我的死鬼老婆: 第十六節
我交帶了一聲給安慰健爸的護士一聲之後，便往停屍間的方向跑過去。
「吓！吓！」可以說，這是我生平裡面跑得最快的一次。
我用盡全身的力氣狂奔往停屍間，想起健爸的哭相，和阿健生前的一些往事，我知道現在的我只能做的就是盡快找到司徒月，希望靠他的陰陽眼或與靈界接觸的能力，讓阿健和健爸有一個道別的機會。
「嘭！」我用力推開了停屍間的門。
「吓！吓！」我喘著氣，只見司徒月坐在一角悠然自得的在玩著手中的「神抄之塔」。
「咁快就黎搵我啦？」司徒月說。
「係呀，吓！吓！我想問下你係咪有陰陽眼，可以見到鬼魂架？」
「緊係啦，唔係我之前點會見到你老婆企響你後面呀。」司徒月還是不停的玩弄著自己的手機。
「咁啱啦！」我一手拉著司徒月的手離開停屍間，並往急症室跑去。
「喂！無拿拿拉我走做咩呀？」我沒有理會司徒月的追問，只是拉著他不停的跑。
很快的，我們便跑到急症室，健爸已經冷靜下來，只見他就坐在阿健屍體的身邊，不停的用手輕撫著阿健的臉頰，雙眼不停的流著眼淚。
一個人死了，身邊的人到底有多痛？或者說最痛的人會是誰？男女朋友？好朋友？
錯了，一個人死了最痛的肯定是死者的父母。
他們親眼看著一個小生命的誕生，看著自己的子女由一個小孩長大成人，茁壯成長，當中的喜與悲，他們曾經經歷過的所有生活點滴，男女朋友或自己的先生太太又怎會感受到？
結婚可以離婚，拍拖可以分手，朋友可以絕交，可是父母絕對會對自己的子女不捨不棄。
「你帶我上黎做咩呀？我唔可以私自離開工作崗位架！」司徒月說。
我指著健爸：「你見唔見到嗰度有個老人家坐左響度喊緊？死左既人係我朋友，佢死前都見唔到自己阿爸最後一面，我希望你可以幫我。」
「幫？點幫呀？」
「你過去睇下見唔見我死左既朋友個鬼魂，你要做既就係好似一個傳聲筒咁轉述我死左既朋友既說話就得啦。」
「吓！？我見到鬼，但係我聽唔到佢地講咩架！」司徒月不停的揮著手拒絕。
「唔係掛………」
突然之間，健爸瘋了的推著阿健躺著的床往出口離去並大叫著說「我要同我個仔轉院！佢仲未死！你地呢啲黃綠醫生，我帶我個仔去私家醫院睇！」，其他護士見狀，立刻衝前想阻攔健爸，我還看到其中一個醫生手持著針筒，我想那大概是鎮定劑。
我立刻衝上去隔開健爸和護士。
「唔好意思，我知道佢為你地添左好多麻煩，不過可唔可以俾多小小時間我？我會令到佢冷靜返落黎！」我和著醫生護士說。
「我地明白，佢個仔過左身一時間接受唔到，不過再係咁落去，我地怕佢會有危險……」
「俾次機會我去處理！唔該！」說完，我便把阿健躺著的床推回原處。
「曦仔！你做咩阻住我？我要送健仔去私家醫院，我唔信佢咁易就死左去，嗚～～」
我把手放在健爸的肩膀上說：「世伯，阿健佢真係已經死左架啦………我知道你好傷心接受唔到，不過我有個朋友佢可以同靈界接觸，佢話可以幫到你同阿健溝通，但係你應承我一定要安靜，得唔得？」
「真既！？好！好！我應承你！」健爸說。
我揮手示意司徒月立刻往我的方向走過來。
司徒月進來後，我便立刻把四周的簾關上，只見健爸一直用冀待的眼神看著司徒月，我知道對於健爸來說，這個不能道別的遺憾現在終於有機會可以解脫，又那有不期待之理？
司徒月把我拉到一個角落輕聲的說：「我咪同你講左我只係見到，但係聽唔到鬼講咩既，你叫我入黎做咩呀？」
我輕聲的回應著：「我都唔知呀，見步行步啦！」
「曦仔，健仔響唔響到呀？」健爸心急的說。
司徒月望著阿健的屍體上方說：「佢響到呀！佢而家就企左響呢個位咋！」
健爸再一次流下男兒淚，並哭著說：「嗚～～真定假架！你地有冇呃我呀？」
司徒月走向健爸的身邊，並用掌背拍了健爸的心口數下後說：「你個仔話只要做呢個動作，你就一定知道佢而家響道。」
「係呀！係呀！我地兩父子每一次鼓勵大家既時候，都會做呢個動作架！仲有呢，仲有我個仔講咩呀！」健爸緊張地說。
司徒月說：「佢叫你地唔好難過，每個人都會死，佢只係行先一步，你地一定要開開心心咁生存落去，等佢可以安心咁去投胎。」
「係呀！係呀！健仔份人就係咁樂觀架啦！嗚～～」健爸說。
「阿爸，多謝你地既養育之恩，我呢世人都唔會忘記，唔好咁傷心，有咩事就搵曦仔啦，佢係我既好兄弟，佢一定會幫手架！阿爸，我要走啦！其實我地大家都要開心先係，唔係所有人死左之後都仲可以毫無遺憾咁作出道別，我真係可以安心咁去啦。」
「健仔，你放心，我地會照顧自己架啦！你安心咁去啦，記住搵處好人家去投胎呀！」健爸哭著說。
「知道啦！阿爸，我愛你同阿媽，我真係好開心今世可以同你地結緣，仲有阿曦，我阿爸阿媽就要麻煩你幫手睇住啦，希望你都可以快啲搵到殺若珍既兇手，你放心，我會保佑你地。」
不知怎的，感覺就像是真的在和阿健對話似的，眼淚不受控的在流，真也好，假也好，我哭著的回應說：「再見啦！健仔！你阿爸阿媽我會幫手照顧，你放心啦………」
「拍！」突然之間，司徒月像失去知覺一樣，暈倒在地。是真還是假？司徒月不是說他不能聽到鬼魂的聲音嗎？但是為什麼剛才他說話的口吻和阿健那麼相似？而他現在這一下暈倒的動作，是假扮的嗎？
我立刻走上前把司徒月扶回座位上，他雙眼微微張開，全身乏力的說：「鬼……鬼上身呀………」
說完後，司徒月再一次昏倒過去。
<< 結婚可以離婚，拍拖可以分手，朋友可以絕交，可是父母絕對會對自己的子女不捨不棄。>>