女神從Online Game走出來了: 14 魔法師也工作

今天是伊語第一天上班，雖然我不太清楚Apple為甚麼有這個決定，但沒有關係，伊語喜歡就好。
 
然後我又再拿出月卡看看．．．伊語真的會消失嗎？還是甚麼都不會發生．．．？
 
 
伊語十分緊張：「主人，我有無啲咩要準備．．．？」
 
「無咩特別要準備嘅．．．返工啫．．．」我喝著伊語剛學會沖的咖啡
 
「好緊張呀．．．好唔好換返蝗族殺手裝？我啲魔法力量會勁啲．．．」伊語把自己的衣服都拿出來了．．．




 
「唔駛啦．．．又唔係打副本．．．」我真的很佩服伊語做任何事都這麼認真
 
 
因為昨天工作到晚上，所以今天下午才上班。
 
 
「我第一次唔駛變細嚟依度咋．．．」伊語依然很緊張
 
寶妮迎接我們：「Hello！妳就係伊語啦！多多指教！」伊語也很自然向她揮手




 
我向伊語介紹：「佢係寶妮，Apple個秘書。」
 
伊語頓時嚇了一嚇：「原來係秘書大人！妳好！」然後向寶妮敬禮
 
「秘．．．秘書大人！？」寶妮也被嚇著了
 
「點解係大人呀？」我也不感不解
 
「秘法術書士官係我地魔法師嘅其中一個職業領袖，我頭先真係失禮．．．」伊語不好意思說




 
寶妮皺眉對我說「你朋友同你真係好夾．．．」
 
「．．．嗯。」我都沒氣解釋了
 
這時，Apple在自己的辦公室探頭說：「你地返嚟啦？入一入嚟我Office啦。」
 
「Apple姐。」我們走進Apple的辦公室
 
「伊語，歡迎妳嚟。」Apple微笑說
 
「．．．係！」伊語還是有點緊張
 
「我都單刀直入啦，其實請伊語入嚟公司做嘢，純粹係因為流主你。」Apple說
 




「我？唔．．．唔明．．．」我說，難道Apple知道了甚麼．．．？
 
「你都係時候交代下真相啦，放心我會守秘密。」Apple說
 
「咩．．．咩真相？」我裝傻
 
Apple凝重地說：「伊語究竟係咩人？金髮藍眼尖耳唔講，但係可以縮細，憑空變冰變火．．．好明顯唔係一個普通人。你都係成件事原原本本交代清楚啦。」
 
「．．．唔係咁重要啫．．．而且都唔關妳事．．．」我說
 
「我由你細細個睇到你大，我唔想你誤入歧途行差踏錯。我睇得出伊語本性善良，但我一定要知道清楚。我應承得你阿媽要好好睇住你，我就唔可以比你有事。」Apple說
 
「．．．妳放心啦，伊語唔會傷害我．．．」我說
 
「咁你就話我知咩事。」Apple說




 
「．．．．．．伊語唔係人類．．．」我說
 
「睇得出，你繼續講啦。」Apple說
 
 
我把事情一五一十和盤托出，除了月卡期限的事，因為我還不想讓伊語知道．．．
 
 
Apple大感驚訝：「竟然會有啲咁嘅事．．．」她續說：「不過都好，我仲以為你比鬼迷．．．咁宜家我放心啦，而且所有嘢都講得通。你屋企知唔知依件事？」
 
我無奈說：「妳竟然以為佢係鬼．．．．．．佢地有見過伊語，不過我只係話佢係我上網識嘅朋友．．．」
 
「我唔會同佢地講，不過我希望你會同佢地講。」Apple說
 




「唔．．．我識處理架啦。」我還要再考慮一下
 
「仲有，依件事我知好啦，費事公司多是非。」Apple叮囑說
 
 
我回到自己的坐位工作，伊語也一直坐在我身邊。
 
唉．．．我真的不知道要不要讓家人知道伊語的事．．．再過十數天，伊語可能便會消失．．．而且這麼複雜的關係．．．唉．．．如果伊語不會消失．．．唉．．．如果．．．如果如果如果．．．
 
 
「主人！」伊語突然挨近說
 
「哇！做咩嘢！？」嚇死我了
 
伊語說：「我叫左主人好多聲啦．．．」




 
「係咩？對唔住．．．我諗緊嘢．．．」我說
 
「主人可唔可以教我用電腦呀？」伊語問
 
「啊？當然可以．．．但係做咩突然有興趣學嘅．．．？」我問
 
「我識左，咪可以幫你手囉！」伊語說
 
「好係好．．．但係突然間我都唔知點教妳．．．我買書比妳睇可能仲快．．．」我說
 
「唔．．．咁有無第二啲嘢我可以幫手架？」伊語問
 
「無喎．．．哼哼，我好做得嘢架！我地高登仔係可以多專多能！所以唔需要幫手！」我說
 
「高登仔？多專多能？」伊語對不知道的事物都感到十分好奇
 
「．．．點解釋呢．．．解左多專多能先啦，意思就係我地識好多嘢，騎士嘅技能又識，獵人嘅技能又識，牧師嘅技能都識．．．大概係咁嘅意思．．．」我說
 
「好叻呀！！原來主人識咁多嘢架！咁高登仔呢？」伊語用充滿期待的眼神看著我
 
「高登仔係一個稱號，係一種榮耀。當一個人達到任何嘢都覺得唔難嘅時候，就可以得到依個稱號．．．」我說
 
「主人好叻呀！如果我都有咁叻就好啦。」伊語說
 
 
我相信世上只有伊語一個會這麼想．．．尋常女子聽到我剛才所說，都只會笑而不語，繼而消失．．．伊語這樣看得起我，我反而有點慚愧了．．．
 
當晚我跟伊語到書店買了很多書，既然伊語可以過目不忘，那就更要讓她吸收更多。除了電腦書，我也買了一些手工藝的書，像是織頸巾等等．．．甚麼啊？我只是想她學習更多的事情而已．．．
 
 
「放工沖返個涼真係好爽．．．」洗完澡的我說
 
「主人，飲杯藥草茶先啦，會好瞓啲架。」伊語遞給我一杯茶
 
「點呀，電腦好唔好玩呀？識唔識用呀？」我問一邊看教學一邊用電腦的伊語
 
「好玩呀，而且都唔難用！」伊語笑著說
 
「宜家識整啲咩呀？」我說
 
伊語笑著解釋：「啱啱學識點樣格式化同重裝Window囉！宜家部機快返好多啦！」
 
 
她的說話就像一下致命重擊！我頓時有想吐血的感覺！我搶去Mouse，搜尋自己的珍藏品．．．．．．果然！！！甚麼都沒有了！！接近2T的珍藏呀！！
 
 
「．．．係咪我整錯左啲咩．．．？」伊語看到我的樣子，也擔心起來了
 
「．．．算啦．．．無嘢．．．」看著伊語的樣子我也氣不下去．．．