《搵唔到Exit既23層大廈》－驚嚇！香港都市詭異紀錄: 第五十話：《大堂的不祥之物》

 
      詭異有一個必要的元素，就是情況的絕對不合理。

      而Mktor的畫作，實在有不少部分跟詭異扯上了關係。首先，Mktor完全沒有在我們面前提及過這條路線的存在，不過先可以當作他現在就告訴我可以了。

      最令人匪夷所思的，是這條路線根本不存在。

      我再三地追問身為住客的Toby，差點兒忍不住失禮的搖晃她的雙肩，她則連苦笑的閒情也欠奉，神色凝重：「冇後備樓梯……呢棟大廈樓宇咁細，點會有兩條樓梯啊？」

      我不自覺的劇烈喘著氣，那激動來自熱情，同時也來自未知的不安感。





      真的有這一條路？

      或者只是Mktor剛好畫錯而已？

      不，第六靈感告訴我，這一系列的虛線是Mktor給我的最重要線索……

      「喵。」朗朗在漆黑的環境襯托下，顯得詭祕莫測。

      夜裏的貓，可愛逗人，卻可同時令人悚然。





      「不如搵佢地傾下啦……」我忍著腳痛，爬到了熟睡中的阿毛旁邊，猛烈推動著他，怎知他還是不醒人事。

      阿毛你這個大懶包……

      然而細心一想，大家也已經好久沒休養了。

      「不如……比佢地休息下先啦，遲少少我地再叫醒佢地？」Toby拿過我手上的電筒，照著A4白紙。

      「嗯……」





      聽說，黃光底下的女孩看起來是最溫柔迷人的。

      此刻的Toby亦然。儘管時機絕不適合，我還是無法自拔的滿臉通紅起來，幸好她無法察覺。

      現在，既然環境造就了一個與女孩獨處的機遇，我倒不如珍惜一下吧。

      於是我坐近了穿著牛仔短褲的短髮少女旁邊，兩個人靜默了半餉，朗朗「喵」了一聲竄到角落解悶。

      Toby的啡色分界短髮，在柔和的燈光下，看起來也停適合她的氣質……

      「其實宜家真係資訊爆棚……不如，我地歸納下我地既推測先。」Toby閉上雙眼，好像每一次認真思考也會有這個習慣。

      待我「嗯」一聲回應後，她便開始追索著記憶中的線索，同時注視著手上的白紙：「一，停水停電停網絡，王嬸來電都係為咗吸引我地去後樓梯……二，電梯既怪異運作方式既功能係點算人數，而火警鐘功能係吸引住客注意電梯……三，係呢個世界有傷口，血液會變做黑色，人會變得怪異，叫做……嗯，失常感染者。但係點解有D人口中會有洞，依然係未知之數。」





      我連連點頭，事實上把注意力都放在Toby脹鼓鼓的臉蛋上，直到她一臉呆然的盯著我，神情趣緻：「我……我塊面做咩？」

      我差點兒吐出一句「你塊面好索」，然而繃緊的嘴巴不聽話，我只是連番搖頭。

      「做咩咁搞笑架你哈哈。」Toby甜笑的模樣真的跟陳妍希如出一轍，「之後到第二part，就係我地要搵既Exit。」

      對，不要模糊焦點。我們生存到現在，最終目標是要找出逃離大廈魔掌的Exit。

      Toby一手端著白紙，一手高舉著電筒，甚是狼狽的樣子，我連忙拿過她的電筒，吞吞吐吐的道：「我……我幫你攞住。」

      「哈哈好啊，唔該曬。」Toby鼓起臉蛋，重新投入了思考，「暫時我地得出既推斷有以下既。一，地下大堂……二，天台……三，窗外……四，你個朋友……Mktor畫出嚟果條虛線……」

      不知怎麼的，我總是認為最後個可能性最大。可能源於那是Mktor遺下的線索吧……

      「首先呢，第一個，地下大堂，似乎被人封鎖咗，我地可以放棄呢個option。第二個，天台，未試過，不過可能性頗低，好似Mktor話齋，地下大堂同埋天台同樣係太正常既Exit……第三，窗外……呢個唔知道，可以再討論……第四直程唔知乜鬼嚟。」Toby向我扮了一個鬼臉，我只好以苦笑回應。





      「即係……我地宜家可以Focus係窗外同埋條虛線？」我心不在焉的凝視著Toby。

      Toby凝視著角落趴低的小貓：「我覺得係啊，大家休息完就可以討論下，大家加油啊。」

      「嗯……」

      「阿騰你做咩？你面色好似有D難睇？」

      我此刻可心水清，黑漆漆的環境下只有單調的電筒燈照射，又怎能看得到臉色呢？

      「冇野……」

      「放心啦，我地一定逃走到架！」Toby輕輕的搭著我的肩頭，我觸電般猛然一震，心跳加速。





      「嗯……」

      「阿騰其實你地中幾？定大學？」

      「我中六，阿毛都係，Ashley就……唔知。」

      「哦……咁我未要叫你阿哥，哈哈。」

      「嗯……」

      「做咩？」

      「點解……點解Toby你好似好樂觀咁既？」

      「樂觀？」





      「我成日都覺得，逃走根本就係冇咩可能。」我低下頭來，端詳著自己骯髒的雙手，「根本，好似Mktor咁講，我地就好似扯線木偶咁。」

      你與我終究只是渴求自由的扯線木偶……

      「哦……咁……」Toby鬆開了我肩膀的幼滑的右手，「唔會架，我相信神既旨意。」

      「神既……」話才說到一半，我便注意到她脖子上的銀色十字架頸項。

      儘管本身並非基督徒，然而聽到Toby的這一句，不知是否因為出自漂亮女生的嘴巴，總是感到了心靈被暖暖的融化了。

      「我大個好想做一個社工，我成日好想為每一個寂寞無奈既心靈提供援手。」Toby呆望著終於回到睡夢的朗朗，「我相信，神點都會為我地留下一條出路既。」

      我一言不發的與Toby對望著，尷尬一笑，心扉徹底被這女生的魅力給感染了。

      只要堅持到底，總會有曙光。

      世界上，總有那麼一種人，你覺得他們勇敢追尋所珍重的東西，是瘋子之為。

      那些人，心中總會有著一種信念。

      You may say I am a dreamer, but I am not the only one。

      「其實……有一點我係覺得好奇怪既，想講一講。」

      「嗯？」我直視再次鼓起臉蛋的Toby。

      「全九龍最繁鬧既地區係邊區？」

      「旺──」一股暗湧於心中翻騰，久久不能平息。

      對，旺角。

      奶路臣街，位於旺角。

      旺角，全香港人口密度最高的地區。

      「我住係呢度咁多年，冇一次係試過外面咁靜架……」Toby咬緊牙關，「你話呢度西貢就話姐……呢度係旺角奶路臣，樓下係街市，平時唔入深夜都唔會有清靜時候，宜家外面近乎係冇聲……」

      說起來好像是……之前沒有察覺到聲音的問題。

      若果這棟大廈被發現有任何的異樣，理應至少有一班人在外面尋找拯救我們的方法，怎麼會音訊全無？

      若果外面根本不知道我們被困在這裏，當然機會微乎其微，然而街市的喧鬧呢？車輛行駛的煩囂呢？

      我乍然憶起，第二晚凌晨1時多的時候，即是Kenneth還沒有離開Jerry家門前，我好想聽到外面傳來了一對男女對罵的聲音，那應該是地面傳來的。

      當時候，由於街頭罵戰實在是家常便飯，我們根本置若罔聞就作罷，哪會那麼多。

      說起來，好想男女對罵完畢之後，我們便再沒有聽到什麼聲音……

      有點骨寒毛豎之感。

      「阿騰……」

      「做咩？」

      「仲有一樣野，我覺得講出嚟好似會好D。」

      「咩野？」我的思緒還是停留在街頭罵戰的內容上，儘管那只是雞毛蒜皮。

      「我好似見過你講既Jerry……」

      「下？咩話？屌啊？」我喊叫出來，想不到Ashley以及阿毛還是動也不動，只是朗朗身子一震。

      「唔好爆粗啦……」Toby皺起眉頭，閉起雙眼，「第一晚，我訓訓下覺……去廁所啦有D肚痛，女仔果D你明架啦……果時1點幾，我見到屋企冇人已經覺得好奇怪……其實我屋企人係咪又唔記得咗帶八達通卡開樓下大堂道門……咁我唯有忍住肚痛，出去搭電梯啦，果時好似大概2點幾左右。然後，我發現電梯壞咗，我掙扎咗好一排，最後都係唔放心，徒步走落樓梯，又唔放心朗朗自己留低係屋企。點知……點知……」

      「點知點？」我咬緊牙關，靜心下來等待她繼續說下去。

      「我越走到落去接近底層既後樓梯位置，越覺得有D唔妥，好似有D霧。」Toby捲曲著頭髮。

      「咁有咩奇怪？」我鬆一口氣，「或者話，本來我都知道既。」

      「果時高層冇霧，同宜家唔同。」

      「吓？」

      「即係霧，唔係突然出現，而係慢慢由地下曠散既……」

      我一時無言以對，繼續等待著她的解說。

      「不過，呢個唔係最詭異既地方。」Toby口唇略微顫動，「我一開始以為係火災啦，就加快腳步衝落去，點知……」

      我連番催促她把話說下去。

      「我見到底層防煙門打開咗，但係……門前滿地沾滿鮮血既屍體……好得人驚……而且，有幾個人從大堂跑翻入防煙門內既位置，全部人都全身染滿血……幾個都訓低咗，得一個男既刪埋咗道門，好似有攞過電話出嚟……然後係門上面寫字……好似係血字……」

      「Jerry！」我不禁驚呼。

      「之後……唔好意思，無意令你地難受，呢個寫字既男人好快就……就……」

      Jerry死了。

      若果那人是Jerry的話。

      我臉色一沉。

      「然後，我見到防煙門再次打開，然後我真係好驚好驚，加上朗朗發曬顛咁向上跑，我未疾速逃走……最後逃出生天。」

      「果D人……Jerry……係點死？」

      「唔知……」Toby低下頭，「對唔住……我唔應該講，請節哀……」

      「大堂究竟發生咩事……」

      「至少，可以證明既係，大堂一定有不祥之物，造成咗咁多傷亡……」

      忽然一陣詭異感油然而生，我抬起頭，凝望著短髮女孩，「咪住先……你話門口全部都係屍體？」

      「至少……至少有十幾具。」Toby的手往嘴裏塞，「做咩？」

      「我地落到底層既時候，見唔到屍體。」

      「一具都冇？」

      火警鐘聲突然響起。

      「一具都冇……」我六神無主的，盯著同樣凝視我的灰貓。

      「點會架，係冇可能架……」Toby露出訝異之色，「咁多屍體，邊可能會消失……」

      十多具屍體，全部都不翼而飛了。