[屍故] 完sem後被迫留在科大玩一場生存遊戲: 作者感言

~哩篇文大約打咗六萬字，哩個我自己都估唔到，雖然對其他人嚟講可能係短文，但係對我嚟講已經算係一篇長文啦。

首先真係要多謝咁多位巴絲打鞭策，我都無諗過有人支持，真係非常多謝有睇到最後同有比過好多意見我嘅巴打。其實小弟寫哩個故個陣都係一時衝動，想試下新一年比自己有個突破，做下自己平時唔會做嘅嘢。

寫喪屍故都因為覺得題材易寫，而場景係科大都只不過係因為本人讀科大先咁揀，無咩深思熟慮過，所以內容寫得好差，無咩情節可言，多多見諒。有時我都會覺得自己係浪費過哩個題材，明明有好多位可以發揮到但係我都諗唔到而無寫到，令到大家失望，哩個我都覺得好對唔住，好抱歉。

故我應該都會繼續寫，但應該唔會寫返喪屍哩個題材，雖然係哩篇故有啲留白位，因為其實本人好細膽，本身對喪屍哩味嘢都無乜興趣，留白嘅地方可能會係其他故講返。哩個故最遺憾嘅一定係寫阿瑜個到寫得唔夠好，我好中意哩個角色但係偏偏寫得唔夠傳神，如果再寫下一個故，好大機會係寫佢同阿哥嘅事，咁當然要個腦肯比到貨我先啦。

其實都係寫完個故想打返篇感想，唔想睇文字海嘅巴絲打可以直接飛咗佢，最後都係多謝有支持我嘅巴絲打，亦希望係我寫下一個故嘅時候都多多支持，謝謝。