(爸爸no.1)我老豆係口靚妹: 詩0.2
詩0.2 妹妹的煩惱
「哥哥!我..............」
「其實我好早已經........唔得唔得口窒窒咁點呀?仲有三日就星期六唔可以再浪費時間!」
「再嚟一次!」
「放鬆d!」男仔聲
「...................」
「你幾時響度架?」我
「由你對住塊鏡自言自語開始!」男仔
「...............」殺氣
「你唔係想殺人滅口吓?」男仔
「呀!砰砰!」講得啱,依一刻我真係想殺咗佢,跟手扔佢入垃圾房咁就冇人知道我d瘀嘢
「夠啦夠啦,再打我真係入廠架啦!」
「咁咪好囉,你讀醫都係為咗入醫院啫!」我
我打緊嗰個人係我阿哥,所謂嘅year 2醫科生單文頌,佢咁嘅性格學人做醫生?畢到業先算啦!
「今日又唔係星期六日,點解你會返嚟架?」
「乜我星期三唔返得屋企嘅咩?」頌
「就算返嚟都唔好鬼鬼鼠鼠睇住人講嘢啦!」我
「聽講依度係廳,我又大字型咁坐響度,你唔係睇我唔到吓?」
「...............」無話可說
「咁啦!對住塊鏡不如對住真正嘅哥哥練習啦!」頌
「啪!」
「又打?」頌
「我講嗰個哥哥唔你你呀,你.......你唔好諗埋d變態嘢吓!」我
「知啦!你從來都唔叫我做哥哥嘅,咁嗰個哥哥係邊個嚟架?」笑得好乞人憎
「哦!原來就係你講嗰個響公園餵貓嘅哥哥!」
「依d嘢你唔好同我d friend 講呀,由其係噹噹,兄妹都冇得做架!」我
「知啦!有生命危險嘅事我不嬲都唔做嘅,未比人打過咩?」頌
各位係咪覺得今日嘅我有小小唔同?好似惡咗小小!
我嘅性格比較細膽,而且好介意人哋嘅睇法,加上內向又小說話,所以同朋友一齊都係好靜
冇乜嘢講,又好小表達自己情感嘅人,比人嘅印象係斯文溫柔體貼嘅小妹妹!
唯獨係對住依個人(成日蝦我笑我)我會毫無保留將自己嘅情緒發洩響佢身上,不過無論我
幾惡幾任性幾大力打佢,佢都唔會嬲我,佢係我哥哥嘛!
亦因為咁我最自然嘅一面就響佢面前顯露出嚟,其實依一刻嘅我係咪先係真正嘅我?
「你咁講法即係佢身邊已經有一個好親嘅女仔!」頌
「係呀!嗰個仲係我最好嘅朋友,不過佢話係假拍拖,但我又唔知佢哋幾多真幾多假!」
「有關係咩?如果你係鍾意佢咪同佢講囉,唔洗理其他人架!」頌
「人渣!」我
「做乜鬧我?」
「嗰個係我朋友嚟架,咁做好似做咗第三者咁...........」越講越細聲
「你都話佢哋假拍拖囉即係未開始啦,咁點算第三者呀?」頌
「而且你只係將自己嘅心意表達比佢聽,唔通鍾意一個人連向對方講我喜歡你嘅自由都冇咩?
將來係點佢會揀邊一個就留返比你個哥哥決定啦,唔好將心底嘅說話收埋一世呀!」頌
「但係...........」我
「但係你頭先響度練習都係想向佢表白啫,唔好扮好人啦!」
「...............」我已經變成咗個壞人
「我返房啦!」
「砰!」
其實阿嘉應該係鍾意阿政,如果我真係表白無論成唔成功我都會破壞大家嘅關係,到時我就真係變成壞人!
「做乜企咗響度郁都唔郁呀?」頌
「喂!我間房嚟架知唔知乜嘢叫做私隱呀?」我
「私隱專員!你度門冇關到呀,我行過望到咋!」
「就算真係都唔好行過嚟啦,如果我換緊衫點算呀?」死撐
「表白完喝住除衫?」頌
「...................」殺氣
「唔好亂嚟呀,君子動口...........」
「我係淑女!」追殺
「哇!砰!」走咗入房
「有本事你就唔好出嚟!」我
真係吖!成日攞我嚟玩,對住佢我就好似變成阿嘉咁打打殺殺,不過又好似成個人放鬆咗...............
「加油呀!」隔住度門
「吓?」
「你嘅性格就係太被動太顧慮其他人感受,反而壓抑咗自己嘅感情!」
「唔好諗太多,唔好理其他人感受,做返自己,比你嘅阿政認識真正嘅你,真正嘅單詩詠!」頌
「但我驚會搞出個大頭佛!」
「有乜嘢事都仲有你依個阿哥響身邊,唔洗驚去馬!」頌
冇錯!我要大膽d,我要做返我自己,我要將心底嘅說話講比阿政知,死就死啦!
依一個唔係一般嘅星期六,係一個改變我一生嘅星期六!
***********************************************************************
你哋好我叫陳小柔,13歲中二學生,家住東涌,有一個好叻嘅爸爸,我爸爸係律師嚟架!
不過佢大陸有業務要成日中港兩邊走,大部分時間我都係住響爺爺嫲嫲青衣嘅屋企,
再加上我間學校都係響青衣,正確嚟講凡應該係家住青衣嘅陳小柔!
你哋可能會話爸爸上咗大陸啫,仲有媽媽點解會住響爺爺嫲嫲度呢?因為媽媽響我出世
之後就死咗啦,基本上我係未見過我媽媽!
不過我有一個世上最好嘅爸爸,關心我嘅爺爺嫲嫲,小時候嘅我跟本唔覺得冇咗媽媽係乜嘢大事!
直致到我小學睇見人咃有媽媽接放學,學校旅行有媽媽做嘅飯盒,嗰陣我先發覺我同其他人唔同,原來我係冇媽媽!
之後每一晚瞓覺我都會向神祈禱,希望神會比一個媽媽我,雖然我知道係冇可能發生,但我都希望奇蹟會出現!
奇蹟真係出現咗!一年前爸爸帶咗個姨姨返屋企,佢話依個就係我媽媽,雖然冇血緣關係,但媽媽好鍚我,
佢完全將我當做親生女,我再唔係孤令令一個,以後嘅日子我可以同媽媽一齊shopping,夜晚同媽媽傾計,
可以瞓響媽媽身邊...............
話多個秘密比你哋知,原來媽媽有個仔,佢大過我,即係話我仲有個哥哥?
哥哥!我同其他同學一樣都有兄弟姊妹啦,仲要係哥哥.............我以後唔會比人蝦,而且佢會教我功課,
唔開心嘅時候佢會攬住我鍚我..............哇!(碌咗落床)
講到邊講到邊?不過爸爸成日唔響香港,媽媽又係空姐成日飛,我仍然要留響爺爺屋企,而爺爺係一個
好古板嘅人,話乜嘢哥哥同我冇血緣關係,一男一女住埋同一間屋好危險喎,佢竟然唔比哥哥過嚟住,
要哥哥一個人生活,有冇搞錯?
雖然係哥哥啫但佢都係得十七、八歲,一個人點生活呀?佢又唔識煮飯,男仔又粗心大意,佢會唔會餓親呢?
佢間屋會唔會好亂架?佢會唔會跌倒冇人理架?
點呀點呀冇個女仔響身邊一個男仔真係會亂晒龍架,我又唔可以去照顧哥哥!
望住哥哥張相(我已經將哥哥張相set咗做wallpaper)真係好想見到哥哥,我宜家真係要每晚望住
哥哥張相先瞓得著!究竟幾時先可以見到哥哥呢?
終於見到啦!竟然會響屋企樓下嘅海滂見到哥哥,真人果然比相片更加有型靚仔、溫柔可愛高大威猛
連把聲都好聽過人,真係完美嘅哥哥!嗰一刻我真係想同佢講我係你妹妹!不過................\
點解有幾個女仔圍住哥哥響度吱吱喳喳架?媽媽又話哥哥冇乜女仔緣嘅,點解突然間會咁受歡迎嘅?
不過嗰幾個女仔比人感覺好惡、好串講嘢又大聲,有一個郁d就打人,尢其響哥哥身邊嗰個女仔,哥哥
只係望我一眼之嘛就發晒脾氣,仲要當住咁多人響條街度鬧我哥哥!
後來我影咗張相比媽媽睇,原本嗰個女仔就係當日響靈堂同媽媽鬧交嘅人,真係目無尊長成個MK妹咁!
等等!MK妹?依d係咪就係人哋所講嘅MK妹?唔係嘛哥哥竟然群埋班MK妹度,哥哥會比佢哋教壞架!
等等等等!哥哥依家一個人住,佢哋會唔會成日走上哥哥屋企..........過夜?
冇啦冇啦渣都冇啦仲要四個咁多,唔可以比佢哋亂咁嚟,唔可以再比班MK妹搞我哥哥,哥哥係我架!
「嘟!」
「媽咪!」
「係呀做晒功課啦,你點呀?」
「哦哦,聽晚返嚟,咁係咪照原定計劃星期日去哥哥度?」
「好嘢!我即刻準備d嘢先,哥哥鍾意食乜架?哦哦.............媽咪你都早d瞓啦辛苦呀byebye!」
「咔!」
嘿嘿...............原定計劃!冇錯,我哋一家(爸爸媽媽)都計劃好迎接哥哥返嚟,媽媽農曆新年後會轉
做地勤以後就唔洗成日飛啦,我亦都會搬返爸爸媽度住,而爸爸亦計劃搬屋,東涌太遠啦,哥哥第日
讀大學東涌出入真係好唔方便,所以我哋全家都會搬出九龍同哥哥一齊生活!
依一個唔係一般嘅星期日,因為到咗星期日,我陳小柔嘅完整家庭就會正式開始!
依個星期日我要搶哥哥返嚟!
唔係唔係,應該係帶哥哥返屋企一家團聚!