[校園][應該純愛][友情]「我想要你，仲有你既世界。」: 錯過

「錯過」
 
「或者，係我誤會左佢，世事真係可以咁巧合。」
 
「若然當日我無掛住同若睛吹水，我就唔會只係同佢擦過。」
 
「如果我肯做多少少，我地既結局或者唔會咁…」
 
可惜既係，一切都只係如果，若然呢D假切性既野。
 


佢地兩個，就咁錯過左，係一點交疊過之後就此錯開，再無交會點。
 
其實大概係兩年前開始，我就應該察覺到件事有古怪。
 
阿妹連續兩年無搵我，我就應該主動去搵佢，問佢係咪有乜事。
 
所有野都係我唔好，係我無做好自己應該要做既事先會搞到而家咁。
 
若然我有做多一步，問阿妹發生左乜事，做乜突然唔搵我，或者就可以解開佢既誤會。
 


係我既錯，令我兩個最愛既人無法繼續相愛…
 
明明佢兩個係鐘意對方，仲等左對方五年，但就只係因為一個誤會同埋擦過，而錯過左一切…
 
如果當時我係果度…
 
「喂，過黎幫手啦。」
 
魯路修一句說話將我拉返去現實。
 


我：「咩事？」
 
魯路修：「幫我拎出邊果兩個紙箱入黎。」
 
我：「哦哦。」
 
最近佢都一直係執野又pack箱，唔知佢搞乜。
 
果日之後佢既反應平淡得出奇，簡直就好似無野發生過咁。
 
唔係佢中學同學話我知我都唔會知原來阿妹無係佢地既「約定之日」出現。
 
正常黎講佢應該會好唔開心，喊到豬頭咁先係架嘛，但佢咩反應都無，同平時一樣咁生活。
 
咁樣我反而仲驚。


 
我寧願佢喊出黎，等我知道佢係唔開心，總好過而家咁，我唔知佢諗緊乜。
 
我拎住兩個紙盒入佢房，發現佢間房好亂，一地都係野。
 
我好快就發現係地下既野都有一個共通點。
 
全部都係有關阿妹既野。
 
我：「喂魯路修..你想做乜…」
 
魯路修：「嘛…執走D無用既野囉…」

無用既野…？
 


我：「喂你覺得呢堆野無用？呢堆都係…」
 
魯路修：「啊我知道啊，但係都過左去啦。」
 
我：「喂…」
 
魯路修：「既然佢都叫我要幸福，咁我都要向前行先可以。」
 
佢接過我手上既紙箱，開始一件一件咁將地下既野放入箱。
 
我：「咁你即係會dup哂佢？」
 
我唔知點解直接就講左出黎，明明自己覺得唔應該講。
 
不過，我收到出乎意料既反應。


 
佢突然停哂手，好似停左格咁。
 
唉，傻仔…
 
明明個心就係放唔低，但又要迫自己放低。
 
阿妹啊，你係邊啊…
 
魯路修最後並無dup到箱野，只係將佢收起衣櫥頂。
 
之後既日子，我都搵唔到阿妹。
 
佢改左電話，搬左屋，Facebook同ig都block哂我地。
 


直頭可以話係消失左係我地既生命入面咁。
 
非常之絕情，居然可以狠到去呢個地步，到底係因為咩事…
 
之後好快又過左七年，魯路修都步入30歲。
 
呢幾年，佢都係幫我打理café，等我唔洗一個人顧兩間鋪。
 
最近呢一年，我見自己打理開果間開始上軌道，所以我決定交俾我班班底打理，我返去魯路修果間。
 
我以為咁會令魯路修無所事事，但原來唔係。
 
原來佢已經成為左呢間鋪既招牌之一。
 
班常客話我知，魯路修佢近呢幾年唔止管理間鋪，仲有份沖咖啡。
 
我好奇問下佢地乜魯路修沖咖啡真係咁好飲咩，居然會有fans，仲要大部分係女人。
 
本小姐我都未有fans，佢居然會有，唔通真係青出於藍？
 
D客就答我唔只咖啡好飲，咖啡背後既故事仲好睇。
 
聽落去原來魯路修佢最近一年開始寫一個故仔，叫做「我想要你，仲有你既世界。」
 
呢個故仔每日下晝三點會出新一篇，買一杯咖啡就有一份hardcopy送，送完就無。
 
我開頭以為個死仔咁識搞gimmick搞旺個場，令每日都咁多人黎幫趁。
 
直至我係櫃檯見到今日會出既新章，章名叫「開玩笑」。
 
我好快就睇哂，個心不禁寒左一寒。
 
呢個對佢黎講並唔係一個虛構故事，而係佢親身經歷過既事…
 
你仲係放唔低..所以決定寫出黎？
 
三點鐘就快到，佢亦係café既窗邊位起身，帶住部macbook慢慢走向水吧。
 
佢將macbook放入自己既袋，之後就行左去櫃檯整理一陣要派既hardcopy。
 
搭正三點，客人開始排隊，條隊好長，好似等吉野家下午茶咁。
 
當中大部分係女性，有學生又有OL，都有男人既，後生仔特別多。
 
「唔好sad end呀。」
 
「俾佢兩個係埋一齊啦。」
 
「sad end既以後唔黎架。」
 
呢D都係客人落單既時候同魯路修講既野。
 
你地都係因為唔知呢個故事係真既先可以咁輕鬆咁講出黎…
 
佢又何嘗唔想自己可以有個Good Ending?
 
但魯路修無任何表示，只係不斷隔住個口罩講多謝，然後就去沖咖啡。
 
魯路修你個傻仔…你知唔知家姐真係好擔心你…