女神從Online Game走出來了: 30 愛讓我們找到對方
「咁又一年啦。」Apple舉杯說
「嗯，時間真係過得好快。」我也舉杯
「一年你就有咁大嘅轉變，我真係喜出望外。」Apple笑說
今天因為跟Apple一起見客，所以也決定一起吃晚飯。而且今天對我來說也意義重大，我永遠不會忘記一年前的今天發生過甚麼事。
「我都無諗過工作上自己可以做得咁好．．．上年我都仲係一個文員仔。而且宜家同屋企人關係變得咁好．．．都係多得Apple姐。」我感恩地笑說
「你應該多謝嘅唔係我囉．．．」Apple臉上一個略帶傷感的笑容
我聞言，不禁嘆息：「．．．我對佢有幾感激，唔係幾句說話可以表達到。」
Apple玩開笑：「即係我就可以？哈哈．．．不過，你比我想像中更堅強，咁快就可以企得返起身。」
「其實我都受過煎熬嘅．．．」我苦笑說
「睇得出，突然間就變到咁成熟、咁積極、咁認真．．．不過，宜家你可以咁平淡咁講返起佢，證明你放得低啦。」Apple有點安心說
「可能啦．．．」我說
Apple說：「你其實應該搵個女仔拍下拖．．．上次介紹比你個女仔幾好架。」
「唔鍾意就係唔鍾意．．．」我非常抗拒
「人地好靚喎，金髮美女喎！」Apple打著眼色說
「．．．我又唔係特別鍾意金髮．．．．．．」我大感無奈
「．．．你真係唔考慮？」Apple認真問
我不需要思量，堅決拒絕：「唔考慮。」
我心裡，只有她一個。
她消失已有一年，正確來說是十一個月。我雖然已經振作起來，但是這不代表我對她的思念有所減退．．．每一個晚上，我都對著月亮說話，也對著月亮哭泣。我說不傷心，是假的。我對她的愛，已經深得不能自拔．．．直到今天，我每一晚閉上眼睛，便會看到她在夜空中起舞。她的每一個動作、每一個表情，我都記憶猶新。我知道我這一生都不會忘記她，因為，她是我的妻子。
飯後，我如常先經過那個空地才回家。這個習慣已經成為了我生活的一部份，就像我每晚都會看一次我和她的相簿一樣。我聽著mp3，來到這個偏僻的地方．．．
「．．．咦？」
突然，有一種似層相識的感覺．．．是那天伊語撞車時，我去找她時的感覺！我感覺到她！！
我向著我的感覺跑過去！一段一段往事不斷在腦海中閃過．．．
「間．．．間舖．．．喺返到嘅！？」我十分驚訝
這不就是當初我得到月卡的店舖！？怎麼又回來了！？我沒有想下去，便立即跑進店舖！這裡跟一年前完全一樣！！燈光昏暗，感覺詭異．．．一定沒有錯！我每天走這條路，就是希望再遇上這間奇怪的店舖！
這裡會有找到她的線索嗎？？．．．月卡！我轉身看著大門，果然，月卡的盒子還在！只要我．．．只要．．．．．．
雖然我已經把手伸出來，但我還是沒有拿起月卡．．．
「．．．做咩唔拎呀？」
一把突然奇來的聲音嚇了我一跳！我轉身看過去，是一個披著披肩的老人。原來這裡有人的．．．
「你係．．．？」我一時間疑惑起來
「我係依度嘅老闆。」他平淡地說
我倒是十弟意外：「你係老闆！？」
「我知你諗緊咩．．．一年前你嚟過，之後嘅事我亦都知道。」他說
「既然係咁，你就幫下我．．．」我緊張得抓住他的雙肩
他輕輕撥開我的手：「點解呢？」
「．．．因為我仲好愛佢．．．好需要佢．．．」我說著，便已經不禁淚滿盈眶
他問：「你咪已經開心過囉，宜家又小有成就，你仲點解需要佢．．．」
「依啲唔係我要嘅嘢！」我激動起來
「後生仔，要知足。」他搖搖頭說
「我淨係想要佢一個，我可以咩都唔要！」我態度十弟堅決
「．．．嗰一個月，你得到啲咩？」他想了一下，問曰
我一瞬間便回憶起所有往事：「．．．佢比左我一段好幸福嘅回憶，最重要係．．．佢改變左我。無佢，我唔會有今日．．．」
他盯著我的雙眼問：「咁你係用咩代價嚟得到嗰一個月？」
我一時間真的說不出話來．．．
「係無代價。」他反諷：「你只係行入嚟，拎左張卡，咁就得到一個幸福嘅回憶。你宜家仲想要再多？」
「我．．．」我的確無話可說
他續笑說：「你鍾意嘅，可以拎多張月卡。」
「我唔會拎！」
「你唔係想要幸福咩？」
「我嘅幸福唔係月卡．．．」
「你可以再整多個同佢一樣嘅人。」
「．．．唔係佢就唔係佢，我愛嘅．．．只有佢一個。我嘅幸福，就係伊語！無嘢可以取代到佢！！」我激動得大喊出來
「．．．．．．你真係咁愛佢？」
「係！所以求下你．．．」我甚至跪下來
他想了片刻：「．．．好啦，不過我只可以教你方法，成唔成功就靠你自己。」
「無問題！咩我都會去做！」
老人拿出了一張捲軸．．．
「依張捲軸係《奢華Online》嘅傳送捲軸，只要你用魔法去起動就可以。」他說著並把捲軸交給我
「．．．我得架，我都有流住精靈嘅血！」我充滿信心說
「不過我可以話你知一件事。你的確係因為流住精靈嘅血而有魔力，但係你有嘅唔多，而且你嘅心臟唔能夠製造更多。所以當你使用依個捲軸，你嘅壽命就會不斷蒸發。」他警告著
「我唔怕，依個魔法只需要十秒施法時間！我對《奢華Online》嘅嘢依然好熟！」我有信心說
「你唔好唔記得要被傳送者知道你召喚佢，個捲軸先會真正生效。」他說
我呆了一下：「．．．咁如果佢唔知．．．我咪會．．．死？」
「無錯，而且機會，我只會比你一次。你等唔到嘅可以選擇中斷魔法。」
我想了一想，如果不能有伊語在我身邊，我活著也沒甚麼意義．．．倒不如賭這一次！！
我打開捲軸，捲軸立即飛起來並飄落在我面前，一個白色的光圈浮現在地上，很多閃閃發光的塵粒也跟著浮起！我沒有多想便走進光圈，果然我立即感覺到一股氣流把我的氣力吸走！！
伊語．．．妳聽到嗎？．．．伊語．．．
．．．．．．
回到奢華大地已經一段日子，但我沒有感到半點興奮．．．我看著每一個在我身邊經過的生命，我都感到一陣虛無的寂寞感．．．這個世界的一切都是虛構的．．．我沒有再替國家的聯盟戰鬥．．．我每晚只是看著月亮，緊緊地抱著相簿．．．
我打開相簿，看著一張一張我跟主人的回憶．．．我忍不住哭了．．．說甚麼應該為擁有一段美好回憶而感到快樂．．．這些都是騙人的．．．我怎可能開開心心去面對日子．．．？
「主人．．．你做緊咩．．．？返工返成點呀．．．？有無餓親．．．？．．．主人．．．．．．」
就這樣，我每天晚上都會對著月亮說話。看著月亮，我就好像看到主人那關懷的笑容．．．有時我甚至會覺得他就在我身邊讓我依靠著，陪著我看月亮．．．
我不禁哭了起來．．．
「我愛你．．．」
主人你有聽到嗎？
．．．．．．
伊語．．．妳有聽見嗎？
已經持續了一段時間．．．我開始感到全身無力．．．更站不穩跪在地上．．．
「你隨時會死．．．不如放棄啦．．．？」老人說
「我先唔會放棄．．．我一定會等到伊語！」我勉強支持著
「我可以比更多嘅月卡你喎．．．袋住先啦。」
我雖然快不行了，但我一定會撐下去：「你收聲！袋左就袋一世．．．我要嘅係真幸福！係伊語！！」
伊語．．．我真的很掛念妳．．．為了妳，我可以不惜一切．．．只有妳才可以使我的生命發出光芒．．．只有妳才可以給我幸福．．．伊語．．．
我愛妳．．．
．．．．．．
「伊語．．．．．．」一把聲音突然在我耳邊飄過
「．．．主人！？」我四周張望，不可能聽錯的
「主人係咪你呀？？係咪你叫我呀？？」我對著主人送給我的戒指說
這時，主人的聲音又再傳來！是從月亮那邊傳來：「伊語．．．我愛妳．．．」
「主人！！我都愛你！！」
我立即坐上飛毯用最高的速度飛向月亮！我感覺到了！我感覺到主人了！！！
突然一道白光從月亮射出來，包圍著我．．．
．．．．．．
被捲軸的白光包圍著的我慢慢睜開眼．．．我發現我站在當初伊語消失的那個山邊．．．
滿天星光下的草地上，我發現一個如精靈般的身影，正在月光下翩翩起舞．．．舉手投足都有一種優雅高貴的氣質。我深深被眼前的景象所吸引．．．她金色的秀髮在月光下閃閃生輝，紅色的裙袍像羽翼般隨著舞步飄盪．．．我慢慢走近．．．她看著我．．．那藍色有如水晶般透徹的眼睛深情地看著我．．．她停下了舞步，慢慢走過來．．．
她流著淚說：「．．．主人．．．．．．我聽到你嘅呼喚．．．」
「伊語．．．！」我不敢相信眼前所見
伊語緊緊捉著我的手：「．．．依一年．．．我無忘記主人你．．．我每晚都望住戒指，向月亮祈求．．．希望可以返嚟主人身邊．．．估唔到．．．．．．夢想終於成真！」
「我好掛住妳．．．」我哭著說
「我地終於可以．．．永遠喺埋一齊啦！」伊語用力抱緊著我
在星空下，我們終於找到了對方。雖然我們沒有經歷緊張刺激或偉大轟烈的故事。但是我們的愛，不會比任何浪漫的傳說少。我們情深地擁吻著．．．心中沒有任何保留．．．只有單純真摰的一份愛．．．這一個奇蹟，並不需要因由，也不需要解釋．．．．．．因為，愛讓我們找到對方。
《曾經有一個傳說，真心相愛的精靈，就算相隔多遠，都可以因為愛而找到對方。》