【好想同你講下野】一隻厹的日記: 23

爸爸呢排都好大酒氣返屋企。 


好似聽聞，遙遠有個地方叫日本，啲爸爸每日放咗工之後都仲要同上司、同事飲到啤啤FULL先返屋企，真係好奇怪。 


不過我未飲過酒，阿澄唔畀我點，其實我都無諗住點，因為實在太臭。 


酒對我黎講，係一種未飲落肚已經好刺激我嗅覺嘅飲品，搞到我有啲想企唔穩咁。 






所以我都唔太理解人點解要專登灌醉自己，可能佢地真係太多憂愁嘅事，解決唔到，唯有用酒精去麻醉自己。 


爸爸好大壓力？ 


佢幾乎每日都醉住返黎，本身媽咪都好擔心，去到後來已經好嬲佢唔理佢。 






阿澄呢排係咁同我講，佢爸爸做野好似唔係好順利，工作上好煩惱。但自己又唔知點幫佢咁。


佢一邊捉住我兩隻前腳，係咁玩，一邊講：「阿波，你話點做好呀？」 



「到底點先可以哄返爸爸開心？」阿澄係度苦思。 







為咗唔令阿澄苦惱，唯有我出馬。 


雖然爸爸不嬲都唔係好鍾意我，但我有信心哄佢開心嘅。 


其實我只要做啲，人平常會做嘅野，咁佢地就會覺得好搞笑。 


爸爸嗰日照如常返黎，又係飲到醉醉地。媽咪已經好嬲無理佢。 







我爬上梳化，佢好疑惑問我做咩，我就去到爸爸背後，然後用隻狗手係咁幫佢搥背脊。 


我知其實唔會舒服，不過爸爸好開心。 


「哈哈，你都幾有靈性架啵。」 


爸爸終於都笑返。 


只係......有啲古怪，好古怪，唔應該會咁樣。






近排阿澄成日都好遲先起身，搞到差啲遲到。 


原因都係傾電話。 


我都好清楚，究竟佢而家同緊邊個傾計。 


嗰個戴黑框眼鏡個男仔嘛。 


老實講，都唔知佢有咩好。 






個人又好似毒毒地咁，又係戴眼鏡，又懶係識哄女仔，又係講野懶係幽默風趣，又 
...... 


我承認嘅，我承認佢哄得阿澄好開心，基本上一傾電話就會好開心。'


哩種狀態係咪叫拍拖呢？ 


其實我知拍拖係點解，我聽一隻狗講過，拍拖係結婚前嘅一個階段， 


咁點解叫拍拖？好似係因為會拖手，而拖手多數會啪一聲，所以叫拍拖（好似係）。 






咁即係，個男仔將來有可能會做阿澄老公？ 


我一諗到哩到就想崩潰。 


唔係掛？我唔想哩條友做我男主人呀！ 


阿澄，你揀個第二個好無呀？ 


同埋咁細個，拍拖邊好架？ 


可惜佢聽到呀，耳邊仲係咁傳黎阿澄啲笑聲。 


「哈哈哈，你好低b呀。」阿澄笑得見牙唔見眼咁鬧佢。


我個心好鬼複雜，一方面我又好唔鍾意個男仔（唔知點解），一方面我又覺得阿澄好開心係一件好事。 


哩種，人類好似叫做矛盾。 


係，大概用矛盾可以形容到我嘅心情。 


「阿澄，我地玩呀。」我跳上床，係佢身邊轉黎轉去，希望同佢玩。 


「阿波，我傾緊電話，乖乖，遲啲先玩好無？」佢掩一掩電話同我講。 


「好啦。」我唯有跑返落床。 



阿澄，其實我都好想同你傾電話呀。 


可惜，你都聽唔到我講咩。 









人同狗嘅界線，係一條永遠無法跨越嘅界線。