女神從Online Game走出來了: 06 縮小法術
「主人，起身啦！」這是伊語的聲音
「．．．啊？做咩呀？」我朦朧醒過來
「起身返工啦！」伊語坐在床邊溫柔地說
「吓？？幾點呀？？」我嚇得立即坐起來
「七點半咋，我煮好左早餐比你啦！」伊語很高興的樣子
可是，我一聽到她說煮了早餐，便嚇得頓即整個人清醒過來！我的廚房難道又再出事了？？
我立即爬起來跑到廚房，怎料．．．卻乾淨得很．．．
「你刷牙先啦。」伊語笑著說
算了，我也乖乖刷牙吧。經過昨天的事，我想把伊語獨自留在家中還是有點危險，而且她也會很無聊吧？倒不如讓她跟著我，見識多一點，過些日子可以讓她自己外出．．．
我梳洗完畢，走到飯桌前一看，桌上的竟然是煙肉炒蛋茄汁豆果醬焗麵包還有一杯咖啡！？
「我阿媽嚟過咩？？」我大為緊張
伊語高興地笑說：「嘻．．．我整架！」
「竟然．．．？」我不能相信，昨天還搞得一團糟．．．
「快啲坐低食啦。」伊語把我按在椅子上
既然如此，我就老食不客氣了．．．
這．．．這味道！？實在太美味了！！要如何烹調才可以把煙肉的味道發揮得如此淋漓盡致？除了那陣讓人垂涎的煙香味，它的口感既不會太乾、又不會油膩，而且還是軟中帶脆！我接著拿起那個看似只是伴碟的烘麵包慢慢放入口中，才知道原來它也同樣不容忽視！每一口的咀嚼，都能吃到爽脆而又不會太焦的味道，烘焙的香味與鬆脆爽口的感覺，在口腔中互相衝擊，締造出天衣無縫的充實感覺！這個黃金色的炒蛋更是驚為天上之神物！不會炒得太鬆散同時又香滑可口，每一口都吃得出雞蛋和牛奶互相纏綿的浪漫味道，充分滿足了炒蛋應有但卻被世俗所忽略的嚴苛要求．．．這．．．實在是太幸福了！！！！！！
「主人你做咩喊呀！？」伊語十分緊張
「太．．．太好食啦．．．」真的好吃得想哭
伊語聞言，竟然也哭了起來：「咁就好啦．．．」
「咦？做咩妳又喊嘅？我無呃妳呀，真係好好食呀！」我慌忙說
「嗚．．．咁就好啦．．．我怕自己又累事．．．」伊語哭著說
「痴線．．．妳點會累事．．．有妳喺度．．．我輕鬆唔少呀。」我說
「真．．．真嘅？」伊語看著我說
「緊係啦。」的確，雖然伊語有點天然呆，但是跟她相處，我都感到很快樂。
「太好啦！！」伊語開心得跳過來抱著我
我慢慢推開她說：「好啦好啦．．．今日我想伊語妳跟埋我去返工。」
伊語立即興奮起來：「咦？點解嘅？可以咩？真係嘅？」
「嗯，不過，唔係就咁跟我去，妳要用縮小法術，秘密咁跟住我。」我說
「好呀好呀，好似好好玩呀！」伊語很高興
如計劃般，伊語縮小並躲到我的口袋。我如常地回到公司，可能是因為今天的早餐太美味了，使我今天容光煥發，神采飛揚。
「喂，流主，早晨呀！」阿健打招呼說
「早晨！」我揚手回應
「哇！你做咩今日好似有道光圍住咁嘅！？你平時係負能量反應堆嚟個喎！！」阿健也察覺我的不同了
我昂首挺胸笑言：「哈哈哈，今日嘅我已經唔同往日啦！」
「係就最好啦，入嚟開會啦。」Apple從她的辦公室走出來說
「今日要講下下星期嘅Event，尋日都講過下啦，個客已經簽左約，依單Cosplay Event會全權由我地負責。只有大會主席同主持人等會用返佢地請嘅人，其他工作人員，器材同佈置都係我地負責架啦。．．．咁宜家分配返位置，同之前一樣啦，佈置工程交晒比康師傅你負責，工作人員都係由寶妮搵人，流主同阿健做點數同雜務，求撚奇陣間車我同康師傅去會場。」Apple說
開會完畢，我又回到自己的座位。每一次有新項目，我也是蛇頭虎尾。就是一開始很蛇，因為連場地都沒準備好，我根本不可能開始器材準備的工作。但是，一旦佈置完成，我的工作便開始多了，如果我們的裝修部康師傅順利的話，我還有足夠時間準備。但是，如果好像上一次般，只剩下了兩天給我準備，結果就是OT了．．．所以我才說這個位置是蛇頭「苦」尾．．．
「主人．．．？」伊語突然說話，對啊，我都差點忘記她了．．．
「做．．．做咩呀？」我小聲說
「我出唔出得嚟呀．．．？定今日全日都要匿喺度．．．？」伊語稍稍問
是啊．．．如果我不讓她出來．．．那跟我來上班的意義是甚麼啊．．．
「嗱．．．妳出嚟，但係淨係可以喺我張枱上面．．．唔比行開，知唔知？」我說著，並讓她爬到我的枱上：「仲有唔好比人發現呀．．．」
伊語四周張望：「哇．．．依度就係主人做嘢嘅地方啦？．．．好大呀．．．大過主人屋企好多呀！」
我不屑說：「咁係因為妳變細左啫．．．雖然我間屋的確係細過公司．．．」
「咁主人今日有咩要做呀？」伊語好奇問
「．．．其實無咩嘢做．．．打下文件囉．．．」雖然這麼說，但其實那些文件是不甚重要的
「咁我唔阻你啦，我坐埋一邊睇書就得啦。」伊語閱讀著在家拿出來的烹飪書
既然如此，我也只好找些文件工作做吧．．．．．．然後，不知不覺又到了午飯時間。
「喂，流主，食飯啦！」阿健走過來說
「吓．．．啊，好呀．．．」說罷，我忽然想起，我總不可能帶著伊語跟大家一起吃飯吧．．．「．．．咪住，都係唔啦，我叫外賣得啦。」
「你好多嘢做咩．．．？依個時間你應該係蛇緊個喎．．．」阿健問
「其實就正如我今朝所講啦，我已經唔同往日架啦。」我造作地開玩笑
「哈．．．咁你鍾意啦，唔迫你啦。」阿健說著便走了
躲在文件後面的伊語走出來說：「咁．．．我地食咩呀？」
「叫外賣啦．．．你想食咩呀？」我說著並拿出外賣菜單
「唔．．．主人話事啦。」伊語選擇不了
於是我隨便點了兩個炒即食麵，果然，外賣的速度非凡，很快便有得吃了。
「有得食啦！」我打開飯盒說
伊語愣了一愣問：「咁．．．我要變返大．．．？」
我如夢初醒：「係喎．．．唔變大又食唔到．．．但係如果食食下佢地返嚟咪斷正．．．」
我想了又想，最終決定走到後樓梯．．．坐在樓梯上吃。
「好好食呀！」伊語一如平常，甚麼都覺得好吃
「普通啦，食過妳煮嘅早餐，我已經覺得無嘢係好食．．．」我說
伊語聞言十分高興：「主人鍾意就好啦，我以後每日都煮比主人食！」
我們一邊說笑一邊吃，看到伊語的笑容，總覺得幸好今天帶她出來。
「主人，你食到成嘴係啦。」伊語拿出紙巾替我抹嘴，不過我依然有點覺得不自然．．．
豈料，Apple竟然在這時突然出現：「咦？流主你喺度呀？唔出去食．．．」
「吓．．．」我一時間反應不來．．．要穿幫了！
Apple一臉疑惑看著伊語：「依位係？」
「佢．．．佢係我朋友嚟嘅．．．」我說
「你朋友係外國人嚟架？」Apple問
「係呀．．．佢係伊語．．．呀，伊語，依個係我上司，Apple姐。」我唯有替她們介紹
「妳好．．．」伊語用一個非常優美的動作打招呼．．．那是精靈族打招呼的動作！
Apple嚇了一跳：「哇．．．唔使咁客氣．．．妳好妳好．．．啊，流主，我返入去先，食完嘢入一入嚟我office。」
「無問題．．．」我說
「妳地慢慢食。」Apple對伊語笑著說便離開了
我看著Apple完全離開了，才鬆一口氣．．．
「好彩無咩事．．．」嚇壞我了
「Apple姐睇落好好人呀！」伊語說
「佢係幾好人嘅．．．」我說
我們吃完飯，伊語又變回小型伊語並躲進我的口袋。我回到寫字樓便直接到Apple的辦公室。
我推門進去問：「Apple姐？搵我有事？」
「係呀，康師傅貨倉嗰邊有啲材料就快用完，想你訂定貨，最好依兩日落訂，比張單我入數。」Apple說
「無問題。」我說著並轉身打算離開
Apple這時突然說：「星期五嗰日你就係因為頭先個女仔所以請假呢？」這句話就像一下爆擊的背刺！幾乎秒殺了我！！
「吓．．．」我不懂回答
「流主，其實有咩嘢下次可以直接講，你知我錫你架。我同你阿媽咁熟，由細睇住你大，都算係你阿姨，有咩我會睇住你嘅。何況宜家你終於搵到個女朋友，仲要咁靚，唔需要收埋呀，我不知幾登你開心。」Apple笑著說
「呀．．．伊語唔係我女朋友．．．不過．．．總之我會好好交代啦。」我不知道該如何解釋
然後，Apple沒有再追問下去．．．有驚無險地又過了一天．．．明天還要不要帶伊語上班呢．．．？