暗戀

我係個無乜優點既女仔，又矮又肥讀書又唔得，本來就係個唔係咁起眼既人，直到我鍾意左排球呢樣野，我同好多人好多老師熟絡左，本來以為自己會一直平平淡淡咁過呢個中學生活，但因為排球，令我擁有一堆好朋友好隊友，更令我開始對佢有好感。
唔知幾時開始，我上堂既時候會留意佢既一舉一動，講起自己都覺得自己變態，望到佢笑自己都會笑，見到佢好似唔係咁開心自己又會擔心。小息個時佢黎揾我傾下計，挽下，已經好滿足好開心。某一日發夢，夢到自己拖住佢隻手，望住佢對住自己既笑容，好真但始終都係夢。發完個夢就知自己對佢有feel，直至某日同左個朋友講發過個咁樣既夢，個朋友又話佢對我都好似唔同其他人好似都對我有D野，老實講真係幾開心，但自己知道唔會係真。
上年年中，見到分班結果發現同佢唔同班，雖然係預左，但個種不捨既感覺比我想像中仲要重，我以為自己可以欣然接受，但原來到要面對個陣，個種想逃避既感覺係咁強烈，我開始後悔，後悔自己點解當初唔比多D心機讀好D書，後悔自己點解唔放多D時間同佢相處，但點後悔都無用，始終都係要接受。
係暑假入面因為要練波，所以大家都有唔少見面既機會，男仔練波既時間比女仔早，所以我可以提早少少翻去睇佢練波，由於佢好早已經入左學校既排球隊，又有係出面D隊練，所以球技比起其他岩岩入黎既F.1弟弟勁好多，所以成隊波練習緊既時候，通常佢都係最突出最顯眼既人。雖然成日都窒佢殺波好廢姿勢好樣衰，但只係我想挽下佢，睇下佢扮嬲既樣，其實佢殺波好型，好勁，唔知有無打排球既朋友有咁既同感，我覺得接自己鍾意既人殺既波真係好正，接到個唔錯既波佢又讚下自己，個種滿足感好正。
其實我呢個所謂既故唔係故，係真係發生係自己身上，如果想睇小說既對唔住，呢度可能唔係咁合你心水喇，有興趣繼續睇落去既人希望你地唔好嫌棄我D廢J文筆啦。