[校園][應該純愛][友情]「我想要你，仲有你既世界。」: 抱歉
睇完晨哥個Whatsapp我嚇到訓唔著。
佢見到我？
呢個人簡直就好似無處不在咁，無野可以逃過佢對眼咁。
佢講既野，簡單而有力，提醒左我。
貪字得個貧。
我應該要好好珍惜而家有既野，而唔係追㝷更多。
第二朝，我好早起左身梳洗，望一望出面，屌又落雨。
個天都唔想我過一個好情人節？
呢個時候美星係佢房行左出黎，應該係岩岩訓醒。
美星：「唷？咁早起身既你？而家出去？」
我：「冇咁早出，早少少起身等個人精神D啫。」
美星：「哦~同阿妹玩得開心D，家姐私人醒你既。」
佢拎左張五百蚊紙放係枱面，之後就入左廁所。
佢對Cherry 仲好過對我呢個細佬。
我收下呢張五百蚊，返入房揀衫。
今日天氣都比較凍，加上又落雨，都係著多件衫好。
就算Cherry凍都可以即刻有䄛比佢嘛。
衫就揀好哂，但好似仲差少少野。
我望一望書枱，上面有尋日條頸鏈。
戴唔戴好？
我戴左上身，照下塊鏡，嗯，幾好睇，就戴住啦。
約左Cherry佢十二點，而家十一點，早少少出去啦。
一落到樓下，我見到晨哥擔住把遮企左係度。
我：「晨哥，點解你係度？」
「將你頸上既野交俾我。」
我摸摸我條頸鏈，再望下晨哥。
毫無疑問佢而家係認真狀態，但點解佢要我條頸鏈？
我：「呢條頸鏈？你要黎做咩？
」 晨哥：「唔係我想要，而係你唔可以有戴住佢去見芷睛。」
我：「咁係咩意思？」
晨哥：「我係為你好咋
，你咁做同掛個炸彈係條頸冇分別啊魯路修。」 我：「唔係好明，講清楚D。」
晨哥：「你戴住另一個女仔送既野去見女朋友，你話有冇問題？」
呀！我竟然注意唔到呢D咁基本既野！！
但係點解晨哥知我會戴呢條鏈？
我：「晨哥點解你會知我會戴呢條鏈？」
我一邊講一邊摸住條鏈。
晨哥：「你理得我點知？條鏈交俾我保管啦，你約左芷睛架快手d啦。
」 望一望隻錶，屌原來已經十一點三，真係要快手D。
晨哥講既野都有道理，戴呢條鏈去見Cherry真係唔恰當。
我除低左條鏈，交左比晨哥。
晨哥：「真係想搵D野比條頸既就用佢比你條頸巾啦，我仲約左人，走先啦。」
佢講完就走左去。
都好喎，戴番個條頸巾比Cherry睇。
咦？咪住先！佢點知Cherry有比條頸巾我架？
佢點解好似真係乜都知？
經過少少插曲，我差少少就遲到。
Cherry已經到左，我離遠已經見到佢。
我：「Sorry要你等。」
Cherry：「係囉你要我等真係好衰囉。
」 佢橋起對手係度扮嬲。
我：「係啦係啦係我唔好啦，行啦我地。」
Cherry：「我地要去邊？
」 我：「不要問，Follow me。
」 我捉住佢隻手，拖佢走。
我先帶左佢去食lunch，食完之後就入左馬鞍山。
我事先查過，馬鞍山有唔少地方都幾靚，尤其係個舊心形石。
我地選擇坐巴士入馬鞍山，車程都幾耐下。
但我覺得情侶一齊坐巴士係一件幾浪漫既事。
係巴士上層，我讓左個窗口位比佢坐，自己坐走廊位。
佢挨住我膊頭，望住窗外既風景。
Cherry：「我都好耐冇去過馬鞍山啦…」
我：「我都好似有五年冇入過去了。」
Cherry：「喂吖你條頸巾吉到我呀，拎開D啦！
」 我：「你織架喎。
」 Cherry：「我知吖，快D拎開啦我想訓陣啊。
」 我：「YES YOUR Majesty。」
我將頸巾撥向另一邊，等佢可以完全挨落我左邊膊頭。
好快佢就訓着左，直到要落車我先叫醒佢。
我地係個個有旋轉木馬既商場落左車，一落車就已經感受到寒風既威力。
我：「你凍唔凍呀？」
Cherry：「個身唔凍呀，係隻手有少少凍囉，俾我拖你啦~
」 佢伸左隻手出黎，上面有上次我送既戒指。
我笑左一笑，伸出我隻手作回應。
佢冇呃我，佢隻手真係幾凍下。
我兩個手拖手咁行入個商場，屌咁撚多人既。
佢上到去商場一見到個旋轉木馬對眼就發哂光咁。
佢唔係想要玩啊嘛？
我：「行啦小姐。」
Cherry：「我想玩！
」 仆街。
我：「你睇下排隊既全部都係細路黎架
，乖啦行啦最多下次同你去OP或者迪士尼玩啦。」 Cherry：「你會同我去？
」 我：「信我，我會帶你去。
」 Cherry：「好，你話架！行啦我地。
」 一句用黎解脫既說話，差少少令我悔恨一生。
穿過天橋，我同佢黎到馬鞍山公園。
成個公園都好靚，仲有好多細路係度跑黎跑去。
行行下，我地已經行到海濱長廊。
Cherry：「你帶我黎究竟做咩架？睇海？」
我：「係就係睇海，不過唔係係呢度睇，繼續行啦。」
Cherry：「好悶啫我寧願去玩旋轉木馬~
」 仲講緊旋轉木馬，頂佢唔順。
行多一陣，我終於帶佢去到今日既真正目的地，心形石。
行到去既時候，已經黃昏，個天一片橙黃色。
原來雨係不知不覺間已經停左，算你啦老天爺。
心形石同埋個海係黃昏下顯得特別靚。
岩岩行到黎就遇上如此美景，完全係Perfect Timing。
我：「個view靚唔靚吖傻婆。」
Cherry：「哇…」
佢望住個海，張大個嘴。
我：「情人節快樂。
」 Cherry：「啊！情人節快樂！
」 佢好似望得太過入神，被我嚇親。
佢打開佢個袋，係咁摷摷摷，最後拎左兩盒野出黎。
佢先遞其中一盒俾我。
Cherry：「嗱，俾你架！情人節禮物呀！」
我：「咁另一盒唔係我架？」
Cherry：「貪心！拆左呢盒先講啦！」
我：「好好好。」
我拆開一睇，係朱古力曲奇。
今次係我第二次收到Cherry整既曲奇。
今次同上次有D唔同，曲奇上面有我個花名「lulu」。
我：「哇…」
今次輪到我望到入哂神。
Cherry：「快D食啦，今次我連茶都準備埋啦！」
我：「茶？
」 佢又係個袋度拎左支伊藤園茶出黎。
上次我隨口話食曲奇要搵茶送，估唔到佢當真。
討厭，我又被感動了。
我同佢搵左個石級坐低，再擰開支茶叫佢飲，自己就食曲奇。
Cherry：「吓我買比你飲架喎。」
我：「飲啦，行左咁耐你都應該口渴。」
佢望左支茶一眼，再望一望我，就開始大啖大啖咁飲。
到佢再比番支茶我既時候，支茶已經冇左四分一。
我隨便飲左一啖，順手沖走口入面D曲奇碎。
Cherry：「哦！」
仆街突然大叫搞到我差D噴茶。
Cherry：「你飲左我口水尾，你要聽哂我話。
」 呀，我就係等佢呢句。
我：「不嬲都聽哂你話架啦。」
講完我就一啖錫左落去。
日落之後我就同佢去離開馬鞍山，出沙田搵野食。
因為我知馬鞍山作為一個劣食天堂是十分有名的。
去年到沙田新城市，人山人海，我仲俾D喼撞左幾下。
D人大至上可以分成兩類，大陸人同情侶。
我：「呀呀呀，咁多人真係麻煩！
」 話口未完我又俾人撞到。
Cherry：「係咁架啦，新城市不嬲都係咁，更何況今日。」
好辛苦先迫到去另一邊，pepper lunch門口。
更令人叫苦連天既係要等位。
我超憎等位。
等位種心情令人好矛盾，明明仲有十個八個就到我，但我偏偏唔想再等落去。
等位既時間應該同睇《龍珠》悟空變超級撒亞人3鳩叫既時間差唔多。
係我都就快變到超三個陣，Cherry行左入去。
原來終於有位了，仲諗住變個超三比佢睇下添。
食野既細節就唔多講了，我只想講一句，
佢食野真係好快，仲好似永遠都唔識飽咁。
食完之後，我地又繼續行街。
Cherry：「哇哇好飽好好食。
」 我：「我唔覺得你飽囉…
」 Cherry：「咁食多少少我都ok既。
」 話左架啦。
行行下，我地去左沙田大會堂。
個天又開始落起毛毛細雨。
我望住大會堂，突然諗起「結婚」呢兩個字。
我：「喂..」
Cherry：「呢個俾你。」
佢打斷左我講野。
佢遞左個盒比我，係今日未比我個盒。
我：「我可以拆？
」 Cherry：「當然，我都想你拆。」
我即場拆開個盒，入面係一條頸鏈，仲穿住隻戒指。
居然會係頸鏈…
唔通晨哥咁䣠估計到？
唔會既，我諗太多了。
我：「點解會係頸鏈，仲穿住隻戒指既？」
Cherry：「上次你送戒指俾我嘛，我咪送番隻戒指比你囉~唔鐘意？」
我：「唔係，我好鐘意，多謝哂。」
我即刻解開頸巾，換上頸鏈。
Cherry：「鐘意就好，我都差唔多要返去啦，學校見啦。」
講定唔講好？
唔講我怕後悔。
我深呼吸，衝上去從後攬住佢。
Cherry：「做乜啊傻佬？
」 我：「永遠同我係埋一齊好冇？」
佢冇即刻答我，但我feel到佢個身震左一下。
Dead air維持左兩分鐘左右，由佢用力推開我雙手打破沉默。
「抱歉，我唔想呃你，我而家真係唔可以應承你。」
唔？咩話？
佢講完就一支箭走左去。
我無追上去，因為我根本搞唔清楚而家發生咩事。
我只係望住佢既背影遠去，就好似個夢咁。
我自以為已經開始了解佢，以為佢願意永遠同我係埋一齊，但原來我只係自作聰明。
突然覺得佢好陌生，好似回到第一次見佢個時咁。
雨開始愈落愈大。
果然，老天爺很討厭我嗎？