某天我脫毒了，走上了情聖之路: 第二十三章 - 吻
呢餐飯卓芝同柔柔一人坐我一邊。
試問有幾何可以左擁右抱咁食飯?
真係好爽，而且卓芝好細心，知我中意食肥牛就係咁幫我夾。
可能柔柔仲細同怕羞既關係，成日都唔夾野食，搞到我要照顧細妹咁照顧佢。
「你唔好成日掛住湊你個柔柔啦，你都快啲食。」卓芝細細聲同我講。
「阮芯柔你就好啦，我都想小狼對我咁好!!!」家樂又係到搞事。
「樂哥!! 我以後實會好好咁你既!!!」我一個反話既語氣同家樂講。
「我自己夾得啦。」係我同家樂搏火之際，柔柔伸個頭埋黎，輕聲講。
「好啦。」我溫柔咁摸一摸佢個頭。
唔知點解我特別中意摸佢個頭。
因為特別好摸? 我又唔覺，應該個個頭都差唔多。
我中意摸佢個頭，純粹係一種感覺，就好似你見到啲貓條就想衝埋去R下佢個頭咁。之後我都無再幫柔柔夾野，自己猛係到食。
「咳，咳」我噎親。
「慢慢食啦，噎死你呀。」卓芝掃住我背講。
「有無事呀?」柔柔問。
佢地同一時間關心我真係好爽，咁大個仔都未試過同時間有兩個女仔關心我。
卓芝行左入廚房拎左罐可樂比我。
「飲啖啦，舒服啲。」卓芝遞罐可樂比我。柔柔望住我罐可樂。
「你係咪想飲呀?」我問柔柔。
「但我飲唔晒。」
「咁不如我倒啲落個杯到比你。」柔柔好開心咁點下頭。
但卓芝有微微既不爽。
我唔知佢不爽既位係邊到。
卓芝不嬲都情緒化，我有時真係唔想理佢。班友食完又咩都唔理咁坐係到打Fifa。
卓芝又自動請櫻係到洗野。
不過柔柔都有幫手。
「你地出去啦，我洗就得。」我唔忍心佢兩個女仔執晒啲手尾。
「唔緊要啦，你都出去玩啦。」卓芝叫我出去。
我無理到佢講既野，衝埋去”得”開佢兩個，搶啲碗黎洗。
「洗飽佢。」卓芝又發脾氣。
「咁你洗，我幫佢抹乾啲碗啦。」柔柔好乖咁企左係我隔離。
我負責洗，佢負責抹。
有時我真係覺得自己好似多左個呀妹咁。
如果佢同我同年又或者細我一年，話唔定我會中意佢。
我實在中意唔到一個未發育既細路女。
洗完碗之後，柔柔話佢爸爸黎接佢，要走先。
中一學生唔留得夜都好正常。
我地成班坐多陣都逐漸離開。
廢事係人地屋低搞到咁夜。
但佢地唔係番屋企，而係轉左場去維園。
十一點幾既維園真係好好feel，傾計吹水一流。
我地搵左個個樣好成熟既師兄幫我地買酒。
7仔個哥哥仔果然無查佢身份證。
我地興高采烈咁係到飲，畢竟中學既時候就係中意扮大人。
飲到咁上下，家樂開始發酒瘟。
「肥森你講!!! 你係咪仲溝緊隔離班既張天欣!!!?」家樂大聲問肥森。
家樂酒後加左勇氣值，一下直中肥森哥既要害。
肥森無答佢，一掌就打左落家好個頭到。
「你打人，我唔同你玩! 小狼你答我! 阮芯柔係咪你女朋友?」家樂轉移目標落我到。
「你選拔佢又黎，你比賽佢又出現，考試果陣又朝夕相對，番學又出雙入對，你夠膽講你地唔係拍拖?」家樂咬住我唔放。
「佢只係我呀妹，佢亦都只係當我呀哥。」
「你呃人!!」家樂大聲講。
佢實在太煩太嘈，我忍唔住一拳中左落佢個肚到。
佢慘叫左一下就撻左係地下訓著左。
大家見到佢咁樣訓左係到，都開始萌生累意。
但家樂自己番屋企應該成一個問題。好彩佢住銅鑼灣。
阿謙好抵得諗送佢番去。
我地都各自搭凌晨巴番屋企。
「我有車啦! 星期一見。」肥森同長毛、阿豪一齊上左車。
我最熟果班人，淨番卓芝。
卓芝去左維園之後就無咩出過聲。
我留意到佢塊面紅卜卜咁，應該受酒精影響。
「好辛苦?」我問卓芝。佢淨係點左下頭。
「不如我送你番屋企，我怕你危險。」佢不斷遙頭，又唔講野。
卓芝真係好難捉摸，一時自己一個都可以嘈到成個虛咁，一時又死都唔講野。
點解家楓會頂得順?我無理會卓芝既拒絕，我陪佢上左巴士。
係巴士上，卓芝依然無出過一粒聲。
佢坐坐下就訓著左，我輕輕咁將佢個頭慢慢扶去我既膊頭到。
卓芝唔嘈嘈貢果陣，其實都幾可愛。
真係無諗過一向殘雞既佢，訓教個樣成個BB咁。
雖然呢個樣好吸引，但我無做啲咩小動作，因為我整醒佢既話，我應該會比佢掟落車。
係直至到站果陣，我先夠薑叫醒佢。仲要確保佢一醒可以落到車，唔洗等。
「咁快到既!?」Omg!!!!卓芝竟然用BB聲講野!!!!?
我個心跳得好快，點解得12度都可以咁熱?好似比火焚身咁。
「係囉，快樂既時光過得特別快.....」
「但我唔想講bye bye。」卓芝打斷我既說話。
送人送到底，送佛送到西。
我又再次送卓芝到屋企樓下。
「bye bye啦，堛到去記得沖完涼先好訓。」我同卓芝講。
「知啦煩!」卓芝回復番殘雞mode。
我地轉身逆向咁一步一步行遠對方。
一步
兩步
三步
“噗!!”
有人從後攬實左我。
佢攬到我好實，實到好似唔想我走咁。
「最多我望住入左大廈直至見唔到你身影先走啦。」我拍一拍佢隻手，示意佢放手。
佢無理會我既說話，反而攬得更加實。
佢無講任何野，只係緊緊咁攬實我。
我只可以比佢攬住，我實在唔忍心大力fing開佢。
「我唔走啦，你放手先啦。」我捉住佢隻手。
過左一陣，佢終於慢慢放開我。
我仍然捉住佢手腕，好自然咁轉身望向佢。
可能係酒精既關係，卓芝既蘋果肌比平時更紅潤。
佢用佢雙又大又圓既眼睛，目不轉移咁定睛係我到。
「可唔可以唔好離開我?無論咩事都同我講，無論發生咩事我都會企係你果邊。」佢終於開腔。
我無回應該佢，我唔係克意唔應佢，而係我唔知點答佢。
我地對望左大約兩分鐘，我仍然無回答佢既問題。
佢終於有所行動。
佢搭住我雙肩，拮高腳。
毫不猶豫咁吻下來。
我無避開，我合上我雙眼，配合佢既動作，雙手慢慢咁攬住佢條腰。
我只想好好感受呢一刻既溫馨。
呢一吻將我帶番去回憶。
記起點樣認識卓芝，每日吵吵鬧鬧。
由互不認識，到盡訴你與我。
由討厭到喜歡。
由放手到祝福。
你係我最好既朋友，你總係願意借你耳仔比我申訴唔同既事。
我既懦弱將你斷送他人，我懦弱令我放開本該捉緊你既雙手。
假使我當天有勇氣，這一吻仍會遲來還是安時抵達?