有發現！梗係跟住佢喇！呢條人渣愈睇愈覺得佢有嘢！」
「唔係呀！阿石！你聽我講！西貢嘅山好危險！你咩都唔識！我怕你出事呀!」
「放心喎！行山之嘛！我以前有行開！吓.......吓.....電話就嚟無訊號，我想打比你話你知件事有進展！吓.......唔講喇，你繼續瞓喇，聽早起身等我好消息！」
「喂？阿石! 阿石！喂！阿石！返轉頭呀！喂？！」
接著，電話傳來嘟嘟嘅聲音，阿石收咗線了。我即刻再打返比阿石時侯，已經未能接通。雖然間房開緊冷氣，但短短幾段對話已經令我整個人都抖震起嚟，手心出汗，腦海一直隱藏住嘅西貢回憶通通展現，嗰種身於結界嘅恐懼、無助、疲倦一一浮現......
直到第二日、第三日、第四日......阿石依然毫無消息。而我亦報案求助，黃Sir亦帶隊前去西貢附近山上搜索，但並無發現，最後正式將阿石列為失蹤人口，事件再一次轟動全港，西貢神秘失蹤案件又再增添一單，惹來全城紛紛討論。
而我。
辭咗社工份工，一直跟住阿Ray去調查整件事。而呢一日，似乎有點進展。
因為眼前嘅阿Ray走上一架 99 號嘅巴士，而呢架巴士正正就係前往西貢。
我拉拉對Cap帽，然後緊握拳頭，似乎終於可以知發生咩事，於是我就再次跟住阿Ray前去西貢。
《失蹤》