結婚前，回顧我的前半生: 後篇(上)
話咁快，開左學已經三個月，
專家我每日過住既生活，
就係：返工->返學/做assignment/溫書->訓教，然後放假就上下高登訓下咁
每日如是。
經過咁多野，我開始對人失去信心。
有時候，你期望係其它人身上得到關心同愛，
但事實往往令人失望。
當時既我，二十幾未夠三十，但心態已經好似老人家咁。
無論我既生活，抑或經歷，都同一個已經我的家剷既獨居老人無乜分別。
我日常最大既興趣，就係一個人去食下野，
咩一人火鍋呀，openrice比人捧到上天d餐廳呀，我好多都食過曬。
一個人最好就係，我永遠唔洗等位，鐘意就一個人坐，一係搭檯。
唔講你地唔知，本專家自細好鐘意聽音樂，尤其外國樂隊。
要用一首歌形容當時無左阿希同wendy既我，會係呢首，
Radiohead 既 No surprises：http://www.youtube.com/watch?v=u5CVsCnxyXg
A heart that's full up like a landfill.....(一個像垃圾堆填區的心)
A job that slowly kills you..................(一份慢慢將你殺死的工作)
Bruises that won't heal......................(和很多永不痊癒的傷口)
You look so tired and unhappy.........(你看起來好累、好痛苦)
…
No alarms and no surprises
No alarms and no surprises
No alarms and no surprises
Silent, silent....
我既生活一直都係No alarms and no surprises…直到一日，我收到一份單張。
份單張係我屋企附近，一間社福機構派既。
內容大約係叫人資助呀，做義工之類。
老實講，平時專家收到呢d單張，
都會諗："Hi…係咪呃人架？"
然後一轉身就射個三分波丟左佢。
但今次呢張…有少少唔同…
第一，張野寫住"探訪孤兒"。
孤兒…咪即係我呢d？
我不禁有左同理心，因為我最明白無老豆老母，斷六親個種感覺。
我好想去睇下一d同我有類似經歷既小朋友，
比d關懷佢地，等佢地唔好好似我咁。
第二，當時派張野比我個女仔…真係幾靚
於是，我就膽粗粗打左電話去登記，約左時間去聽talk。
但原來，係香港既孤兒同孤兒院，唔係我想象中咁。
呢次經歷亦係一個轉捩點，改變左專家一直以來覺得自己好慘既人生觀。
訓前last
就係咁，專家登記做左個間機構既義工，希望得閒去探下孤兒。
老老實實，第一日去聽talk都係講d好general既野，專家大部分都唔記得。
最令我印象深刻既，係個姑娘講左一句：
「其實香港已經無幾多間孤兒院…所以探訪次數會比較少。」
下，我當時打左個突…但諗落又好似唔多覺香港有咩孤兒院。(個陣我淨係聽過保良局)
後來聽聽下，先知香港既孤兒好多都係因為殘障被人遺棄。
而呢d孤兒好多都會被外國人/機構領養收容。
最後…因為太累我聽聽下訓著左…
叫醒我既，係另一個改變本專家生命既人。
佢叫薑伯。
而第一次去探訪既孤兒院，更加係帶比我人生中極大既衝擊。
係度，我想講講薑伯先。
薑伯係一個六十歲既退休教師。
我同佢認識…就係因為當時我聽聽下talk訓著左。
「喂…醒呀…姑娘講緊野呀。」薑伯叫醒我。
唔知點解，我當時有種…讀書時訓教比阿sirHi既感覺。
當然，個陣我仲未認識佢。
個talk完左後，姑娘就叫下次探訪得閒既義工寫低名。
而薑伯就排我後面，咁我就搭訕啦。
我：「頭先唔好意思…要你叫醒我…」
薑伯：「唔緊要…我職業病發作…哈哈」
於是，我就同薑伯去左食飯。
佢比我既感覺…只有「蒼桑」兩個字。
同佢傾計，知道佢係個退休教師，其實有少少壓力。
但傾傾下又覺得佢份人好好，見識好廣。
天文地理乜都識，我真係好敬佩呢種人。
「係呢…薑伯…點解你要來呢度做義工既？」
估唔到，我呢個一般都唔一般既問題，得到個令我好意外既答案。
「哈…其實我有個仔…不過好多年前意外死左lu…我又鐘意小朋友…咁我咪做義工囉。」
一般人呢個時候…應該講sorry，但我講唔出…
因為…薑伯答我個陣…完全睇唔出佢係唔開心，仲好豪邁咁笑一笑…
搞到我真係唔知點好。
我入到個間孤兒院，見到班小朋友，真係呆左。
入面既小朋友數目唔多，大約十個，但無一個係健全。
而有一半，更加係…唔識郁既(諗唔到點形容好)
我以為…一入到去…會有班小朋友衝埋來一齊玩
現實係…呢班小朋友…個個都目無表情…好似對人生無曬希望咁…
其中有幾個…我唔知係有咩病…但佢地只可以訓係度…等食…等訓…比人照顧。
我拎住一早準備既禮物…入去派比大家…
(我仲買左幾個足球仔籃球仔…心諗大鑊…即刻收番埋佢)
識講野既…都會講聲多謝…
講唔到野既…就會點一點頭
我由佢地既眼神…見唔到任何希望
個度既姑娘話…呢班小朋友都係等緊外國人或者機構領養
係香港…基本上好少好少會有孤兒…
因為當時排隊等領養既夫婦…遠遠比孤兒多…
而呢間孤兒院收養既…就係一班因為嚴重殘障被父母遺棄既小朋友
佢地…係孤兒中被遺棄既一群…因為無乜人會領養殘障孤兒…
簡單d講…就係孤兒中既孤兒…
而呢間孤兒院…因為經費唔夠…等呢批小朋友安置好，就會執笠。
當時我望望自己…我發現…對比起來，我都算好幸福。
個次探訪，對我有好大衝擊。
平時見到地鐵、電視d宣明會廣告，我都無乜感覺。
但今次親身見到一班殘障既孤兒…
我唔知係感同身受…定太大衝擊，
我覺得…一直以來自己都太悲觀，
成日以為自己好慘好慘，
但呢個世界比我慘既人原來好多。
個日，我仲識左Mrs Robert，
佢係孤兒院既院長，由英國來香港，
本身只係打算開呢間孤兒院，但一留就離鄉別井十幾年。
我望住Mrs Robert…薑伯…同其它義工，同班小朋友唱歌…玩…傾計
我諗…每個人都有佢既過去，
但如果一直被過去束縛住…只會令自己更痛苦。
個日探訪完，我無再埋怨自己既過去。
反而更加積極，短短兩個月…禮拜六日一放假我就去義工中心幫手。
希望用自己既力量令其它人開心，唔好好似我咁。
亦因為咁，我係義工中心同一個女仔熟絡左。
佢叫Vicki，可能係相由心生，Vicki係我成世仔見過最靚、最好人既女仔。
係我開始做義工既頭兩個月，
我幾乎每個禮拜六日都會去中心幫手。
而Vicki亦係個度既義工。
如果要用兩個字形容佢…就係「無敵」
樣靚，身栽超好，仲要有愛心
我諗係男人都會迷上佢。
而且，佢同我仲係住係附近…(同一個屋村)
所以…你懂的…佢同阿希、Wendy既分別…除左外表…
就係我地經濟上既差距唔會太大。
對於好似我咁…一個無家底既人…呢個因素好重要。
我可以更自信咁同佢傾計…
而各位巴打應該明白…未成熟既毒向左走向右走，總係好易愛上人的。
兩個月間…我已經鐘意左Vicki。
做義工時主動親近佢…兩個月後…我仲鼓起好大既勇氣………約佢。
「係喎…上次咪話有間泰國野既…你來緊個禮拜五得唔得閒呀？不如去食飯？」
佢竟然應承左我。
p.s.呢段時間…專家已經無乜上高登
就係咁，星期五晚，我同Vicki出左去食飯。
個個禮拜，我真係等得好心急。
因為我真係好耐都無同女仔出過街。
但今次，我無特別準備。
經過上兩次既教訓，我想同Vicki做左朋友先，慢慢了解同發展。
個晚我地去左食泰國菜，之後行左陣街，就返屋企。
返到屋企，我地就傾左陣電話。
一切都好平淡。
但唔知點解…個晚之後，我地就晚晚都傾電話。
除左一d我一早知既野，例如佢既職業…興趣等等…
我知道左，原來佢去做義工，係因為佢想避開屋企人…
原來佢阿爸好爛賭…日日搞到家嘈屋閉…
所以佢成日都出去…唔想留係屋企。
自此，之後既幾個月，我地一齊做義工…去街…發展得好好。
當時我算係幾順利，工作穩定，讀書ok，又有個好朋友。
而我…亦諗緊係咪應該表白…因為我覺得佢對我…都應該有少少意思…
就係咁，做做下義工…話咁快就過左大約半年。
亦即係我識左Vicki已經半年。
雖然我對Vicki有好感…我亦覺得佢對我有好感…
但我始終無膽表白。
因為我當時受過傷，唔敢對一段感情付出太多。
所以，我唔想做主動個個。
我選擇收埋自己既感情。
而且…個陣我地做朋友…都幾好…
好地地我又唔想搞咁多野。
呢半年入面，我地幾乎每個星期都會見面。
行程都係週末做義工/係中心做準備工作->食飯->
行下街->去松記食糖水->一齊返屋企(佢返佢屋企，專家返自己屋企，住得近)
幾乎次次一樣。
同時，我亦同薑伯做左幾好既朋友。
我同佢講左我同Vicki既野(因為我無乜人可以講)
佢叫我去馬…唔好後悔。
因為佢以前留唔住老婆，個仔又意外去左，先搞到一個人孤寧寧。
佢話唔想我都係咁。
佢知道我既生世，仲同我講左好多人生既野，雖然…我已經唔太記得…
無幾耐，薑伯就返左加拿大同親戚住。
而我，因為薑伯既說話，決定搞掂degree既final，就去馬表白。
當時，無記錯大約係6,7月。
終於，我搞掂左第一年既final。
於是我借d易，同Vicki講…不如去慶祝，我請食飯。
而實情…我係想表白。
個晚我買左條鏈，訂左山頂一間餐廳食飯。(無錯，又係鏈…我個人係幾悶)
我同Vicki係中環見面之後，就一齊上山頂。
食完飯，我地就係凌霄閣睇夜景。
我就開口：「問你一條iq題丫，你知唔知咩飲品係全世界最凍既？」
係個刻，我以為自己好向左走向右走funny。
Vicki：「下，唔知喎。」
我：「哈哈，珍多冰囉。」
Vicki：「點解ge？」
我：「因為真多冰囉，真假個真，真係好多冰呀…哈哈」
Vicki：「..........................」
點知佢個表情係呆左。
我即時補鑊：「拿，唔緊要啦，答唔到都有獎品既。」
我係我個袋度，拎左條Again B既鏈出來，送左比佢。
Vicki：「哇…乜咁破費呀。」
佢終於笑番。
我：「其實呢…我想話…你可唔可以做我女朋友？」
係呢一刻，佢望住我，我望住佢，隔離有對西人，望住我地…
佢答：「er…你可唔可以比d時間我？」
我只係講左句：「好…」
呢一刻真係好尷尬。
連隔離對西人夫婦都好似feel到咩事，走開左。
我：「咁…我送你返屋企啦。」
就係咁，個晚就完左。
之後既一個星期，Vicki都無搵我，無出現係義工中心。
而我…其實無乜事。
最深刻既都係…個餐飯埋單成2千幾…個陣真係幾肉赤。
我以為…Vicki打算一直避我，當係拒絕左我。
點知一個星期多d，佢send左個msg比我：【今晚去松記食糖水？】
於是，我就同Vicki去左松記食糖水。
由meet up到坐低，氣氛都好尷尬。
我地無乜講野，只係一路dup低頭食。
食完行返屋企個陣，佢突然開口。
Vicki：「上次你咪同我講左d野既。」
我：「下…哦…你當我無講過啦。」
Vicki：「下？我仲諗住…」
我：「下？」
Vicki：「我諗住應承你。」
我個陣…唔知點解有少少想反口…
因為我覺得佢好似玩緊我咁。
但佢又繼續講。
Vicki：「其實…我唔敢答你係因為…我怕被屋企人知道。」
我：「點解既？」
其實我個陣好開心，不過忍住無表現出來。
佢無答我…只係繼續行。
然後…佢又開口。
Vicki：「我今晚可唔可以去你屋企過夜。」
當時既我，由聽到佢say yes既腦部充血，變成下面充血。
我唔記得我有無講過…Vicki係一個好靚…身栽超好…既女仔。
我：「下…可以…不過點解呢？」
佢個陣都係無答我，只係用對手Q住我，一齊返屋企。
去到我屋企，我地傾左好耐計。
但傾來傾去，始終都係傾以前既野。(話以前…其實都係幾個月前…)
雖然…佢一直唔肯講點解要咁耐先答我…同點解要來我度訓，
但個刻我覺得自己好幸福。
我地一齊睇電視，睇到好夜。
順理承章，我地一齊訓左。(有巴打問我係咪青頭，我同Wendy一齊已經唔係。)
第二朝我地就去左食早餐，然後…佢就返左屋企。
Vicki細我少少，屋企經濟環境同我差唔多，佢收入亦同我差唔多。
我個陣…覺得自己幾好彩，識到個咁靚既女朋友。
我諗，一定係做義工既回報！
話咁快，我同Vicki一齊左三個月，期間都好平淡。
有時佢會上我度，但就唔肯比我見佢屋企人，
次次送佢返屋企，都唔比我上樓，就算係樓下都要鬼鬼祟祟。
我問過點解，佢都無答。
直到一日，我同Vicki做做下義工，係中心做緊paper work，有人來搵Vicki。
姑娘入來講有人搵Vicki，佢驚一驚，就即刻出去搵佢，
我偷偷地望一望出面，係個男人，仲有架車泊左係度。
不過…架車好似好舊…好似d老爺車咁。
我就同另一個義工講，「乜架車咁舊既…古董車來？」(佢鐘意車)
佢望一望，講左句：「哇」之後就衝左出去。
我後來先知，個架車係勞斯萊斯既Phantom Drophead Coupe，一架我打十年工…都未必買到既車。
就係咁，我望住Vicki同個男人係出面傾左陣，
無耐，Vicki就入來，話要走先。
我問佢做咩，個個邊個來，佢話遲d話我知。
然後就上左個男人車，走左。
我當時個心有少少唔舒服，諗緊個男人究竟係邊個。
點知，個日係我同Vicki最後一次以男女朋友身份見面。
個晚我打比Vicki，打左好多次，但佢無聽電話。
直到第二日，我收到Vicki既msg，簡單既五個字：【我地分手啦。】
我當時既心情，應該同睇緊呢個估既你一樣，
完全唔知咩事，心諗：做乜勁
個日係星期日，我繼續打比Vicki，但佢無聽到。
我決定，直接踩上佢屋企搵佢。
Vicki早走個日，我由夜晚10點開始打電話，打到3點訓著左。
然後7點一醒，我又打…一直打到10點幾
就收到Vicki個msg，話要分手。
我同Vicki住得好近，係同一條屋村，
所以我諗左陣，就跑左出去，踩上佢度搵佢。
我到左Vicki屋企，禁極鐘都無人應門。(佢同阿爸阿媽住)
我望入屋入面，又好似真係無人。
但我唔甘心，於是我坐左係佢屋企門口等佢。
等啊等…我由十點半左右，等到十二點幾。
期間，我個心真係好亂，未試過咁亂。
雖然分手唔係第一次，但不明不白咁分，我接受唔到。
終於，我等到有人番來。
我聽到傾計同歡笑聲。
但唔係一個人，亦唔係兩個人。
佢地由轉角位行入來，我見到既…係Vicki、個男人同Vicki父母有講有笑咁一齊行過來。
佢地行到過來，見到我，四個都呆左。
成條走廊由本身充滿歡笑嘈吵聲，變到靜曬。
當時我望清楚d，Vicki同個男人…係十指緊扣咁行過來。
見到咁既情境，我唔知可以做乜…只係開口叫：「世伯、伯母。」
(其實我唔肯定係唔係…不過都9成係…結果我估中左)
佢地聽到我咁叫，都呆左。
Vicki阿爸就開口問：「呢個邊個來架？」
Vicki見到咁，即刻拉住我。
Vicki：「哦…呢個我同事來架…佢來搵我傾d野架」
然後佢拉左我去搭lift。
Vicki父母同個男人…就一面細細聲講野一面入左屋。
入到lift，Vicki講左一句：「對唔住。」就開始眼泛淚光咁。
呢句對唔住，我到呢一刻，都仲係接受唔到。
落到樓下，Vicki只係同我講左幾句，就走左。
佢話，個個係佢外國番來既男朋友，亦係佢中學同學。
(後來我知道左，佢地一早plan好曬結婚，佢男朋友仲會買樓比佢屋企人。
而佢個晚搵我，不過係因為同屋企人嘈交，搵我避難。
同我一齊，亦根本無諗清楚，只係佢太寂寞。)
原本，佢男朋友去外國讀master，應該一個月後先番。
但早左番來，前一日就比個surprise Vicki。
原來我一直做左傻仔，自己都唔知道。
依家諗番…唔怪得Vicki話係義工中心唔可以咁close…怕比人知。
又怕佢屋企人見到我。
原來…係怕比人知佢一腳踏兩船。
個日我返左屋企之後，同公司請左一個禮拜假，收埋自己。
我好想好想搵Vicki，但以我咁既身世，點夠人爭？
做第三者搶人女朋友，我又做唔出。
我可以做既，只係一個人療傷。
個次，因為實在太無解太突然，係我最傷既一次。
打多篇：
個個星期，我一個人係屋企。
喊…係有，但唔多。
我反而唔知自己做乜，好似植物人咁，乜都諗唔到。
一諗番起…
自己打左一晚電話…
人地就過左一晚夜
自己一早飛去佢屋企等…
人地四個人開開心心飲完茶行完街返來…
就覺得自己好傻的嗎。
最後…等左一個星期…係星期六…我收到Vicki既msg…
【得閒？松記等？】
個一刻，我真係好亂。
我好怕出到去見到佢同佢男朋友。
但我最後…都係剃番d髦，出左去。
去到，我見到Vicki一個人。
我地無食糖水，佢只係…比番條鏈同一封信我。
講左句對唔住，就走左。
我返到屋企，開左封信來睇。
個晚，係我人生中喊得最多最耐既一晚。
就好似成世既屈辱，一次過爆發出來咁。
個晚，我收左封信…同條鏈…就返左屋企。
我返到屋企打開封信…睇完…真係崩潰。
由於我一早丟左封信，我只可以大約回憶信既內容。
封信簡單d講…就係一封道歉信。
Vicki話左比我知，佢同男朋友一齊已經8年。
因為佢男朋友去左外國…佢覺得寂寞，而我又好…所以同我一齊。
佢話佢一早就知佢男朋友會返來，但都同我一齊…因為佢真係鐘意我。
我表白之後，一路拖住無答我，就係因為選擇緊。
最後佢因為個晚同屋企人嘈交，搵左我…同左我一齊。
同我一齊個陣…佢有諗過同佢男朋友分手。
但佢男朋友一返來，佢就知做錯左，決定即刻同我斷絕關系。
佢話，佢個心有我，但要簡…一定唔係簡我。
信入面尾二個句，係對唔住
最後個句…係叫我以後唔好搵佢。
個晚…我真係頂唔順…喊左成晚。
我諗…點解我成世仔，都唔係簡人…而係人簡我…仲要永遠都係唔簡我。
我到底做錯d乜？我無，我成世人做過最Hi Hi既野…只係上高登問iq題唔開估。
點解一次又一次…要我被人拋棄。
可能…真係因為我傻的嗎。
就係咁，Vicki呢個人係我生命入面消失左。
失戀還失戀，工都係要返。
咁多年來，我一早習慣將自己既感情收埋。
所以表面上…我無好大影響。
做野都係正正常常，同同事叫有講有笑。
只係我無再去做義工，見到松記，我都會兜路，因為我知佢鐘意食。
但實際上，個陣既我…有少少痴線。
我每次見到松記，都會好嬲。
每次見到咩義工…都會好反感。
總之任何令我諗起佢既野，我都唔想再見到。
無幾耐…我就開學。
我用工作同讀書麻醉自己，每日都係做做做讀讀讀。
好快，我就病左。
由細到大，我都好少病，但一病就幾麻煩。
我記得個日係星期五…我一起身已經覺得唔妥…
發燒、肚痛、頭痛乜都齊…
但因為公司有野做，我食左兩粒藥就死頂返工。
結果都係頂唔順，去左睇急症，醫生話係感冒菌入腸，都幾嚴重…抽完血要訓一晚醫院。
個晚我係醫院…探病時間時見到週圍d病人…都會有屋企人朋友來探。
而我…一個人生勾勾咁吊住鹽水。
無耐…有個姑娘走埋來…叫我填份野。
份野上面有一欄…好似叫緊急聯絡人…要寫名…電寫話咁
其實即係屋企人…老豆老母…老婆老公之類
個刻…我個鼻酸左…我無填個欄…比番份野姑娘…
個姑娘同我講：「你填漏左呢欄喎。」
我無解釋…係個欄填左自己屋企電話…同作左個名落去。
之後…我用張被蓋住自己個頭，係醫院喊。
我諗…人係病個陣，真係特別軟弱。
雖然我病個陣…有諗d唔開心既野。
但我病完之後出院，又無乜事…
life goes on
我一樣係返工讀書...返工讀書....返工讀書
一切照舊。
唔洗返工，我就聽下音樂打下機。
無拍拖…加上人工加左，又有玩下炒賣…
我反而多左錢。
同Vicki分開之後半年多d…我就儲左一筆錢。
呢筆錢…我唔知用來做乜…但儲定舊錢…點都係好事。
除左病個兩日，我生活都好平淡。
無耐…就到左聖誕…
個晚我一個人落街食飯…見到四圍一對對…或者一家人咁
有無唔開心？一定有…但又唔係好唔開心個種
只係有少少傷感。
咁多年…我都慣。
個晚，或者話個一排，陪我過既…係另一首歌。
一首救過我好多次既歌。
Don't look back in anger
http://www.youtube.com/watch?v=iul4SBlHIf8
Slip inside the eye of your mind
Don't you know you might find
A better place to play
You said that you've never been (sounds like "bean" in order to rhyme
W/"seen")
But all the things that you've seen
They slowly fade away
So I'll start a revolution from my bed
''cause you said the brains I had went to my head
Step outside, summertime's in bloom
Stand up beside the fireplace
Take that look from off your face
You ain't ever gonna burn my heart out
And so, Sally can wait
She knows it's too late as we're walking on by
Her soul slides away
But don't look back in anger
I heard you say
Take me to the place where you go
Where nobody knows if it's night or day
Please don't put your life in the hands
Of a rock and roll band
Who'll throw it all away
I'm gonna start a revolution from my bed
''cause you said the brains I had went to my head
Step outside, ''cause summertime's in bloom
Stand up beside the fireplace
Take that look from off your face
''cause you ain't ever gonna burn my heart out
So, Sally can wait
She knows it's too late as she's walking on by
My soul slides away
But don't look back in anger
I heard you say
(guitar solo)
So, Sally can wait
She knows it's too late as we're walking on by
Her soul slides away
But don't look back in anger
I heard you say
聖誕節對我來講…其實唔難過。
一般我都係…上下高登…或者睇下電視就算。
因為得一兩日假咁，其實…同星期六日無乜分別。
個個聖誕節…我無乜野做…於是又上高登…
我發現…原來大家仲記得我…
開個post..reply下…大家又話我答案錯…又貼d斯路出來咁。
上高登…當時對我來講係一件幾開心既事。
雖然我上親都比人鬧，但至少…呢個世界有一個地方…係有人記得我…
而且我都算出名…(雖然我覺得係一個意外)
於是…我實在太無聊…個年又有一首歌彈起左…
係宇宙巨band既如果我是陳奕迅
我就用放假既時間…作左個故…放上高登。
其實個故…我只係求其玩下。
估唔到…呢個故竟然好受歡迎…甚至比我呢個故更受歡迎。
個陣好似有人叫我唔好出iq題，寫故算。
當時…專家有個facebook…係叫"IQ題的專家"
平時無野做就問下iq題咁，當然比人Hi到九彩啦
我寫完呢個故既正傳無幾耐…有個編輯係fb pm我…話想幫我呢個故出書。
我心諗…唔好掛…
可能你會話…有人賞識…搵你出書都唔出？
無錯…我就係唔敢。
一來…我係高登真係同個膠字畫上等號，我唔想比人起底。
二來…我無咁既時間…返工成日ot…又要返學。
所以拒絕左。
聖誕過左…我又開始做野返學。
上高登個陣，成日有人話聖誕節呀…情人節好慘。
但對我來講…農曆新年…先係最最最慘。
聖誕節情人節…你上高登，都仲有好多單身巴打絲打…
行出條街…都仲有d人係一個人…而係正正常常既。
但新年…我諗年三十晚年初一仲係一條友個d…先係真正既毒向左走向右走。
行出條街…成街都紅色…全部一大班人。
一條友個感覺都係唔好受。
而年三十晚年初一上高登…其實…睇真d係少人過聖誕的…
我記得個年既新年…我高登都廢事上…
為左避節(人地避利是…我就唔知避乜)
我一條友買左張機票…去左日本。
係日本買呀食呀…將半年儲到個幾皮野一次過用曬。
不過…買下食下…我發現…根本彌補唔到我既寂寞。
返到香港…個人真係好空虛…乜都唔想做咁。
就係咁…計農曆既話，我既2010年(無記錯好似係)正式開始。
後來，為左專心讀書…我就幾乎無上高登，
無上網無打機…除非好得閒連專家fb都delete埋。
就係咁…個年真係過得好快。
返下工又讀下毒下…同Vicki分手咁就一年。
個年…好平淡…又好寂寞…但我已經無乜動力去改變。
踏入9月…係我同vicki分手一年…亦係我degree第三年…
我原本計劃…加埋之前讀左既credit…三年應該可以畢業…
但呢兩年…我見到既係周圍d同學…都無乜邊個可以三年搞掂…
最耐個個…聽講讀左15年…都未畢到業
當時來講…我比心機讀…都勉強夠分grad…
但又會好辛苦…我d同學都話…返工返學…唔容易…無必要勉強…叫我分多一兩年。
但我諗左好耐…我平時唔返工…就無野做…
又唔出街又無乜娛樂…唔似其它人一係成家立室左…一係要拍拖
不如…博一博…肥左咪算…最後我依照計劃…係最後一年盡地一煲…
我希望一年之內…我可以畢業…然後轉工。
等自己有個新開始。
就係咁…我第三年既degree生涯就開始。
呢一年係最痛苦既…一來返工個面…開始炒人…壓力好大。
二來大學workload好重…好多野做…
所以呢一年我基本上就係讀讀讀做做做。
本來都幾順利…我安然渡過左第一個sem…聖誕…新年…
到第二個sem開始…可以話係我人生中幾大件事…
我記得三月既某一晚…個晚我ot到成一點幾…
我返到我屋村樓下…見到有個男人…成身血…訓左係地下…
我走埋去…見到佢好大鑊…我從未見過咁多血
咁我即刻打999啦…然後望下周圍…都無人
唯有行近少少睇下佢點啦…
我做義工個陣…叫做學過下急救…
點知…佢一隻手捉住我…cool左我埋去(好似係…驚得滯可能記錯)
佢問我…「依家幾點…」
我個陣乜都諗唔到…就睇一睇錶…答佢…「兩點三」
佢聽完就企左起身…走左…
我就O左嘴…想追佢…但佢跑走左…
本來我諗住走人算…
點知警察來到…咁我就同佢地講番…
但佢地已經搵唔番個人…
我同重案d警察錄左份口供…就番左屋企…
我個陣心諗…點解會咁黑…好累…
點知…黑處未算黑
個晚件事…我好快唔記得左…
人生流流長…總會遇到d奇怪事…
我照舊返工返學…
個陣我朝早7點起身返工…夜晚就返學傾野到10點左右
然後12點幾訓
呢種生活都過左好耐下
但唔知點解…過左一個月多d…
我個人越來越累…
越來累無精神…
無耐…我開始周身痛…無胃口…又嘔…
最後…我去左睇醫生…
醫生同我講我有病乜個陣…我真係呆左
因為我都唔知佢講乜春
之後先知大鑊
個次睇醫生…我以為普通感冒
點知份報告出左，佢同我講…話我有『唔知乜B』
我話…咩咩咩B話
佢見我聽唔到…就講番中文…話我有乙型肝炎…
但老實講…我個陣都係唔知乜春來…
我聽就聽過…但實際係乜…我真係唔知
之後醫生問我有無捐過血…有無性交…有無吸毒
我話乜都無…
佢問我有無接觸過其它人既精/血
我先諗起個晚既事
我同醫生講完…佢就話…
可能真係咁…被人傳染左
(當然…到依家我都唔肯定)
佢笑笑口話…香港好多人都有…大約7%…叫我唔洗驚
我問佢點醫…佢話要訓醫院再驗下…
通常…幾星期…耐就幾個月…
個陣我已經好驚
點知佢仲話…
要有心理準備…長期可能會有肝硬化…甚至肝癌。
個陣既我…無太大唔開心…不過好驚…同好嬲…
我好嬲個天點解要咁對我。
就係咁
我無啦啦做左肝乙帶菌者
我唔知道係唔係個晚既事令我咁
但我諗來諗去
都諗唔到第二個原因
好彩既係…我個case係急性…依家算係無事…
個病無變慢性…更無cancer同肝硬化
有巴打話 左個d…應該係慢性
但初期，我真係好灰
日日食藥我都諗…點解個天要咁對我…
個陣…我成身變到黃曬…眼珠都黃埋…
小便係啡黑色的
日日望住自己咁…真係好驚
呢個情況斷斷續續持續左兩個月…我請假請左兩個月…
我亦因為咁…加上公司cut人手，被人炒左
到第三個月某一日，我嘔得好勁…入左醫院
個晚…一個我估唔到既人…來左搵我。
個晚當我係醫院想行開下既時候
(因為探病時間…個個都有人探我無…我就避開下 )
我見到薑伯來探我
原來佢由加拿大番左來
我之前keep住同佢有傾下電話…話比佢知我既情況…
佢見打比我打唔通…又近醫院…就過來試下搵
點知我真係係度。
個刻…我真係唔知開心好…定失望好。
薑伯來探我…我真係好開心…
但老實講…咁樣只會令我更自卑…
咁大個仔…入醫院…來探我既得一個…唔算話好熟既朋友
其實都幾失敗
你可能會話我負面…但我真係控制唔到自己咁諗
個晚我同薑伯傾左一陣…傾左Vicki…傾左我唔開心既野…
薑伯安慰左我好耐…仲話第二日會再來
佢走左後…我諗…如果佢係我阿爸…咁就好了
就係咁…係我病個段時間…薑伯一路都有來睇我。
我後來出左院番左屋企…佢都有上來陪我食下飯…睇下波咁。
過多大約一個月…我已經好番好多。
但…我既生活就搞到亂曬。
首先…我無左份工，因為公司炒人炒左請假既我。
然後…我病個段時間…完全做唔到degree既功課，最後肥左幾科。
我三年內拎到degree既目標…最後因為一個突如其來既病…而失敗告終。
完全好番個陣…已經係六七月。
無左份工…又唔洗返學…我日日就係度打機…send CV…上網
好可惜…我搵左好耐都搵唔到工。
呢種感覺又好似返返以前…我走投無路要洗廁所個陣咁。
當然…只係感覺。
靠我儲落既錢…要捱一排都無乜問題。
後來，到左八月…我收到一個電話叫我去interview。
個電話係由一間學校打來。