《玻色子遊戲》: 13

「四眼佬，四眼佬，聽唔聽到？」發叔手上嘅對講機傳來肥大叔嘅聲音。
「係度，咩事，係咪有發現呀？」
「係呀，係籃球場，你地快啲落黎啦。」肥大叔透過對講機催促發叔佢地返落去籃球場，似乎有重大發現。 

收到肥大叔嘅通知之後，發叔，小喬同呀泰就馬上走落籃球場。
「肥佬，有咩發現呀？」發叔問。
「你地去睇下你地一開始坐嗰張櫈，睇下櫈底係咪有個書包。」聽到肥大叔咁講，發叔佢就去搵返自己一開始坐嘅嗰張櫈。
「我坐嗰張係……」呀泰嘗試回憶返自己坐邊張櫈，「應該係呢張。」呀泰一彎低腰，果然見到櫈底有個書包。
「喂，有呀，有呀。」呀泰舉高書包，向其他人示意自己搵到。
「我都搵到呀。」發叔同小喬都表示搵到。




「你地打開睇下有咩。」肥大叔叫佢地打開書包。
小喬一打開書包……
「呀－－－－－－」小喬好大反應咁將書包丟走。
「做咩呀？有啲咩係入面？」肥大叔問。
「骷……骷……骷髏頭呀－－－－－」小喬好驚咁指住個書包。
「骷髏頭？」肥大叔走過去小喬嘅書包，打開檢查。