我的死鬼老婆: 第二十二節

嚴國旋走來了我的身邊，雙手捉著我的臉頰說：「程若珍因為救你先至搞成咁！」
 
「我？」我呆了，腦袋不能久運作，我還感到一點點暈眩，如果若珍灰飛煙滅是因為我，那麼即是說生前我不能好好的守護若珍，死後還要害到永不超生，我究竟是什麼人？掃把星或是天煞孤星？竟然害得自己身邊的人一個一個的離自己而去。
 
我推開嚴國旋的手並指著他破口大罵：「點解！點解會咁！你一定係神棍，你唔識野先亂咁講！」
 
「你冷靜啲先啦！你咁激動我地幫唔到你架」天佑和司徒月走到我的身邊並不停的安慰著我。
 
我的思緒很亂，太多太多不幸的事在這兩天內發生，也許是人生的經驗未夠，我知道自己剛才對於一個想幫自己的人破口大駡感到不好意思，冷靜過來後，我對著嚴國旋說：「唔好意思，旋哥，之前我太激動啦，希望你唔好介意。」
 




「唔緊要啦，我明白一時間你真係接受唔到，我唔會怪你。」嚴國旋說。
 
「旋哥，咁我地仲有其他方法做到？」司徒月說。
 
嚴國旋思索了片刻說：「天佑，你嗰部接通了來自陰間的電話仲用唔用到？可唔可以打俾孟婆橋既鬼差問下佢究竟程若珍有冇落過去陰間報到？」
 
「唔得架旋哥，你應該知道一向都係陰間既人打俾我，我打唔到俾陰間既人架。」天佑一臉無奈的說。
 
對於他們的對話，我完全不能明白。接通了來自陰間的電話，這種事真的有可能發生嗎？
 




「旋哥，定係我地而家召喚阿健既魂魄上黎先？至少我地咁樣可以問到兇手究竟係邊一個，好彩既話可能有機會知道程若珍既魂魄點解會搞成咁……」司徒月說。
 
「都可以，咁我地而家再入去試下召喚阿健既魂魄啦！」嚴國旋說完便往之前的房間走去。
 
和之前一樣，我把阿健的出生日期和死亡時間告嚴國旋之後，他便開始施法，他一直說著一大堆我聽不懂的說話，由於之前已看過召喚魂魄的程序，今次我沒有太多的恐懼，我反而有點期望今次的召喚可以成功，好讓自己再確認一下嚴國旋這個人是否神棍。
 
房間內紅色的蠟燭燈光開始搖曳，我想召魂的程序應該差不多完成。
 
「佢到左啦！」嚴國旋說。
 




我感到周遭的氣溫突然之間下降，那種由身體內部往外的寒氣，我還是第一次感受到。
 
「阿健，係咪你呀？」我說。
 
「係呀，揾我上黎咩事呀？」阿健（嚴國旋）說。
 
為了試探一下真偽，我決定問一些只有我和阿健才知道的問題：「阿健，你仲記唔記得我地第一次去旅行係邊到呀？」
 
「我當然記得啦，係去馬來西亞，我地仲響賭場贏錢……..不過我地冇機會再去啦，仲有，我想多謝你同你朋友，好在有你地，我先至可以同我老豆講再見咋，唔係我都唔可以安心咁落去報到。」
 
我阿健（嚴國旋）的回答之後，我知道阿健的鬼魂終於來到了我的面前。
 
「阿健，我今次搵你係想幫你同若珍報仇架，你知唔知邊個襲擊你？如果你知就話俾我知啦，我一定拉到個兇手架！」
 
阿健（嚴國旋）聽到了我的提問後，沉靜了一會，我感覺到阿健或許有一些難言之隱。




 
「你講啦阿健，唔駛怕架！我一定會幫你，我唔會俾你死得不明不白架！」
 
「阿曦，唔好再問或者再查落去啦，再係咁只會令到自己辛苦架咋！」阿健（嚴國旋）說。
 
「你唔講我咪仲痛苦？我想幫又幫唔到你地，仲要眼白白咁睇住你同若珍離我而去，阿俊又昏迷不醒，我如果搵唔到兇手出黎，你估我可以放得低咩？你只要講俾我知究竟係邊個害你，或者你死之前見到啲咩就得架啦！」
 
「阿俊而家昏迷不醒？醫生有冇講到佢幾時會醒呀？」
 
「冇講到，可能一陣間就會醒，又或者可能永遠都唔會醒………」說著說著，我再一次流下淚來。
 
「………..」阿健（嚴國旋）沉默了一會說：「阿曦，你係我既好兄弟，接落黎我會講俾你知我生前究竟發生咩事。」