(爸爸no.1)我老豆係口靚妹: 阿政no.20
阿政no.20 善良的咀咒
「嗱!飲支嘢先啦!」
「唔該!」噹噹
6:35am,我哋跑到嚟九龍城,響噹噹屋企附近嘅7仔坐低飲嘢,順便等天光!
「好多人,原來六點幾已經咁多人返工!」
「好似你大少爺咩,八點鐘都未醒,要阿嘉上嚟摌你!」
阿嘉點解你乜都同人講架?
「嗯!點解會買熱維他奶飲嘅?」噹噹
「吓!天氣涷嘛,而且朝早唔好飲涷嘢!」
「我哋跑到身水身汗都唔飲得涷嘢?就算真係飲熱嘢都有咖啡奶茶、朱古力啦!」
「點解會飲埋d小朋友飲品?」
小朋友飲品?真係好細路咩?我早餐好多時都飲佢啵,咁飲其他囉,益
力多好似仲細路,氣水一起身飲會唔會咳呢?我氣管唔係咁好.........
「咕.....哈!你當真架?玩你咋,你係唔係諗緊------我要介奶,飲氣水好定橙汁好......
哈......」
全中!
「其實維他奶幾好飲吖,不過熱嘅我好耐都未飲過!」
「喂!交換吖,我想飲你嗰支麥精!」已經搶咗我嗰支
「喂!唔好呀,我個咀琴日比人打損咗,唔係咁好!」
「阿嘉話你係青頭仔,應該冇性病嘅!」
阿嘉你仲講過d乜呀?
「喂!飲啦,我都冇性病架!」
「我知!」
「我有冇性病你都知!」伸過頭埋嚟
「呀......我.....」都唔知講乜嘢好
「哈.....哈......」指住我笑
死啦!一對一真係唔夠佢嚟,點呀點呀!
*********************************************************************
「天光啦!」噹噹
「唔!由之前好寧靜到依家人來人往都係半個鐘咋!」我
「所以我好喜歡跑步,由一個人都冇嘅街上跑,跑完所有人都出晒嚟,咁樣迎接
新嘅一日就係最好架啦,而且可以忘記晒d唔可心嘅嘢!」
「不過今日最開心,平時都係一個人跑,今日竟然有人陪我!」
「吓......我呀?」
咁又係,如果今日得我一個人跑,我真係唔知跑去邊,分分鐘跑兩個字就跑返屋企
瞓覺,有人陪真係唔同d!
「嗯!你頭先話你有d唔開心嘅嘢?」
「咁又點呀?」
「乜你都會唔開心、有心事嘅咩?」
「我.....我點解唔可以有心事呀?」想打我
「喂,等等!我見你成日都哈哈笑,好開朗,一d都唔似唔開心!」
「乜笑就唔可以唔開心,哈哈哈哈就唔可以有心事咩?」
「有d總統一路笑一路話自己好憤怒都得啦!」噹噹
有d咁嘅人?三叉神經有事咋吓!
「咁你有冇同佢哋講呀?」我
「點解要同佢哋講呀?」噹噹
「講咗出嚟會舒服d嘛!」
「張子政哥哥,係咪我講出嚟,你會搞到我好舒服呀?」噹噹笑容好古怪
「喂喂!我唔係咁嘅意思,我係話你講比阿茵佢哋聽,佢哋係你好朋友嘛,一定會
幫你架!」
「講比阿茵知?咁即係講晒比全校知,阿詩就太細路女啦!貓貓狗狗就啱佢!」
「至於你嗰個阿嘉...........」殺氣
「..................」驚
「條八婆成日玩鳩我,知道我maths 唔掂要求佢,佢就玩鳩我,如果比佢知道
我d家事,咪比晒位佢入,仲有成日TB妹TB妹,我係女仔嚟架,乜我好男仔頭咩?」
「唔係呀,其實你幾可愛呀!」
「嗯!」面紅紅
「吓.......我意思係,其實我係話你個look係屬於活潑運動型,短髮其實好適合你,
不過依家真係短咗d,留返兩三吋會完全唔同晒架,信我啦!」
「真係?」
「唔!」
真架!其實噹噹個樣有d似堀北真希(當然係十幾歲嘅堀北啦),所以短髮真係可以帶出佢清爽、
活潑嘅氣質,只要頭髮長返少少,佢根本就唔差得過阿詩同阿嘉!
「咁.....咁我睇吓點啦!」擰轉面
「另外功課唔識我都可以幫吓手嘅,雖然唔係好叻,不過F.4嘢我應該冇問題,而且maths 係我強項!」我
「真係?好嘢,以後都唔洗求個衰婆啦!其實我哋三個d數都唔係太好,你一次教晒
我哋三個啦!」
「好呀!」
阿嘉其實你有咁好嘅朋友,你就要好好珍惜啦,我宜家要幫你同佢哋修補返關係呀!
「為咗答謝你,我講返我自己d嘢比你聽啦,但係你唔可以講比人聽架!」
「呀!冇事冇事,你都冇朋友嘅!」噹噹
「講嘢可唔可以唔好咁直接呢?」到我嬲啦
「不過咁,安全起見,同我發一個毒誓!」
「乜嘢毒誓?」
「死-----全-----家!」認真
「噗.........咳!」我連最後一啖奶都噴埋出嚟
「哇!對唔住,我唔記得你爸爸死咗,對唔住呀!」
「一人做事一人當啦!」我
「好!如果你講出去,依世都識唔到女仔,冇得結婚生仔,無伴終老,絕子絕孫,臨老
過唔到世,瞓天橋底.............」
「可唔可以唔好咁狠毒呢?」你不如一槍打死我算啦
「吓!唔毒邊叫做咀咒呀?咁......咁......」認真考慮
我越來越覺得依個人比我老豆更加恐怖!
「好,咁啦!如果你講出去,以後都要陪我跑步,一路跑到60歲,風雨不改!
「吓!」我
「做乜咁嘅反應?好善良嘅喎!」
「呀.....冇嘢呀!」
「咁好啦!我宜家送你返屋企,跟住我跑啦!」
跑到60歲?其實都幾恐怖,不過之後一件事,我講咗噹噹家事比阿嘉聽,咁樣係咪
代表毒咒已經生效,要同佢跑足45年?
不過,如果有一個中學同學去到60歲仍然會同我一齊跑步,又真係幾快樂嘅一件事嚟嘅!