【武館MK學生妹。死毒男。人格分裂Miss。】: 【八】

「夏子琪同學，點解你會插班過黎既？」到左小息既時候，有幾個女仔走過黎向我搭話。

「其實我……」

「乜你咁都唔記得架？之前assembly校董咪略略咁講左囉！因為王校董比一班不良分子纏繞，當時係夏子琪同學出手相救呀嘛！」

咁即係大家都知道我既過去？咁我都鬆一口氣，唔駛擔心呢班名校生歧視我啦！


「聽講夏子琪妳都好似受左傷？」





「咦？」受傷？我有受傷咩？

「啊！妳咁講一講，我就有印象啦！Miss Chan好似話妳挺身而出所以被襲擊而入左醫院，最後仲因此惹上麻煩，輾轉演變成被退學！真係辛苦曬妳啦！」

「啊～下次一個女仔見到呢d事，唔好再咁勇啦！Miss Chan都係咁話，畢竟幫人都要考慮自己啊……」


到底我既事，被修飾左幾多呢？
唔通佢地仍然未知我係一間武館中學出身既MK妹？





「其實我……」突然間，比比鳥走過黎撞一撞我膊頭。「喂！你……」我無意識咁就大叫出黎，習慣左以前比人撞到就準備開人拖。

剎那間，全班靜曬望住我。

「啊！係你！好耐冇見！」我即刻扮到好似好興奮咁，指住比比鳥好大聲咁講。

「哼。」比比鳥望一望我，然後就好沒趣咁走左出課室。






「係喎，頭先陳健星見到妳又係好大反應！你地識架？」

「識！梗係識！」

「你地點樣識架？」

「哦，小學同學囉。」

「下？但係……陳健星小學都係威廉架喎？」


仆街！乜原來名校一條龍架？







「記錯！好似幼稚園！」

「但係我地幼稚園個陣好似……」

屌！原來世界上真係存在贏在起跑線
由幼稚園入名校，再一條龍上到中學！

「啊！會唔會係Play group或者補習班，不過你唔記得左呀？」

「可能係啦！」

「唔怪之得啦！陳健星個人好奇怪架，照道理你都唔會中學先識佢。」

「奇怪？」咁確實呢條契弟搵成班人一齊窮追猛打我，又真係幾奇怪既。






「妳有所不知啦，陳健星雖然係呢級度讀書成績同體育都數一數二，不過佢人品真係唔好……」

「人品唔好？」

「妳哄埋黎先啦！」女同學左顧右盼，然後好近我耳仔咁講，「妳見唔見到坐係最後排個男仔呀？」

「四眼個個？」我一講完，個個四眼雞丁即刻抬頭望一望我，面上仲痴住幾塊膠布。

「唔好咁大聲啦！比人聽到我地就煩啦！佢好慘架，一直都比陳健星欺凌……」


欺凌？






我呆呆咁望住個四眼雞丁，突然間，有幾個男仔走去拍佢膊頭，叫佢出一出去。

四眼雞丁低住頭，好配合咁跟住佢地走。