我的如意約定: 第五章
遠處既林霖…
望著我
依種眼神流露出無助
後退幾步再轉身，背對我同呀雀
呀雀：「個女仔做咩呀？」
「佢見到我地攬埋一舊…」
呀雀：「佢唔係呷醋下，我同呀鏘你無野嫁！佢唔知嫁咩？」
我同呀雀係兄妹黎，我係咁諗，佢都係咁諗。人人都唔會信，但事實真係咁。常言道「能成為密友總帶著愛」，所以我唔會話對呀雀一啲好感都無…只係我總係覺得我對佢好，係因為我欠佢一隻耳仔。
「林霖，你呷醋呀？」我走到林霖背後
林霖無理我
呀雀都走過埋幫口，兜到佢面前
呀雀：「我同呀鏘堅係無野，唔好亂諗野喇！」
林霖終於肯講野
「真係？你地都…係唔好扼我喇！頭先攬得咁肉緊…點會係無野」
呀雀同我對望一眼
呀雀：「你啱呀！我地好有野，小學就識，我係佢青梅竹馬既女朋友！」
What the hell！！！
唔係玩得咁誇張吓嘛，小學就識、”青梅竹馬既女朋友”都講得出…
唔係喎，林霖小學就識我，唔會信呀雀既！
林霖：「咁…咁…咁我祝你地情人快樂…」林霖眼濕濕，講完就走左去
唔係吓嘛…信左？傻左呀？當我想去追
一把聲音令我停低左
「呀”玲”！原來你喺依道！」
我再一次驚訝，再一次東張西望…
「都講左唔好咁我！」
「下次記得囉！呀燕！」
「陵陵聲，仲要係”燕陵”，唔好聽，意思又唔吉利嘛！係唔係咁講先蘭蘭！」
我望向呀雀
玲…陵…
呀雀：「係呀！依位係呀鏘，依位係蘭蘭」呀雀互相介紹返我同面前既”春麗”
“春麗”：「我叫何芯蘭，德心中學」
「榮本鏘，聖皮埃爾書院」
我一直都以為呀雀叫徐燕，原來全名係徐燕陵。徐燕陵？燕陵？陵？
「小學就識」？「我係佢青梅竹馬既女朋友」？
唔通呀雀唔係亂咁講，所有野都係真？
佢就係小玲？
我希望佢係，但係…
呀雀真係係我念念不忘十年既小玲？
何芯蘭：「喂！做咩眼定定望住呀燕！」
「無野呀！喂咩野喂！我無名你叫呀！Bitch！」
「Bitch？你無野吓！我都無名你叫呀！短人！」
呀雀：「你地唔好嘈喇！朋友嘛！」
介紹左幾句就係朋友咩？
死！林霖呀！
一路打電話比佢，一路睇下佢會唔會仲喺體育館入面
通左！
「我係林霖呀，有咩事呀？講低喇我可能會搵返你」
留言信箱…
佢唔係真係嬲嘛？打多幾次…
林霖：「喂。做咩搵得我咁急？」
「去左邊呀？」
林霖：「去搵海瀰食晏囉，佢話佢喺附近。」
「咁好喇，星期一見！」
林霖個幾鐘前先食完野，宜家又食野。都唔知佢點解可以食咁多野，又唔痴肥，最多都只不過係肥妹仔。
返入主場地，呀雀同何芯蘭都仲喺道傾緊計
呀雀：「點呀？佢仲呷緊醋呀」
「唔知呀，佢話去食晏喎。」
呀雀：「咁你都去？」
「佢約左人食，海瀰呀。」
呀雀：「咁你食晏未，不如我地一齊食」
「蘭花妹，有個場無人打，黎打下喇！」遠處有個女仔揮曬手，應該就同何芯蘭講，個場入面既係…Hotman？
咁我就跟住去喇
何芯蘭：「佢只係同我講，無話叫埋你，做咩跟住曬！」
「場入面嗰個我識既，去打波係唔係唔得呀，Bitch！」
呀雀：「你地又嘈喇，做咩姐一出聲就鬧交！」
「係佢一出聲就挑釁我！」
女仔：「蘭花妹你帶多個人黎呀，夠四個人就不如打場雙打」
何芯蘭：「呀姐我art你，打爆個短人！」
女仔：「我諗住打混雙喎，我就part Hotman，你地兩個part喇」
何芯蘭：「唔係吓嘛，同依個短人part，不如好單打好過！」
「part個bitch不如我同呀雀去食晏好過」
何芯蘭：「好喇喎你，唔好再溝呀燕喎！」
「係唔係關你事呀！」
講返先，我真係無諗過去溝呀雀，只係今日知道左佢全名。我有啲野想攪清楚，佢會唔會就係小玲。
女仔：「試下part喇，我都係第一次part佢打。你想溝呀燕咩，有啲難，佢好似有鍾意既人。」
「其實唔係囉」
同何芯蘭好唔情願咁part混雙，相反Hotman同女仔又傾戰略，又咬耳仔咁。好享受咁，講真好似一對情侶咁。
Hotman：「輸左請野飲！」
「都搵我地笨既，咁我地放低恩怨情仇，打好啲」
何芯蘭：「嗯」
睇何芯蘭既企位，應該打過下混雙，不過就唔知係唔係真係識打。
打到半路，我地打得好流暢，我重板，佢前場跟得好快，又唔會搶我波。
認真打得好順，唔知點解好似知咩波我打，咩波佢失要我補。
相反Hotman佢地好多誤會，又加上Hotman打法唔夠硬，比我壓住打
何芯蘭：「呀鏘你都幾大力喎，又識補我位」
「呀蘭你都跟得好快，又起到波」
贏埋最後一分
何芯蘭攬到我實一實
最後Hotman佢地要出去買野飲…
何芯蘭：「同你part得好開心，你有咩球會嫁？」
「無喎，都係打下波咁」
我當然開心喇，有女仔主動攬我…
何芯蘭：「我都無打球會…你好鍾意呀燕嫁？」
「我同佢無野嫁」
何芯蘭：「啱呀！呀燕佢有鍾意既人，唔會變心」
「哦」
何芯蘭：「聽呀燕講，個男仔對佢一條心。你都知佢耳仔既事…個男仔不單只無嫌棄佢，仲日日送佢返學放學，平日照顧佢。最衰我成日放學留低打波，無見過個男仔…」
嗰陣時送佢返學放學，咪係我囉！
何芯蘭：「話說你個名點寫？」
我是旦拎紙筆寫出黎
「繁榮，日本，鏗鏘」
何芯蘭：「咁我都寫返比你睇」
我遞枝筆佢左手邊，佢用右手拎？
「你唔係用左手咩？」
何芯蘭：「我寫字係用右手，因為以前比人話過我寫字頂到佢…嗱…我個名」
呀雀：「你地終於開聲唔係嘈交喇！頭先講緊咩呀？」
「八卦妹…」
何芯蘭：「呀鏘呀雀你餓未？我好餓！」
呀雀：「餓呀…咁你地換衫走喇…咪住先，蘭蘭你叫佢咩吓？呀鏘？」
我同何芯蘭都笑一笑
呀雀：「打場波就friend左喇…打多幾場咪註冊結婚？」
「至少…無人會同你part囉，小雀仔。」
何芯蘭：「呀燕唔好亂講野…呀鏘唔好郁！」
我地就面對面，手繞到我頸後…
佢唔係咁心急吓，女校女生都唔洗咁嘛…
佢從我衫領拿出一條羽毛
哦…好在姐…
「我去換衫先，一陣門口等」
呀雀：「你地做咩野呀！當住我面耍花槍！」
何芯蘭：「你羨慕咩姐？你都有呀…咩？個男仔呀！之前日日送你返學放學個男仔」
何芯蘭一路講，一路換衫。呀雀就望住佢換衫
呀雀：「個男仔咪係呀鏘囉！」
等左十幾分鐘，換個衫都咁耐，唔係沖埋涼嘛？女仔真係好麻煩！
Hotman：「比你地既！」
「我地去食晏，一唔一齊？」
佢微微轉一轉頭，女仔原來喺佢遠少少既後面
我細聲講「咁唔阻你，拎左電話未，係就主動啲」
Hotman：「佢話想以後同我part混雙，係唔係暗示左？」
「係喇！做做下混雙partner，日久生情，就做人生既partner」
Hotman：「咁你都去馬喇！」
佢地終於從更衣室出返黎
呀雀就無變，而何芯蘭一改形象
穿上一件白色短袖衫加中短連身窄身裙，
剛剛好掩蓋到佢頗發達既大腿
我第一次認真去望何芯蘭
雖然大腿粗，不過就矮過我，都算嬌小
除左髮夾，解左小馬尾既佢，
原來係平陰，平肩既短髮
同埋，出街look既佢其實幾迷人…
我又係咁喇，眼定定望住一個女仔
處理得唔好，隨時有手尾跟…
何芯蘭：「望夠未，著得好靚咩？」
「形象轉得咁誇，轉mode轉得咁快，有啲唔慣」
何芯蘭：「咁運動型女仔就一定要無時無刻著sporty咩？」
呀雀：「咁食咩好？」
何芯蘭：「快就得，我一陣仲要去打波。」
「又打，去邊打？」
何芯蘭：「長沙灣，醫院」
「明愛？」
何芯蘭：「係呀…咁怪既…正常應該係問點會去醫院打波…」
「醫院員工場嘛，你屋企人做醫院？」
何芯蘭：「之前表哥去過做實習，打過keep住打到宜家」
呀雀：「咁你地一齊去打喇！不過唔好唔記得今晚約左食飯，呀鏘你都黎喇」
食完野，呀雀一個人走
我同何芯蘭就搭車去長沙灣
何芯蘭：「你都有去醫院打波？」
「咪就係去明愛打囉！」
何芯蘭：「平時唔見你既」
「我打星期四夜晚」
何芯蘭：「我淨係打星期六晏」
到左員工場…
「靚女到左喇…翼仔你都喺到既？」
「叔叔，我啱啱打學界識佢，見佢又係黎醫院打就黎打下」
叔叔：「咁有緣，咁以後就一齊打波，一齊夾下雙打喇」
其實兩個人可以相識，係包含左好多巧合，而同何芯蘭實在有太多巧合…
我地打左整整四個鐘，就出發去同佢地啲朋友食飯。
其實所謂朋友，都只係校隊隊友。
同何芯蘭相處時間長左，發覺同佢又好似講野多左，氣氛自然左。
兩個人有相同興趣，關係會親密啲係啱既。
何芯蘭：「聽醫院啲人講，你有個細妹嫁，佢係點嫁？」
「細我兩年，好肥嫁。本來想同佢打混雙，不過佢都唔鍾意郁…總之關係唔太好…你呢？有無兄弟姊妹？」
何芯蘭：「我係獨女黎…我都想有個哥哥同我打混雙」
「唔得，你係我既！」
何芯蘭：「…」
「我意思係…你以後係我混雙partner，我覺得同你好有默契，好夾…所以就算點都好，唔好同我散！」
何芯蘭：「…」
死喇，講到好似表白咁，想同人part混雙姐，唔係講到咁嘛…
咁樣無朋友做喇…
「其實呢…」
何芯蘭：「以後我就拜託你喇！」
「…」
其實聽到佢咁既回應，我呆左，無反應都好正常…
何芯蘭：「我以後可唔可以叫你鏘…哥哥？」
「…」
何芯蘭：「你叫我蘭妹妹…都係唔好，你本身有個細妹。嗯…就叫我蘭兒喇！」
從依一秒開始，佢唔再係bitch，係蘭兒。
而我唔再係短人，係鏘哥哥。
蘭兒：「佢地又話七點旺角E出口等，宜家六點九喇，都未到！」
原來蘭兒同我一樣都係嗰啲要全世界都要早到既人，一齊早到就做咩都時間多左
「等下喇，都未夠鐘。」
「你地到左唔打比我既，我一直都喺旺角行！」呀雀搭住我地兩個
呀雀：「你地又好似熟左喎，打波真係會令兩個人加深感情咩，又唔見我同呀鏘你係咁…」
「我同你又唔係夾混雙」
同時我覺得蘭兒好似走開左一步
呀雀：「蘭蘭你點解走開左既，係唔係我阻住左你同呀鏘呀？」
蘭兒：「唔係呀…你同鏘哥哥傾下計喇」
呀雀：「鏘哥哥喎…」
呀雀對住我笑，好似傻左咁笑…
Hotman都有黎，睇黎佢同嗰個叫呀詩既女仔好有機。
成晚得兩個男仔，面對五六個女仔，難免都會尷尬同無話題。不過我留意到呀雀好似唔太埋佢地堆，應該係咁講…呀雀自我隔離。我都聽過佢講，佢學校只有一個朋友，咁睇黎應該係何芯蘭…
散場喇，搭地鐵既就去地鐵站，搭巴士既就去巴士站…
蘭兒：「呀燕你搭巴士嫁啦？鏘哥哥就我一齊去搭地鐵喇」
呀雀：「我唔想同呀鏘分開喎…」
呀雀一講依句，就知佢唔開心有野想同我講
「我去搭巴士，蘭兒你自己搭地鐵，自己小心喇！」
蘭兒細聲講：「送佢返到屋企開埋門先好走，佢媽媽返夜，一個女仔好危險。我覺得男仔唔係我諗得咁差姐。今日一開始仲以為你係會扼女仔又對人差嗰啲男仔，原來你對人幾好…以後對呀燕好啲，唔好再留低佢一個人。」
呀雀：「呀鏘你可唔可能拖住我？」
「呀雀你係唔係有啲野…」
呀雀一手拖住我…
呀雀：「從來無人理我，我聽得唔清嘛…點解唔望住我講，我可以睇口型…點解！」
我無鬆開手，因為我知道佢真係好傷，比人冷落感覺唔好…
「真正對你好既人，就算你聽得清都會望住你講野…對唔住…都係因為我嗰時…」
呀雀：「嗰時識你…第一眼見到你，只係一個平常學生仔…點會知多年後既今日…你會對我依個聾左既傻女咁好，對我不離不棄」
手越拖越緊
我地都知道對方拖得太緊
就因為緊
我地都知道對方著緊
甚至感覺到對方既心跳、體溫
告別之前
相擁之間
感覺到對方既呼吸
亦都感受到對方既心情…
小玲：「人人都以第一眼、第一印象而認識一個人，以時間來了解一個人。但是誰來說面前那人只是萍水相逢的陌生人，而不是過去擦肩而過，或是曾經有故事的故人呢…時間可以令人互相了解，亦可以令人印象轉淡再也認不出對方…世間所有的相遇都是久別重逢…」