[校園][應該純愛][友情]「我想要你，仲有你既世界。」: 願記住此刻
暫時所有野都好順利，無任何阻滯。
無咩唔見行李，過唔到關之類既事。
我地三個好順利咁到達日本。
一踏上日本既土地，我難掩興奮之情，笑左出黎。
「日本啊，我又返黎啦。
」 令人興奮既並唔止係黎到日本咁簡單，而係有佢係度。
可以同個咁靚既女友同遊日本，實在係太令人興奮了吧。
美星：「喂魯路修，推行李上車。」
嘖，美中不足既有佢係度。
佢知我係大部分情況下都唔會係Cherry面前發脾氣，今個trip肯定會洗死我。
唔知Cherry係咪見到我既表情，主動走過黎話幫我手。
Cherry：「我幫你吖。」
我：「唔洗，呢d小事我搞得掂。
」 緊係唔可以俾佢幫啦，我係男人黎架。
不過都係有d重，地球既重力真係麻煩。
我地坐巴士直到酒店，打算先放低行李再決定去邊。
Check in呢家野交左比美星負責，因為好似要俾錢先。
我同Cherry就坐左係lobby，望下呢間酒店既裝潢。
衰鬼，又幾大幾靚喎，美星條友又幾識揀。
Cherry：「哇呢度好似好大。」
我：「這是當然der，要襯得起你呢位美女，當然要一間又大又靚既酒店啦。
」 趁機會調戲下佢先。
Cherry：「又口花花，咁一陣你plan左咩行程吖？」
我：「第一日我無plan行程吖..都唔知幾點先到，唔敢亂plan。」
呢個時候美星係counter行返過黎，睇個樣應該已經搞掂哂。
好快有兩個bellboy唔知係邊度彈出黎拎走左我地既行李，仲叫我地跟住佢地。
兩位哥哥帶我地去搭lift，仲引領我地去到房間，鞠哂躬先走。
日本人真有禮貌，I love Japan。
唉都係唔好講咁多，快d入去放低行李洗個臉先。
美星好似都有呢個諗法，拎左兩張匙卡出黎。
但佢望住我，唔係，係望住我同Cherry奸笑，令我有唔好既預感。
美星：「喂你兩個係咪要同一間房[hehe] 」
屌，叫我呢D純情小毒撚點答。
呢個問題由屋企人問真係特別尷尬。
之但係，今次個trip既目的完全唔係為左呢d野，只係純粹想開心咁玩。
所以我好快好決斷咁答佢。
「你都shortshort地，老子我要自己一間房，sorry喇Cherry，要你同個麻煩友一間房~
」 咁答係最好既，尤其係配合我果種好摟屌既語氣。
我一手係美星手上拎走哂所有匙卡，逐張試下開門，之後將開唔到門既卡比番美星。
成個過程我都無望過佢地，可能係我怕羞掛。
入到房，嘩，正，大床，仲要兩張，D野鳩放都得。
我洗左個臉就撻落張床度，哇軟棉棉好舒服。
挨左一陣，好似半個鐘左右，房既電話就響。
我：「喂？」
美星：「喂，差唔多五點半啦，出去行下之後食野啦。」
我：「哦，我隨時行得。」
美星：「咁就行啦。」
佢無等我覆就收線，真係無禮貌。
之後我地三個就離開酒店，向新宿站果邊行。
果邊沿途都幾多野行，有間類似百貨公司既野叫yodobashi，有幾棟building，好多野行。
淨係賣玩具都有一棟獨立building，真係世界級，我決定要觀摩一下。
哇，正，地底成層都係賣模型，好想買哂返屋企。
唔得，要忍手，呢d香港都有得賣，之後仲會去中野，到時先買。
「喂，你行得未？」
咦有人講廣東話既？有香港人係度？
唔係喎，呢把聲係？
我回頭望下，原來係美星。
我：「搞乜呀，唔係話六點半係十字路口等咩，你話要同Cherry佢睇女人野嘛。」
美星：「而家七點啦哥仔。
」 七點？我望下隻錶，咦又係喎，行到唔知時間添。
我：「Sorry囉，行到唔知時間，但你又知我係度既？」
美星：「阿妹話你一定會係賣玩具既地方，所以我地咪黎呢度搵你囉。」
咁都被Cherry估到，認真厲害。
我不禁搖頭嘆息，呢個女仔實在太了解我。
我：「咁行啦去食飯啦，佢係邊？」
美星：「果度。」
佢指住我右邊，我望過去，見到佢拎住盒野。
我走埋去睇，又係小埋，佢究竟有幾鐘意小埋？
我：「做咩吖？」
Cherry：「lulu你睇！呢隻Umaru好多配件又多表情，好得意吖！
」 佢對眼發哂光，好似叫我買比佢咁。
我係佢手上拎走盒野，係幾得意既，4700Yen唔算貴，買比佢啦。
不過就算係貴，我都會買比佢架啦，鬼叫我想見到佢開心個樣咩。
我一隻手拎住盒野，另一隻手拖住佢走去Cashier比錢，途中一句野都無講，直至上返地面。
我將盒野交俾佢，佢好似仲未load到。
我：「拎住啦傻婆。」
Cherry：「人地都無話要買，你做乜亂洗錢啫。
」 吓？你講呢d？你頭先明明俾哂signal我叫我買架喎！
Cherry：「不過既然唔買都買左咯，我就勉為其難咁收左佢啦。
」 呢D係咪就係傲嬌？我第一次見。
之後我地就去食飯，一間係樓上既居酒屋。
可以同你講，就算唔識日文都可以叫到野食，因為果度有好多台灣大陸留學生打工，你用國語都OK。
叫左好多野食，食到好飽，爽，無得頂。
Cherry仲要一邊食一邊開隻小埋黎玩，明明頭先仲鬧我亂買野，真係無佢收。
埋單大概六百幾港紙，抵過食和民，只係feel都贏哂。
食完我地就捧住個肚行返酒店，Cherry就繼續攬實盒小埋，可惡好妒忌，早知真係唔買。
行到去間Familymart，美星突然停低左，引起我地兩個注意。
我：「咩事？
」 美星：「魯路修，你有幾多張匙卡係身？」
我：「兩張拎哂出黎囉，做乜？」
美星：「俾一張我，我帶左一張出黎only，但我想係度嘆杯咖啡先，你同阿妹返酒店先啦。」
係度講句先，匙卡除左開門之外，亦都係用黎搭lift上客房的。
我：「麻煩，拎住啦，自己一個人要小心d，有咩Whatsapp我啦，雖然我唔會救你。」
美星：「得喇走喇，我未淪落到要個細佬救我。」
嘖，態度真係差。
佢拎走我一張匙卡之後就走入FamilyMart，我同Cherry就繼續返酒店。
由於佢攬住盒小埋，無手比我拖，所以我只可以雙手插袋咁行。
我無聊抬頭望個天，咁岩月亮係正我面前。
我：「三日月..」
Cherry：「真係好靚呢，I mean個月亮。」
我即刻望下佢，原來佢都望緊個天。
我笑左一笑，再望返個天。
「嗯，真係好靚，希望我可以記得呢個時刻。」
「我就一定會記得啦，個月亮咁靚，仲要有你係我身邊。」
衰鬼又講埋d咁感動既野，不過我唔會咁易喊既。
之後我地就上左樓，係兩間房前道別。
我：「同美星講聽朝10點出去食早餐啦，早抖啦，聽朝見。」
Cherry：「嗯，聽朝見。」
我目送住佢入房我先入房，之後就沖涼刷牙睡覺。
第朝我係自然醒，可能因為早訓啦。
望一望個鐘，而家先九點半，仲係太早。
等我感受下日本既陽光先。
我一手拉開窗簾，哇，好靚既陽光，好靚既城市。
「おはよう，日本。
」 我對住個窗咁講，諗落都覺得自己傻仔。
「おはよう…」
咦？有聲既？
邊個！？
我擰轉頭一睇，見到有兩隻手係另一張床上既被入面伸出黎。
我：「邊個？」
「おはよう，魯路修。
」 呢把聲係..
果兩隻手拉開D被，果然無錯，係佢…
係Cherry。
點解Cherry會係我間房！？