《男朋友話我太大食…》: 後記 + 真人真事?

後記 

終於寫完…最後一章你地可能會覺得太平淡，係好正常的，因為全故事最轉折最震撼既位係上一章已經出左…
係最後呢兩章我用左好多位去留白，尤其是最後一章，其實同我以前寫既故風格好似。
我諗，如果最後一章仲可以有d咩好震撼既發展，就太假太超現實了。成個故由頭到尾都依住我既意思同感覺去寫，一次都冇妥協過。
我知道唔會取悅到所有人，但係呢個結局我唔認為係爛尾，因為係我一寫個頭已經決定好既結局，希望你地都會明白。 
寫呢個故事，最初係想好好咁寫下女人對性既需要同渴求。我本來想令大家明白小游既內心世界，但越寫小游，就越多枝節，最後原諒我比唔到一個好結局佢。（有讀者講起我先留意到，係喎我對朱仔，阿弘，小游都好殘忍…）
我始終都係想寫一個好現實既愛情故事，但係又唔係葉念琛果種，雖然個尾可能有少少似，不過如果要再似ｄ葉大導，就應該係講阿弘由頭到尾都係一路偷食…其實如果再現實ｄ既話，小游係應該唔會有壞結局…

現實世界既小游，應該多數都係會搵到個好男人一齊，始終啊，雖然話女人就係原罪，大食既女人更加係罪大惡極，不過，係香港，係女人就唔驚冇伴呢個都係個事實。 我好慶幸呢個故事會吸引到咁多人睇，對我黎講簡直係神蹟一般。

呢幾個禮拜，我幾乎每15分鐘就望一次電話，睇下你地留言講左ｄ咩；訓訓下覺會醒左睇下個ｐｏｓｔ有冇沉…一開始甚至緊張到失眠同胃痛。
但你地既每一句支持，每一句話會買我書，或者話有感受有共鳴，同我講睇到喊…
對我黎講，真係好大好大既鼓舞。甚至有讀者係故以外既地方同我相認左，我呢種小黃豆都有人識啊！真係好感動。

呢一刻我最大既願望，就係有出版社願意比機會我，比我可以一圓夢想，以作家為職業。我真係好想可以係書局度見到大家。
我已經同左好多出版社投稿啦，不過未有回音咁姐。真係好多謝你地支持我，我既文字感染到人，令我覺得我既存在好有意義。
 或者呢個故既影響力唔會好大，但我都希望可以激起一片漣漪。比大家知道女人都有性需要，同埋女人同你講一句唔開心既時候，背後埋藏幾多千言萬語。或者你地一開始覺得個故好似會令人分手多ｄ，但係到最後，其實我係想你地反思一下對伴侶既睇法，同埋相處方式。

之前都有讀者講過，我係希望透過呢個故，話比你地聽係一段關係入面，溝通係幾咁重要。
如果有溝通，好多爭吵都唔會發生，唔會發酵。


我亦希望有ｓｈａｒｅ過呢個故比另一半睇既，你地既感情問題可以得到解決，或者出現少少轉機都好。 
我都諗緊下個故寫咩啊，你地覺得呢？始終唔想隔太耐先出，怕你地唔記得我！ 
最後，我希望你地個個都開開心心，早日搵到一個同自己又夾又鍾意既另一半；有另一半既就永遠幸福快樂！交是一定會嗌的，最重要係大家仲想一齊，仲願意搵方法踏過一個又一個難關！

多謝你地支持珀，我愛你地




有幾多係真人真事？　－　注意，如果想保留對故事既幻想最好唔好睇



小游：前半段既小游係照住五年前既我自己黎寫，不過放心，由朱仔出現開始已經係想像居多。
只有描寫小游有幾大食同埋同男朋友有性生活既問題果度係真係我黎。我既結局冇小游咁慘 

阿弘：真係前男友。不過都係果句，佢冇飛黎德國，所以德國之後都唔係真。不過同小游既生活同埋對話，好多都係真。

 一浩：其實我對佢了解唔多，佢係故事入面既性格同對話都係我自己諗。佢係故事入面既作用最主要就係比我用黎做伏筆

 叮叮：我既同房，不過現實中我既同房成個ＳＥＭ先返過黎兩次　所以可以當佢唔係真，不過佢既重要就係比機會我寫同小游諗法相反既野，始終用第一身黎寫，就需要好多其他人黎營造成個故事 

阿賢：佢真係一個住天水圍既仆街。冇重遇過，我諗佢依家都仲係咁仆街 

朱仔：名同樣係用真朱仔黎設計，但性格同行動就係另一個男仔。佢依家訓緊覺 

蝦蝦，大山，阿楊：假的　我當時去德國係去一年，而且只有同同科另一個男仔去 



學長：真有其事。佢真係send過自己d J圖比我…亦都真係冇理佢 

總結黎講，我會話真人真事大約佔四成…或者一半？因為好多人設我都係有真人做藍圖，但係之後既發展就係隨住我支筆去，所以我都唔識衡量。但係你地可以放心既係，現實入面呢ｄ人既結局，並冇好似我係故事入面寫既咁可憐…
另外我好贊成一開始有讀者講過，一個人有冇改過係要係佢再面對一樣既考驗果陣先知。

所以啊，我係咪小游？我係，亦都可以唔係。因為，我已經唔係小游好耐啦。