[校園][應該純愛][友情]「我想要你，仲有你既世界。」: 聖誕
聖誕又到，往年我一定同師父班契弟係平安夜打機打通宵。
但今年唔同，今年我要陪Cherry。
雖然咁樣離棄兄弟有少少唔好意思，但魚與熊掌不可兼得，我冇辦法。
數數下，原來我同Cherry已經一齊左三個月。
三個月，唔長唔短，但好似已經經歷左好多野。
開頭對佢完全一無所知，到而家加深了解左好多。
雖然佢好似仲有好多野我未知，但我無所謂。
而家既我，可以同佢一齊就夠。
原來係不經不覺之間，我都改變左唔少。
至少我多左自信。
23號晚，我收到Cherry既Whatsapp。
Cherry：「點呀，聖誕冇人約呀~？
」 我：「有呀。
」 我：「約左你。
」 Cherry：「幾時有應承你
」 我：「咁無辦法啦，我聖誕唯有自己過啦。
」 Cherry：「乞人憎，你明知我會搵你。
」 我：「嘻嘻，咁你想去邊？
」 Cherry：「未諗啊，平安夜周圍都多人既。」
我：「SAD BUT FUCKING TRUE。」
Cherry：「又講粗口。
」 我突然靈機一閃。
我：「喂，不如我地去返個個公園倒數？」
Cherry：「學校後山個公園？
」 我：「係吖好冇？」
Cherry：「好吖，個度幾特別。
」 無錯，果個公園對我地係好特別既地方。
我：「不如十一點地鐡站等？」
Cherry：「好啊，聽日見啦我地。
」 我：「記得著多件衫唔好凍親呀。
」 就係咁，我終於第一年有女陪過聖誕了。
我興奮到係屋企大叫，結果引左我家姐入黎。
我：「屌做乜唔敲門呀！
」 家姐：「怕乜啫，你又唔係打緊飛機。
」 我：「咁搵我咩事呢？
」 家姐：「聽到你約左啊妹，睇死你都冇買聖誕禮物比人架啦，扲去啦。
」 家姐拋左個紙袋去我張床度，衰鬼又幾有我心喎。
家姐準備轉身走個陣，我叫停左佢。
我：「喂你聖誕冇街去咩？
」 家姐：「街呢，日日都可以去，點解要特登果日出去同人逼。」
好似好有道理，但又有D怪。
我打開個袋一睇，入面係一條雪白色既披肩。
家姐既品味我唔懷疑。
我揀好聽晚著乜之後就上床訓覺，希望聽晚快D到。
第朝起身，望望電話只係十點幾。屌，訓多陣先。
訓到唔知幾時我再訓唔到，唯有起身。
太陽伯伯仲高掛天上，我就知時間尚早。
見肚餓唯有走出廳睇下有乜食，一出去就見到家姐著背心短褲咁坐係度食野。
我：「家姐乜你唔凍架？
」 家姐：「哦？起左身嗱？食唔食野？」
我：「吞左啖野先講野好冇？
」 原來家姐係度食緊麵。我見到好似幾正咁都自己整左個。
煮好麵之後就坐低同家姐面對面咁食，大家都無講過野。
家姐今日真係無人約？明明家姐咁正竟然會冇人約？
「lulu食完幫我執埋D碗，我訓多陣先。」
家姐講完就返入房，成個廳又得返我一個。
Hea下hea下又差唔多夠鐘，我都開始換衫準備出去。
家姐房門仍然緊閉，睇黎仲訓緊。
我十點九左右就到左，地鐵站都冇乜後生仔，睇黎D人都出哂去旺角尖沙咀玩。
等左五分鐘左右Cherry就到左，佢一身白色連身裙引黎周圍唔少阿叔既目光。
我：「做乜塊臉紅卜卜既？怕羞？
」 Cherry：「好衰呀你，我有少少凍呀…
」 我：「叫你著多件衫又唔聽，嗱。
」 我除低左自己既外套，披左落Cherry身上。
我：「行啦我地。
」 今年既聖誕有少少凍，幾有聖誕氣氛，可惜唔會有雪。
行上去公園既途中，我留意到Cherry一直抱住一個紙袋，唔肯同我拖手。
我：「個紙袋入面咩黎架你咁緊張既？」
Cherry：「一陣你咪知囉，咁你個袋又係咩黎架。」
我：「一陣你咪知囉。
」 就係咁，我地行下行下到左公園。
呢度可以話係一切既開始。
我同Cherry係度開始，第一次一齊食lunch，第一次kiss…
所以我想係呢度同佢過第一次聖誕。
公園裏一個人都冇，只有街燈。
Cherry坐左上鞦韆，係度fing下fing下咁同我四目交投。
呢個情境似曾相識。
Cherry：「眼甘甘咁望住我做咩？
」 我：「你好靚嘛。」
呢句說話我諗都冇諗緊就講左出口，因為係真心話。
Cherry：「洗乜講。
」 我忍唔住，上前攬住佢，發現原來佢個身好䁔。
我：「好感激上天比左一個咁靚又好既女朋友我。」
Cherry都攬住我，同我臉貼臉，令我更直接咁感受到佢既體溫。
Cherry：「唔係要多謝個天，而係要多謝我揀左你。
」 我攬得佢更實。
我：「多謝你。」
原來我，已經離唔開佢。
Cherry：「你係咪有野比我？
」 聽到佢咁講，我先醒起份禮物，所以我放開左Cherry轉身拎個紙袋。
我係紙袋入面抽出披肩，準備交比Cherry。
一擰返轉身，就見到Cherry拎住個盒。
Cherry，我：「送俾你既。
」 我地就係咁交換左禮物，我打開個盒一睇，係一盒曲奇。
我抬頭望一望Cherry，只見佢眼甘甘咁望住我。
「D曲奇我親手整架…」
我原本好想即場試下，但我諗諗下都係想返屋企先慢慢品嚐，所以我合返埋個盒。
其實，我係怕我食左會忍唔住喊。
我：「等我返屋企沖返壺荼先再慢慢食。你鐘唔鐘意條披肩？」
我見到原來Cherry已經披上左條披肩，好襯佢條裙，令佢更完美。
Cherry：「好靚呀我好鐘意，多謝你吖。
」 聽到佢講多謝，我個心好甜，同時我又諗起幫我準備禮物既家姐。
唔知家姐而家做緊咩呢？
我電話係呢個時候都響起，提醒我仲有一分鐘就到聖誕。
我：「你鐘意就好啦，仲有一分鐘就到聖誕啦。
」 Cherry：「係咩！？
咁要倒數啦！」 係Cherry驚訝慌張既同時，我電話又再響，話我知而家係25/12，聖誕節了。
我：「唔洗啦，聖誕快樂，芷睛。
」 Cherry：「唉呀miss左倒數添
，咦咪住先，你岩岩叫我咩…」 我冇等佢講完就錫左落去，仲緊緊抱住佢。
呢次係我第一次係呢個公園主動錫Cherry。
感覺冇上次咁夢幻，我可以好清楚咁感覺到Cherry既唇溫，好似火咁熱。
我真係好希望我地可以永遠係埋一齊。
我：「多謝你，真係好多謝你。
」 原來我已經眼濕濕，把聲都有D唔同左。
Cherry一邊掃我背一邊講：「傻佬，你係我架，唔準喊。
」 原來天氣凍既聖誕都可以過得咁溫暖。
當我放開Cherry個陣，佢好似企唔穩，成個人fing fing下，腳步浮浮。
我：「喂，你做乜呀，冇事嘛？
」 Cherry：「好熱…好暈…
」 佢講完之後就幾乎暈左係到，好彩我扶一扶佢。
我摸摸佢額頭，好熱，應該係發燒。
我：「你發燒仲出黎？」
Cherry：「嘻嘻…」
見到佢咁都唔知好嬲定好笑。
我而家應該點做好？
係我腦海入面第一個出現既念頭係：帶佢返屋企先。
之所以唔係送佢返佢屋企絕唔係心邪，而係因為要係學校去Cherry屋企要轉幾程車，我怕佢會辛苦。
我決定左，要帶Cherry返屋企。
就係咁，我用上所有平日唔會用到既力量，揹起Cherry行返落山。
直至行到返大街，Cherry話咁樣好醜怪我先肯放返低佢改為扶住佢。
我帶住佢引起唔少情侶既目光，幾經辛苦先將佢帶到返我屋企。
一到我屋企，Cherry就好似氣球漏氣咁訓左係地下，我都再無哂力，唯有搵家姐。
當時一點左右，好彩佢未訓。
我：「喂，家姐，幫幫手扶Cherry入房吖。」
家姐：「痴線架搞野都要家姐幫，咦？啊妹搞乜？
」 我：「唔係你諗咁架傻，佢好似發燒呀。
」 家姐聽到我話好似發燒之後就幫手帶左Cherry入佢房仲鎖埋門，叫我搵藥同熱毛巾。
搞左一輪之後，家姐終於打開門。
家姐：「我幫啊妹抹左身仲換左套衫架嗱，佢食左藥訓緊，聽朝送人返屋企啦。」
我：「唔該你啊。
」 家姐：「唔洗，不過你要比你間房我訓。」
麻煩左家姐咁多，我都唔好意思拒絕，只好就範。
過多一陣，家姐就上左我張床訓，而我就坐係旁邊既書枱，望住Cherry親手整既曲奇。
我扲起一塊，放左入口。唔，好甜。
太甜了。
直頭甜到入心。
我托住額頭，半夜三更一個人係張書枱上不停流淚同傻笑。
第朝我就送左Cherry返屋企，仲千叮萬囑佢一定要去睇醫生。
佢就話下次要再去我屋企同多謝我家姐。
我送走左佢之後，一個人係街上行，抬起頭望天，不禁係度諗：
我真係好愛佢。
當時希望每年聖誕都可以同佢一齊過就好。