女神從Online Game走出來了: 11 宿敵
那天我最終都沒有吻下去．．．我應該冷靜想清楚，我只是因為伊語的外表而喜歡她，因為我認為她不會拒絕而向她表白．．．並不是真心的愛慕．．．而且最重要是．．．她早晚會離開的．．．
然而，意想不到，伊語看來並沒有甚麼不同．．．沒有表現得尷尬，也沒有甚麼奇怪的舉動．．．反而是我自己在婆婆媽媽的．．．看著她在閱讀烹飪書，我不禁疑問她的烹飪技術怎麼會進步得如此神速？
「伊語呀，點解妳煮嘢突然叻左咁多嘅？」我問
「因為主人買烹飪書比我睇囉。」伊語說
「有書睇就煮得叻架啦？」我有點驚訝
伊語有點愕然：「唔係嘅咩？？我不嬲都係睇左就識．．．」
「真係好．．．」這可是跟遊戲裡一樣啊．．．教人羨慕
自從伊語學會了現實世界的烹飪，有時間買菜的話我們都會在家吃飯。而難得今天是週日，我們當然要去買菜了！我們坐言起行，立即出發去街市。
「主人今晚想食咩呀？本書我差唔多睇晒啦。」伊語問
「妳話事啦，我食咩都得。」我說
不過這時，伊語突然戒備著：「．．．好似有啲唔妥．．．依種感覺．．．」
「唔妥？咩事呀？？」我也緊張起來了
「受死啦！」突然，一個穿著銀色裝甲的男人從後用大劍砍向我們！我和伊語嚇得立即向一邊跳開，十分狼狽！
伊語回頭一看，驚訝說道：「你．．．你係韋迪亞！？」
我也萬分驚訝：「韋迪亞！？阿立個人類狂戰士！？」
「同我決一勝負啦！」韋迪亞對伊語發出挑戰！
伊語問：「點解你都嚟左嘅？」
「我都唔知，不過唔係重點！」韋迪亞舉起大劍指著伊語：「同我決一勝負啦！！」
伊語卻無奈說：「喺奢華大地你又係掛住打．．．嚟到依度你都仲係咁．．．我係唔會同你打架！」
這麼說，阿立的確經常要我跟他PVP，但是我不太喜歡PVP，所以一直都拒絕他．．．
「講多無謂！」韋迪亞沒有理會伊語是否接受挑戰便猛地向她衝過去
「咪住！」我上前喝止韋迪亞
「你係邊個？」韋迪亞問
「我．．．我係伊語嘅主人，你主人呢？」我問
「哼！我自己就係主人！」韋迪亞繼續進攻
「咪住！！」我再喝止他
「你又想點？」韋迪亞怒視著我
「呃．．．阿立呢？你點解可以自己行動嘅？」我問
「我唔知道你講嘅人係邊個！我一向都係自己行動，我淨係知道要戰鬥！」韋迪亞又再進攻
「咪住！！！」我再三喝止他
「你去死啦！」韋迪亞突然轉向，一拳把我打飛數米之外！
「主人！！！．．．韋迪亞！我唔會放過你架！！」伊語手中冒出火焰
「哼！戰吧！」韋迪亞向她衝過去
伊語的火球還未成形，韋迪亞已經跑到她的面前，更用劍柄使勁打向伊語腹部，阻礙她詠唱咒語，中斷了她的魔法！此情此景，就完全跟遊戲中的戰鬥一樣！伊語後退數步，便再次使用火焰球！韋迪亞立即向她猛力衝擊，把她撞倒在地上！
「哼！果然係我比妳強！」韋迪亞舉起大劍想了結伊語！
「伊語！變化術！！」我大叫
伊語立即向韋迪亞使出變化術！一道強光像閃光燈般閃了一下，韋迪亞立即變成一隻青蛙了！
「走啦！！」我立即捉住伊語離開現場，四周的途人像看馬戲般歡呼拍掌．．．
伊語喘著氣說：「好彩有主人提我咋．．．」
「妳真係．．．火焰球要成六秒成形．．．妳點會無配合咁用架．．．」我說
「我都唔知．．．我完全反應唔到．．．」伊語說
「妳完成左蝗族抵抗任務嗰喎．．．」我無奈說
「．．．因為係主人控制．．．」伊語扁著嘴巴說．．．
不過，韋迪亞真的很厲害．．．招式有根據而且時機準確，為甚麼呢？難道有人在背後操縱他？但是他說他不認識阿立．．．會不會是性格影響？伊語是天然呆，所以戰鬥反應不夠？但是，性格又是怎樣形成呢．．．？
「竟然真係走左出嚟．．．」阿立在電話裡驚訝說
「既然你無指揮佢．．．咁即係佢本身真係咁勁．．．」我說
「．．．但係你話伊語就同佢完全相反，咩都要你帶住？」阿立問
「係呀．．．估唔到每個遊戲人物都有佢自己嘅性格．．．」我驚嘆
阿立說：「伊語鍾意學嘢、對任何人都好好、有禮貌、鍾意訓覺．．．韋迪亞就淨係鍾意戰鬥．．．」
「咩都唔學淨係鍾意PVP依樣嘢真係似晒你嘅作風．．．」說著說著，我忽然想通了：「咪住．．．唔通．．．伊語嘅性格就係我嘅打機習慣培養出嚟？鍾意做任務、鍾意幫其他人、鍾意學技能．．．」
阿立說：「咁韋迪亞係都要搵你地決鬥係因為我鍾意PVP？但係．．．佢自己都識得戰鬥依樣嘢呢？」
「我知啦．．．因為喺佢嚟依度之前嗰段時間你都係開外掛．．．所以佢宜家都好似開左外掛咁，你唔叫佢佢都識點樣出招攻擊．．．」我說
沒想到會在這種情況下遇上阿立的角色韋迪亞．．．而且他看來好像想殺了伊語．．．伊語的戰鬥力也明顯及不上他．．．如果他再出現，我真的不知道要怎樣保護伊語．．．
「主人，我沖完涼啦。」伊語抱著毛巾僅遮掩著小孩子不可以看的地方便走出來
我頓時感到彷彿中了持續減血的攻擊「．．．妳做咩唔著衫？」
「唔記得拎衫．．．」伊語伸出舌頭傻笑，然後便跑向拿衣服
先說明，我沒有大部份男玩家都有的那種喜歡赤裸著自己的女角色的壞習慣。