[校園][應該純愛][友情]「我想要你，仲有你既世界。」: 受夠了
之後我地再去左兩個地方參觀先返酒店。
大概四點左右就去到酒店，我地係lobby等左陣，等班老師幫我地安排D房。
等緊個陣晨哥坐左係梳化度，雙手抱胸仲合埋眼，感覺好重殺氣，令人生畏。
Ray係等緊分房既時候由另一邊行緊過黎，仲帶左三四個人過黎，當中有子琪。
唔知係巧合定點，Ray行到晨哥前面個下晨哥就張開返眼，望住Ray。
晨哥：「睇黎你已經諗好要鬥咩。」
Ray：「岩岩check左呢到有個室內籃球場，就鬥籃球啦，3on3。」
晨哥：「幾驚你話鬥包剪揼，但3on3？哦，係想輸左都可以賴落隊友度呢。」
晨哥永遠對敵人都係咁咄咄逼人，毫不留情呢。
Ray：「睇你可以串幾耐，我請左其他學校既組長做裁判以示公正，麻煩你地講D規則比佢知。」
Ray講個陣望住子琪，睇黎係子琪做裁判。
子琪：「eh…雖然我唔係好清楚發生左咩事，但我會將呢場比賽定性為友誼賽，大家唔好傷和氣。」
晨哥：「睇黎你無好好同人講清楚究竟係咩事喎。」
子琪：「晨你等我講埋先，我而家講規則。」
「各組組長過黎拎匙卡啦~」
有一個老師企係接待處旁邊大叫，仲起勢咁揮手。
晨哥：「魯路修，你去啦。」
我：「唔好命令我。
」 講係咁講，但我已經行緊過去。
接過匙卡我準備返去架啦，但突然屎忽痕，想走去櫃檯問下籃球場洗唔洗book。
我用一口不太流利既普通話問個姐姐，籃球場洗唔洗book。
姐：「要架，你係咪要book？」
嘩，D廣東話仲正過金剛，屌我又柒左。
我：「係呀唔該你。」
姐：「咁你係呢度簽個名啦，七點鐘開始無人用架啦。」
我：「唔該哂。」
簽左個名，我就拎住張租場紙返去派匙卡，原來佢地已經傾好準備散水。
我：「搞掂啦？」
晨哥：「未，今晚七點就搞掂佢。」
最後我同晨哥一間房，隔離房係Cherry同若睛。
呀，我有預感一陣會搞到好麻煩。
上到房放低袋，我成個人訓上張床度，合埋眼乜都唔諗。
可惜同房既係晨哥，係而家好認真既晨哥，佢不停摷緊佢個袋。
我：「晨哥你搵緊D乜啫。」
晨哥：「我好似無波衫，唉算啦。」
佢又將D野塞返哂入個袋度，走左入廁所。
正當我以為終於可以訓番陣個陣又有人㩒鐘。
屌我想訓覺啫，有錯咩係都要阻住我。
打開門一睇，係幾個唔識既女仔，樣OK，應該係其他學校既。
我：「搵錯房啦，Bye。」
女A：「呢度唔係藍洛晨間房咩？」
哦，又係搵晨哥，真係受夠了。
我：「晨哥，有幾個女仔搵你喎。」
我敲敲廁所門。
唔夠十秒晨哥就由廁所行出黎，頭上仲有條浴巾。
晨哥：「邊位？」
唉又有女，我都費事理佢，自己死返上張床度抖。
晨哥之後叫醒我，話夠鐘食飯。
不過根本無人care餐飯，個個都只係想快d睇波同食花生。
七點鐘，晨哥帶住我地九個人去到室內籃球場，門口聚集左好多人，個個都係團友。
Chris：「做乜企哂係度唔入去？」
子琪：「個人話而家有人book左個場喎。」
晨哥：「喂喂喂，又要挑我機，但連場都唔book？」
晨哥再一次嘲諷阿Ray。
我醒起自己有帶住張租場紙，於是就拎左出黎比晨哥。
晨哥見到張租場紙好似完全無驚訝，仲舉高佢。
晨哥：「好彩我兄弟醒目，如果唔係就要大家失望而回了。」
而家晨哥係氣勢上有絕對既優勢。
大家入到去，圍住個場分開兩邊企，我就同Cherry仲有若睛搵左排櫈坐。
終於都要開波了。
嗱，我好耐之前都有講過我唔運動，所以我係唔識籃球既規則。
今次聽Cherry佢地講話場波打十分鐘打全場，聽落都覺得辛苦又麻煩。
晨哥係開波前突然提議邊個輸左就要吠三聲，又刺激阿Ray。
晨哥話比阿Ray佢地開波先，當讓下佢地。
比晨哥羞辱左咁多次既阿Ray一開始就好似入左油咁帶住個波起勢衝去籃底。
我：「嘩，佢又跑得幾快喎。」
契弟A：「睇清楚D先啦，晨哥已經捕住佢啦。」
我再望下晨哥，哇原來已經搶左個波走仲上埋籃拎先制分。
我：「我唔識打籃球真係好彩。」
Cherry：「好似好刺激咁，應該好易整親，我寧願你唔打。」
話口未完晨哥又cut左阿Ray波，引起旁邊女仔既尖叫。
只係過左三分鐘，晨哥一個人已經拎左五分，佢好似好enjoy咁。
相反，阿Ray果邊有兩分，仲要唔係阿Ray拎。
我：「我開始明點解佢成日話自己係奇蹟的世代，佢真係勁。」
契弟B：「一來啦，二來佢真係好識玩心理。」
我：「咩意思？」
若睛：「佢意思係，晨哥故意激阿Ray，等阿Ray每次都同佢1on1，咁就更加易睇穿。」
原來如此，所以話唔玩玩下既晨哥真係好勁。
而家咁啱阿Ray又衝向晨哥，好似想撞死人咁既款。
佢今次終於突破到晨哥，但唔知係咪地下滑定佢對鞋問題，佢突然仆低左，kiss左塊地。
全場都靜左。
晨哥一於小理，執起個波pass比阿Roy，又拎兩分。
仲有三分鐘，比數係12：6，阿Ray仍然無得分。
但而家晨哥都無入認真mode，應該無得輸。
不過阿Ray kiss左塊地之後好似冷靜左，進攻慢左，而且唔再只衝晨哥。
佢今次揀Chris落手，扭過之後就上籃，第一次拎到分。
唔知點解Chris俾佢過左之後表情好痛苦咁，係咁叫暫停。
我：「阿Chris搞乜呀，抽筋？」
Cherry：「我好似見到佢俾人踩左下腳..」
哦，原來係個卑劣既渣渣。
Chris最後都係退左落黎，變成2對3。
阿Ray個邊由阿Roy果度落手慢慢咁追，最後一分鐘已經14：12。
我諗認真mode都差唔多係時候要出黎。
我望一望晨哥，果然，眼神唔同左。
不過2對3，真係有得打？
阿Ray佢地三個一齊慢慢壓上去，但反而俾阿Roy偷到波，交左比晨哥。
波一到晨哥手，晨哥就衝到上三分線，之後就起手射波。
三分波。
17：12。
應該贏了，而家得番二十秒，又唔係睇《黑子》，五分應該無得追。
點知阿Ray仍然唔放棄，帶住波衝。
不過佢無射籃，而係掟左個波去晨哥度，晨哥個陣仲要背向個波。
幾乎全場既女都同時大叫「睇住呀！」。
但晨哥唔知點解接住左，好似上次閃避球咁令人出其不意。
晨哥：「卑鄙，垃圾，我受夠啦，消失啦。」
佢突然係自己籃底擺左個射籃姿勢。
Serious？你真係有練過？
但子琪突然話時間已到，比賽結束。
「聽日早餐個陣記得吠比我聽。」
晨哥照出手，之後頭也不回咁行去扶阿Chris走。
個下射籃最後入左。
大家見場波打完就散band，留低Ray一個on99咁望住個波。