[校園][應該純愛][友情]「我想要你，仲有你既世界。」: 謝謝

眾目睽睽下，我帶走左Cherry。 

我同佢一句野都冇講過，一直拖住佢係人羣入面穿插，直出校門。 

去到一個少人D既地方，我先敢放開手，擰轉頭望Cherry。 

原來佢喊緊。 

個下我真係嚇親，我唯一既反應就係擦擦對手，幫佢抹走眼淚。 



Cherry個對水汪汪既大眼睛，令佢份外迷人。 

我：「美女，賞臉同我食個lunch嘛？ 」 

Cherry無答我，只係一邊掩住塊臉一邊點頭。 

之後我同Cherry去左食譚仔，全程大家都有講有笑。 

食完我地就拖住手，慢慢咁行返學校。 



Cherry：「頭先多謝你…你好型…」 

我：「唔？一直都型架我。」 

Cherry：「衰人，放學見啦。 」 

Cherry輕輕打左我一下就同我係學校3樓分別。 

我一返班房就被人圍。 



內容離唔開「你幾時溝到女神」，「點溝架」等等。 

好彩有晨哥一手將我拉返出黎再隔開班人，我先抖到氣。 

千辛萬苦我終於返到埋自己位，但師父佢地又撲左上黎。 

起初，我以為佢地會同其他人問一樣既問題。 

點知，佢地只係講左一句野就走左。 

「偽毒可恥。 」 

下晝既堂，我都冇心機上。只係知自己所有科都合格就夠。 

聽若睛講，Harry文學第二但佢早退左。 



好快就到放學，當我想同師父佢地say sorry話有野做走先個陣，竟然見到佢地望住我，仲向我揮手示意叫我走。 

好兄弟。 

我極速pack好行裝，衝去B班班房搵Cherry。 

落到去，先發現佢已經企係班房門口等緊我。 

當我行埋返去個陣，換黎既一片「wow~」聲。 

但而家既我無畏無懼，我行返去捉起Cherry隻手，同佢講： 

「Sorry要你等，行啦我地。 」 



就係咁，我同Cherry就係一片喧嘩聲中離開學校。 

Cherry叫我陪佢去後山公園，話有野想同我講。 

於是我地就咁慢慢行上去公園。 

不經不覺已經一個月。 

呢個公園，係所有野既開始。 

起初我仲驚係肥婆Amy向我示愛，而家諗番真係得啖笑。 

個日既陽光同今日一樣咁耀眼。 

Cherry突然甩開我隻手，跑到去我面前，背向陽光。 



呢一幕，同一個月前完全一樣。 

Cherry：「魯路修，記唔記得我地一齊左幾耐？ 」 

有少少意外Cherry都會問呢D野，不過我梗係記得啦。 

「一個月左右。」 

「我地第一次去街係去邊？」 

「旺角。」 

「咁我地第一次kiss呢？」 



「你指你錫我臉個次？」 

「唔係，我指嘴對嘴個D。」 

死啦，有咩？我應該會記得架。 

「Eh…我冇印象喎，乜有咩 」 

「搞錯呀…咁都唔記得… 」 

「係今日啊。 」 

講完，Cherry就上前用雙手㩒住我塊臉，錫左落黎。 

呢一刻，時間仿佛靜止了。