某天我脫毒了，走上了情聖之路: 第七十三章 - New page
歌完了...
音樂既完結將我地帶回現實中。
「對唔住，我唔應該......我又....又....」我退後兩步。
又成為左別人既第三者....
「其.....其實我.....」小櫻既說話被打斷。
「兩位？你地唔入得黎嫁喎。」主持人打斷左小櫻既話。
我倆道歉後就徐徐走回台下。
大家都隨住浪漫既音樂與自己既對象共舞。
我同小櫻不其然地對望，
望住對方既眼眸微笑。
「黃少朗！！！」
嵐嵐豪不顧忌週遭既氣氛大叫我個名。
「黎若嵐你細聲啲啦。」我掩住佢把口。
「你靜靜雞同小櫻姐姐去邊呀？」嵐嵐從我手中掙扎出來。
「請問我地去得邊呀？」
「嵐嵐你走咁快我會唔見左你。」柔柔同嵐嵐講。
「呀，hi小櫻。」接著又同小櫻打招呼。
「Hi柔柔。」
「wow」嵐嵐突然發出怪聲。
突然歌又轉了。
「小櫻姐姐我想同你跳舞呀~」嵐嵐向小櫻撒嬌。
「好呀！」小櫻攬住嵐嵐。
嵐嵐將小櫻拖走左。
只剩下我同柔柔。
「嵐嵐佢真係貪玩。」柔柔抱怨。
「係...佢真係貪玩到一個點.....」
「係喎！....多謝你一直咁照顧嵐嵐。」
「下！？客咩氣，佢咁獨立邊洗人照顧...」
「咁睇黎你仲未解答先前既答案喎。」
「答案？你係話點解嵐嵐咁中意同我一齊？」
「係~」
柔柔果然知道答案。
「可以講我知個答案嗎？」
「你都係自己問佢，不過唔好今日問，因為嵐嵐今日好開心。」
「嗯，咁之後再問佢，係呢柔柔.....」我將手遞向柔柔「May I？」
柔柔將手放到我手心上。
「你今日黎男朋友無嘈你？」
「無呀，佢明白我今日主要陪嵐嵐黎，同埋佢都信任我，一段感情最重係信任，只要互相信就會衍生好多正面既果子。」
睇黎柔柔搵到一個好好既男朋友。
「原來嵐嵐就係搵左你陪佢.....」
「係呀，做咩...唔想見到我？」
「當...當然唔係！....只係有啲驚喜.....」
「哎....」
掛住講野唔小心踩到柔柔.....
「Sorry.....」
「唔緊要。」柔柔微笑。
「係呢柔柔呀.....其實你仲有無嬲我....？」
「嗯嗯。」柔柔搖搖頭...「我無嬲你好耐啦....」
「咁就好.....而家見你同男朋友咁幸福，我都好開心。」
「所以你都唔好怪責自己，一切都過去左，我地唔應該為過去而活，所以好好珍惜眼前願意為你哭笑既人。」
「多謝你....柔柔.....」
「比啲信心自己，去愛你應該愛既人。」
我應該愛既人?
可惜小櫻已經有男朋友....
又再一次斷送一段戀情。
執著去爭已過去既事情，最終連本來屬於自己既野都.....
但其實乜野本來係屬於自己?
我地本來就咩都無....
既然咩都唔知，唔清楚，倒不如好好享受呢一刻....
我拖住柔柔走向嵐嵐同小櫻...
再拖住佢地隻手。
「你會唔會係咁？」嵐嵐問。
「小狼咁唔太好。」
「邊個話舞一定係同中意既人跳？」
我地幾個圍左一個小圈子一齊係到轉。
同時比n個人怒睥緊，
畢竟小櫻同柔柔都係好靚既女仔，
而嵐嵐.....唔識講.....係人地眼中佢都係靚女掛。
同佢地三個跳就好似與過去，現在，未來一齊共舞咁。
「我男朋友黎接我啦，嵐嵐就拜託你地啦。」柔柔拜託我同小櫻。
「Ok~」我做個ok手勢。
離開前見到思瑜，
「思瑜我走先啦。」
「好，bye~~」
「係呀！我可以拎你wts app嗎？我有啲野搵你傾。」
「好，明白，你拎電話黎。」
思瑜將佢電話入左落我電話，
拜別後就離開會場。
沿途嵐嵐不幾揶揄我又溝女....
經過巴士站果陣剛好有車。
嵐嵐係都要一齊坐。
我三個就坐係巴士既最後排。
嵐嵐坐係我同小櫻中間。
而嵐嵐嘈左一陣就訓著左...
佢平時應該好早就訓。
「好可愛呀！！」小櫻望住嵐嵐訓教個樣。
「下？佢可愛？」
我又望望嵐嵐....
原來佢唔嘈嘈槓果陣個樣都幾得意。
嵐嵐「嗯」一聲就挨左落小櫻膊頭。
「乖~」小櫻攬住嵐嵐細小既身軀。
係母性，係偉大既母性呀！！！
「Wei~~」小櫻叫叫我。
「係？」
「黃小狼爸爸~」小櫻甜笑地說。
WHAT!!!!!!!!!!!!
神呀！你殺左我啦，
係下犯罪之前求你將我擊殺!!
免得我得罪了你!!!!!
「玩下咋。」
「係係....我知。」
「嘻，小狼仲係咁易就面紅。」
「巴士焗姐....」
好耐都未試過同小櫻輕鬆對話，
更好耐都無專心望佢....
「小狼做咩發牛逗，係咪眼訓？」小櫻摸摸我頭。
「唔係，只係發覺好耐無認真望你。」
「傻瓜，我日日都同你一齊，你以後中意幾時望都得。」
「嗯.....我係咪好蠢呀？」
「點解？」
「如果我一早肯對自己坦白就....」
「黃小狼你好嘈呀。」嵐嵐捽眼。
「訓你就訓啦。」
「痴線，嘈醒本公主仲咁惡，唔同你講野！」嵐嵐轉頭望住小櫻「都係小櫻姐姐好，我以後要同你番學。」
「好呀好呀，就落車唔好訓啦。」小櫻攬實嵐嵐。
其實佢自己番學係咪會死！？
終於完漫長既車程，送左嵐嵐番屋企。
屋企人訓晒，只剩下我同小櫻倆人。
「好累呀！」小櫻坐左係梳化。
「你唔洗同你男友報平安咩？」
「男朋友？」
「嗯。」
「唔洗呀。」
「咁好既，以為佢會係管得好勁果啲。」
「唔好講佢....不如講番岩岩未講完既野。」
「下....咩？」
「點解無啦啦話自己蠢？」
「噢，無啦，岩岩突然有感而發姐。」
「你真係唔講？....你今次唔講，可能以後無機會講，機會無可能一直等到你有勇氣為止。」
「講左又點？機會一早已經走左，一切都太遲。」
「可能講左就會有轉機。」小櫻摸我臉。
「曾經我認為講左就有轉機，結果犯下無法挽救既錯誤......我唔想再錯多次......」
「我唔係佢.....歷史唔會再重演。」
「如果再咁落去就真係歷史重演....」
「咁小狼你聽我講。」
「唔聽......對唔住岩岩係我衝動左，對唔住。」
「蠢材！」小櫻好用力捉手腕「我中....我已經無男朋友，所以請你停低聽我講好嗎？」
我成個人呆左.......
我諗我人生最呆應該係今次....
腦裡閃過過百條問題。
但我只想問.....「可以再講多次嗎？」....
小櫻嘆一嘆氣.......「我話.......黃少朗...我中意你....」小櫻微側頭微笑。
呢句話成功將我同小櫻帶到新一頁.....