我的死鬼老婆: 第十三節
救護車很快便到達醫院，救護員以極快的速度把阿健和阿俊送往急症室。
「先生，麻煩你響度等，佢地進行急救，你唔可以入去。」一位醫院的護士說。
「明白，唔好意思。」
「你係傷者既家人？」
「唔係，我係佢地既朋友，我陪佢地黎架。」
「咁你不如幫手通知佢地既家人黎辦理手續啦。」
「好，我知架啦。」說完我便拿著手提電話急步的離開醫院範圍。
要怎樣通知他們的家人？
我坐在醫院外的長椅上思考了片刻，在想應該用惋轉還是直接的方法去告訴他們的父母？萬一他們的父母接受不了而暈倒那怎麼辦？
我很怕那種感覺，只要一想起別人失望和哭泣的聲音，我便感到一種無形的壓力。
在我還在躊躇著的同時，一把熟悉的聲音在我身後說：「仲等呀？如果佢地真係有咩事既話，而佢地既屋企人又趕唔到黎見佢地最後一面，你咁樣做會好折墮架。」
我背身看一看背後的人是誰，原來是司徒月。
「係你？司徒月！」我說。
「估唔到你咁快會知道我叫咩名，哈哈！」司徒月說。
「你點解會響度？」
「我？哈哈，我今日返夜班呀，而家入去返工架啦.........咪住！你老婆呢？」
「佢........佢唔係好似你所講，我太太就響我身邊咩？」我有點驚慌地說。
「唔係喎，我唔見佢喎！」司徒月走到我的身邊在上下打量著。
我不明所以，只好乖乖的站著。
「不過唔緊要啦，啲人都當我痴線既，冇野啦，我唔同你傾，我返工啦。」司徒月突然之間便轉身離開。
我於是立刻跑到他的前面，張開雙手並說：「唔係呀，我信你呀！我真係感覺到我太太就響我身邊咋！」
司徒月嘴角揚起，笑了一聲說：「睇黎大家都啱Channel，你打電話先啦，之後你如果有時間就去停屍間搵我啦！」，說完司徒月便往醫院的方向行過去。
司徒月說得對，如果真的因為我怕事而讓他們錯失了最後相處機會的話，那種遺憾我又如何擔當得了？只要一想起自己在若珍離去的時候還未能好好道別，就可以想到那種痛會去到那一種程度。
我思考了片刻，終於想起了他們家裡的電話號碼。
這刻，我感覺到時光的飛逝，也確切感受到原來這一個2字頭的固網電話號碼是我們友情和成長的印記，我唏噓的笑了一下，原來除了他們，父母和若珍的電話號碼之外，對於其他人我的腦裡只是一片空白。
我按下了他們的電話，並逐一聯絡他們的父母。
<< 真摰的友情，隨著時光的飛逝，還剩下多少？>>