【歷史書上既三國你都好信既!】: 第三章

「啪!啪!」



張宇軒係模糊間感覺到比人狠狠地摑左兩巴，張口就叫:「邊個!?邊條仆街打鳩我!?」佢想還拖，但係右手竟然動彈不得，就好似有條麻繩纏住咁。張宇軒猛然睜開雙眼，只見到自己身處係一個白色既圓形帳篷中，正比人吊住係個木制既十字架上邊，雙手雙腳就的而且確比條麻繩束縛住。係佢既左手邊有一個身形剽悍既男人正奄奄一息地喘氣，而右手邊既男人就比人鞭打緊，不過佢好似一啲都唔CARE咁，頭耷耷，可能已經死Q左。遠少少，近帳幕口既地方就放滿左一堆盔甲，實實在在既槍，白光颼颼既劍，沾上紅色液體既刀。
 
「醒啦!做俘虜做到你咁他條，黎避暑呀!?」張宇軒既正前方有一個著住厚重盔甲既男人係到奸笑。佢身上有把好長既配刀，好靚，不過同時都應該好致命。
 
「喂，等等!咩俘虜呀!? 」張宇軒見到如斯情境當堂嚇到眼都突埋，好似細路咁大叫起上黎。
 




「哼，唔使扮啦聯合軍既走狗!講!你係袁紹，曹操定係孫堅既人!? 」男人張口大喝，饒有威嚴。
 
咩料呀?又袁紹又曹操，玩真三咩?張宇軒心中既恐懼開始比一種叫奇怪既感覺慢慢取代。
 
「我…我…我係…」張宇軒正想開口回答眼前呢條痴線佬既時候，忽然有一個同樣著住一套盔甲既人沖入帳篷中，打斷左佢既說話。來人跪低，運足中氣，大聲講道: 「聯合軍又返黎啦呂將軍! 」
 
個個叫呂將軍既男人一聽到呢消息，佢面色刷一聲變到白紙咁既慘白色! 「下!咁我義父點講呀?我使唔使出陣呀!? 其實呢，我岩先虎牢關一戰先帶過兵，其實都有啲攰，咁呢….」呂將軍搭住來人膊頭，竟然轉身一邊傾計一邊步出帳篷，而帳篷中既衛兵就你眼望我望，跟住將軍又走埋，結果，就掉低左張宇軒同另外兩個人。張宇軒思索左一陣，決定先唔理個班奇奇怪怪既人，向好似死左咁既個個人開口問下仲實際。
「呃，阿叔呀，我想問呢呢到係邊到?」
 
「嗄…呢到…呢到係董卓條老賊既汜水大本營…後生仔..你..咳…咳咳…」




 
董卓?又董卓?又係三國人物!?張宇軒腦中思念急速飛轉，一堆天馬行空既想法瞬間跳到佢既面前。唔係掛…唔會掛…唔撚係掛!!!「等陣!咁今年又係幾時!? 」
 
「今年咪獻帝初平元年囉….」個男人不解地講道。
 
係香港大學畢業既張宇軒見到個男人講得咁認真，又見到附近既擺設又咁古舊，再加埋佢個啲天馬行空既想法，另外同埋佢對中國歷史既認識….
 
「仆街!我唔係真係返撚左去三國下話!? 」