《失蹤》: 第六回-結界
當我同Karen到達西貢後，我將今日要行嘅路線同Karen講，我決定由行程由西貢嶂山出發，沿路會途經石屋山、蛇石坳、南山洞及白沙澳，至海下路為終點，全程七公里，我諗大約三個鐘就係可以行完。
「阿明，你覺得我地會搵到佢爸爸?」Karen問。
「咪傻喇，佢爸爸已經失蹤咗十年，好話唔好聽，可能已經一早死咗，我地又點會搵到呢? 我只係想行一行佢失蹤嘅路線，睇下有冇啲咩線索或者特別事。而且我上網發現西貢經常有行山嘅人失蹤，話唔埋可能有啲奇怪事發生。」
「嗯......我都聽過西貢行山嘅古怪事，唉，希望我地無事。」Karen似乎有所擔心。
我見佢個樣好似好累咁，於是再問:「不如你返去，呢單野係我負責，你無必要跟埋黎。」
Karen拍住我膊頭笑說:「咪睇小我呀，我話哂之前係外展社工，成日帶班仔玩歷奇架!我體能唔差架!」聽Karen咁講我就放心，於是我地正式由西貢嶂山出發。
今日天氣其實麻麻地，好大舊黑雲喺天上面，似乎谷住谷住想落雨咁，呢樣先係我最擔憂。
我沿路喺到諗，呢條路線其實一直都有條大路係比行山人士行，正常跟住大路行應該唔會突然間走失，何解咁多有經驗嘅行山人士會出事?而且點解可以連屍首都搵唔返呢? 加上呢排所遇到咁多怪事，點解阿盈一直處理緊呢啲Case時候又唔同我講嘅? 最奇怪嘅係呢間所謂嘅家庭支援中心一直都出現咁多奇奇怪怪嘅Case，明明啲古怪事一直喺我地身邊發生緊，但又好似無咩人知咁......
我望住Karen，於是問:「係呢，其實你做咗咁耐，有冇話遇到啲咩奇怪事?」
Karen諗咗諗，就話:「之前有晚放工，搭Lift返屋企時候，我明明按咗十五樓，但部Iift竟然無停到喺十五樓，而且一直升上最高嗰層，當去到最高嗰層後，突然又慢慢落返黎，而且每層都會停。」
「咁怪? 你嗰陣點算?」
「梗係驚喇，我仲有個衝動想按警鐘，但又好似好誇張咁，而且我仲感覺到每一層開門時候，總覺得好似有人入咗部Iift咁。我嗰陣完全唔知可以點做，你知喇，喺lift到電話係無訊號，想同人Whatsapp都唔得，我唯有一直等佢每層停......直至我嗰陣停為止。」
「嘩......比我遇到一定嚇到仆街。」
「仲未完架，嗰晚仲發惡夢，夢見自己不斷喺條後樓梯到走上走落，我不停行上去都係十六樓，不停行落去都係十六樓......好似行咗幾百層樓梯都出唔返去咁，最後嚇到醒咗，醒返時候成身都係冷汗。」
「好再你係發夢，如果係真嘅話，可能入咗結界，永遠都係同一個地步行，永遠都出唔返去。」
「咁你呢? 你信唔信呢個世界有鬼?」
「呢個世界有好多野都解釋唔到，就講最近兩單野，搵極都搵唔到嘅阿盈，生日有願望嘅詩文，呢啲野都係解釋唔到，你話有冇鬼，我唔會否定。而且我有對易經學說有啲研究，得閒就幫自己占卜一下運程，你可能話我都幾迷信，但我會當比個參考比自己。」
「係? 咁你幫我占下!」
我見我地都行咗一段路程，於是就搵到個地方抖下。
我拎出三個一蚊硬幣，然後比Karen拎住。
「其實好簡單，呢三個一蚊銀仔，公為陽，字為陰。首先你講出你想問嘅問題，然後擲六次，再紀錄返每次嘅陰陽數目就得。」我解釋說。
Karen好似對呢樣野幾興奮，睇黎個個女仔都對於占卜睇運程嘅野都好有興趣。
「Karen，你要記住。易經係講求命運掌握喺自己手，卜出嚟嘅卦 只係話你呢家狀況係點，而且易經講求變，會因為你嘅人事同事變而有所改變，所以一陣就算卜咗咩卦都好，都唔洗咁在意。」
「好喇!我就問我今日會唔會過得開開心心!」之後Karen就聽我話，擲足六次，而每次我都幫佢紀錄。
問: 今日會唔會過得開開心心?
公字代表: 公=陽 字=陰
1. 陰陽陽
2. 陰陰陰
3. 陰陽陽
4. 陰陽陽
5. 陽陽陰
6. 陽陰陰
其實Karen呢條問題都問得幾空泛，但我都即管幫佢卜，睇下易經講啲咩。
「呢個係剝卦第二爻，「剝牀以辨，蔑貞，凶。」姐係話蟲已經蛀蝕張床，至於係床板定床頭，各家有各家說法，表示你已經冇安居之所，而且你對於所面對的事情已經找不到可以著力之處。冇人會贊同你，所以冇人會嚟幫你。 」
Karen聽到後臉色一沉，緊張地問:「吓?聽落好似唔多好嘅?」
我覺得呢支卦的確有啲問題，易經唔會講大話，話唔埋Karen今日會發生一啲事，我腦海又不自覺地聯繫到失蹤咁。但為咗令Karen安心，於是話:「開唔開心都係睇心態，有人好有錢都唔會開心，有人好窮都可以好快樂，所以你唔洗咁介意支卦講咩，而且支卦話你無助時候無人可以幫到你，但我一直會喺你身邊喎，所以你放心。」說罷，我就起身拎起背包繼續上路，盡快趁個天未落雨就繼續出發，因為我內心不安感覺開始湧現。
當我地行到去蛇石坳時候，個天已經落住微微細雨，而為咗唔想濕身，於是就行近少少樹林位置繼續行落去，但為咗唔想離開條大路，我地只係貼近樹林邊行。呢個時候，手機訊號開始時有時無，準備開始進入無訊號範圍。
「阿明，你頭先話結界，其實係咩黎? 如果我地一陣入咗結界嘅話......我地點算?」
我望一望Karen，佢臉色真係好差，我諗佢自己都唔覺自己個樣開始有難色，係因為行山行到累定係岩先占完卦先過於擔憂? 我地成日話「印堂發黑」，我諗呢個時候形容Karen最適合不過。
「你知黎做咩? 無謂一陣自己嚇自己。」我都無謂再講落去令佢諗得太多野。
呢個時候Karen捉住我隻手，認真咁講:「你講我知。萬一我入咗結界，我都可以知發生緊咩事。」
「傻喇，你點知入結界? 有我喺到，你一定唔會有事!」
「求下你講喇，我唔知點解個心好不安，我覺得我將會遇到一啲事咁......」
「好喇......其實結界形成原因有好多，不外乎地理、天氣同埋環境有關。而點解山入面咁多結界就係因為人少陽氣少，令到磁場轉變，形成所謂結界。而你發夢所見到後樓梯結界都唔係無，因為公屋大廈有咁多住戶，每戶都有大量電器輻射而令到磁場不斷改變，而後樓梯一直都好少人行，特別係十幾至廿幾樓嘅後樓梯，所以有結界出現都唔係無可能嘅事。」
當我講講下望住Karen個樣時候，我自己都不安起黎，因為佢個樣真係好辛苦咁。我望一望個天，雖然係下午兩點幾，但個天就好似夜晚六點幾咁，黑黑地又落住微微細雨，加上沿路上都無咩點見到其他行山人士，而電話又開始收唔到，我評估返呢個情況，以Karen呢個精神狀態之下，我覺得再行落去遲早出事，於是決定盡早離開西貢。
我捉緊Karen隻手，急步地帶佢落山。
「阿明? 做咩咁突然要落山?」Karen似乎比我呢下舉動嚇親，於是急問。
「我地都係走，個天氣好似唔多穩定咁。」
「嗯.....我都想快啲離開呢到，我覺得自己有啲頭暈，真係唔多舒服。」
「放心，我實帶你離開呢度，跟住我走就得!」
當走到一段路時，唔知點解我突然覺得有啲頭暈，汗水都出唔少，氣都開始喘，我Feel到自己開始著急，令到步伐開始亂亂地。呢個時候，Karen提出可唔可以搵個地方小解。
「你去隔離棵樹到屙尿喇，我喺到等你。」而我視線一直望住Karen，但睇住佢屙尿好似好尷尬咁，於是見佢喺樹後蹲低吸屙尿時，我就想呢個時候為自己占下卦，睇下易經會點解釋，因為我呢刻心入面真係亂亂地。當我喺褲袋搵下啲銀仔，先發覺岩先個三個一蚊銀喺Karen到，我順勢抬頭望一望Karen位置，發現樹後無咗佢!?
「Karen!!你得未呀?」我問道。
「轟隆!」此時天上面打了一個響雷，雨將會愈落愈大。但雷聲咁響，一定會嚇死Karen，但佢竟然無出現。
「Karen!!你唔應我嘅話我就過黎架喇!」
我行到去Karen頭先個位置，發現無人喺到，而望眼四周，完全無人嘅跡象。
我緊握拳頭，怪事始終都係會出現。
Karen失蹤了。