[校園][應該純愛][友情]「我想要你，仲有你既世界。」: 謠言

是咁的，我叫魯路修，今年中五。 

我係一個普通到冇得再普通既中學生。 

我既樣一般，又唔好運動。朋友圈子唔大， 

因為我係一個好怕麻煩既人，好多時候係我識人，人地唔識我。 

正因為咁，我中一至中四既生活係十分頹廢。但我自問有幾個知心好友，每日可以同佢地一齊顛，我就滿足。 



所以我到中五，都係單身，直至我遇上佢。 

就算到左中五，我仍無改我既頹廢作風，每日只上鐘意既堂，其餘就訓。 

放學極速做完功課就返屋企打機或者訓教。 

但眼見身邊朋友都開始有拖拍，由起初可以十人打自訂LOL，RC嘈到仆街， 

變到只係岩岩好夠五人開場NG，個心都會痛一痛。 



但冇辦法，這些機會不是屬於我的。 

直至最近，我有幾個女仔朋友同我講，話隔離班好似話有人鐘意我，呢件事亦令我成為我班上既話題。 

肥豬：「你估究竟係邊個鐘意我地魯路修呀嗱？會唔會係女神Cherry？」 

Jason：「肯撚定係個肥婆Amy啦！佢就想係女神Cherry！」 

我：「收皮啦你兩個，個個謠言黎咋傻仔。」 



呢兩個都係我死黨，肥豬其實同我差唔多size，但次次影相佢都大我一個碼，所以叫肥豬。 

至於Jason雖然唔算高大有型，但呢條契弟成日都溝到女，不過次次都俾女飛。 

而佢地提到既Cherry就厲害啦，全級公認女神， 

長頭髮加上白滑既肌膚，可以殺死人既笑容仲有一份無法形容既氣質，用完美都不足以形容佢。 

好似有男神級數既師兄試過追佢都慘遭拒絕，令佢增添一份無法接近既感覺。 

至於肥婆Amy，有乜好提？字面已說明一切。