[校園][應該純愛][友情]「我想要你，仲有你既世界。」: 試驗

「勝利係永遠屬於我既，但今次，我唔介意將勝利送俾你。 」 

晨哥喘哂氣對住阿欣咁講，睇黎佢今次真係搏到盡。 

哇，我係女一定冧，而阿欣都應承左。 

兩個一直互相注意既人終於都走埋一齊。 

陸運會既過去提醒我地要開始重拾學業。 



我記得今次UT有頭二十名既話就可以免役補課，所以我要努力。 

另一方面我都想知自己可以去到邊，今次UT會係一個好既試金石。 

每日上堂我都好專心(某D堂)，用自己既風格去讀書——唔抄筆記，只用腦記。 

Cherry見到我咁專心上堂都好開心，仲叫我以晨哥做榜樣去努力。 

佢咁講令我諗起自己之前既幻覺。 



「記住，你冇可能成為好似藍洛晨咁既神。」 

哈，我仲有小小自知之明既。 

我只要做自己做到既野就夠了，無必要模仿人啦，我就係我。 

Cherry：「喂，好似好耐無同你出街啦傻佬。」 

Cherry一句野打斷左我係英文堂既冥想。 



我：「唔…咁係冇乜好地方好去呀嘛…」 

Cherry：「你學下人地晨哥啦，每個星期六日都同阿欣出街架！」 

我：「咁又係你叫我努力讀書既，神又係你鬼又係你啦。 」 

Cherry：「哦，係我唔好啦咁，咁算啦，冇野好講。 」 

呀，做乜事啊佢，M到？咁好火既？ 

我：「乖啦，我今次想考好個UT呀，最多復活節同你去玩啦。 」 

Cherry：「算啦，我都係講下笑啫，我都想你考好個試。」 

呼，想嚇死人咩。 



但我見佢雙眼有少少失落，睇黎我遲下真係要抽多少少時間陪佢。

最近我都冇乜時間陪佢。 

除左溫書之外，晨哥仲指派左好多野比我做，又要同佢去開會又剩。 

搞到有時放學都冇得同佢一齊走，可以陪Cherry既時間只剩低返學。 

好彩Cherry都諒解我，無講D乜。 

今日又係咁，晨哥又要開班會。 

晨哥：「吖~今日我有少少趕時間，快D傾完就散啦。」 



忙你又要我地開會。 

我地好快咁匯報左班會既狀況，晨哥都就此作出左反應。 

「今年90%係我地班贏了，但大家都唔好鬆懈，好，散會。」 

我望下隻錶，而家先五點二，Cherry應該未走既，快D去搵佢先。 

我即刻拎袋準備衝出門，點知俾人叫住。 

晨哥：「魯路修，你留低，有野同你講。」 

我：「唔得呀，我想同Cherry一齊走。」 

晨哥：「坐低啦，芷睛會等埋你架，我叫左阿欣同佢傾偈留住佢。」 



咁就即管聽下佢有乜想講。 

我：「咁你講啦。」 

晨哥：「聽我班朋友仔講，你最近好似好少陪芷睛喎。」 

肯定係B班班八婆。 

我：「無計啦，我想考好個UT免役補課嘛，咪搞到冇時間陪佢囉。」 

晨哥：「真係只係為左免役補課咁簡單？ 」 

呀，吉痛我既痛處添。 



晨哥：「我估你係想透過成績展示俾人睇，自己可以配得起芷睛。」 

佢講既野完全正確，我無得反駁。 

晨哥：「真係幼稚，但係好事。」 

我：「吓？」 

晨哥：「你就好好努力啦，一個幼稚既理由有時可以帶黎意想不到既後果，但你要記住，你女朋友會因為你成績好而開心，但你唔會因為成績好而有女朋友。」 

哇，又係一個道理，佢意思係叫我要多D陪Cherry？ 

我：「晨哥，我可以問你一個問題嗎？」 

晨哥：「唔？可以啊。」 

我：「你同阿欣一齊之後，應該會有人認為阿欣配唔起你架，你會點做？」 

晨哥：「呢個問題好簡單啫，邊個夠膽話我揀既人配唔起我，我就教訓佢。」 

哇，霸氣既回答。 

晨哥：「根本唔需要在乎其他人既目光，如果唔係既話，只會令自己活得唔似自己。」 

晨哥企起身，拎著個袋行去班房門口。 

「呢個UT，可能對你兩個係一個小試驗。」 

佢講完呢句就走左。