[魔法/武俠]《窮撚被女飛 之 鳩闖魔法世界》: 第七十一章 - 無父幹嘅人就算有樓，伯母都只係會請你食雞屎忽
按道理，在一圍酒席上，坐在主人家旁的，應該就是主人最重視的客人又或是輩份最高的人，即是說，坐在世伯旁的，就算不是我，也應該是龍師姐，但現在坐這個位置的卻是張焌鴻，這代表甚麽?
座位安排如下圖﹕
雖然要我坐喺紫月側邊我都好滿意，但點解條粉皮可以坐uncle側邊? 佢邊位呀?
「南，怎麽不吃東西? 不合口味嗎? 」紫月問。
「哦? 哦，無嘢無嘢，食飯啦，食雞呀，你鍾意食雞呀。」我夾了一件雞給紫月。
紫月的臉紅起來，偷偷看了她媽一眼，就低頭吃飯。
伯母開聲了﹕「陳賢侄......」我忙道﹕「伯母你叫我呀南得喇。」
伯母頓了頓，又道﹕「呀南你家住何處? 家中尚有何人? 」
嚟料啦嚟料啦，好彩我睇過公屋潮文，今晚應該有雞脾食啩?
「我本身屋企係喺南方，父母親尚健在。大半年前我帶住一筆錢嚟中土諗住做生意，咁因為我本身對五行術有興趣所以就入咗書院讀書。咁我而家喺雲天城買咗間屋，唔係好大有五千呎左右啦。」上半截是我慣性用來敷衍查問者的說詞，我跟紫月也是說這一套。下半截則是早跟楊兄商量好，有需要會由他出面幫我跟那富翁在雲天城借一間屋充撐場面。
世伯點頭道﹕「年輕人早點創出自己的事業確是好事，而且年紀小小已經擁有自己的物業，不錯！不錯！」他轉頭問張焌鴻﹕「對了張侄賢，你家住何處呢? 」
喂等等先！做乜要問埋佢呀?
張焌鴻答﹕「回世伯，家父張雄，在中州西南一帶經營錢莊等生意。」
世伯吃了一驚﹕「啊你是張雄的公子? 難怪一表人材，又出手闊綽了！我可走漏了眼！」
屌你我見伯母兩眼發光，我諗佢而家一定濕撚哂。
世伯續道﹕「早有耳聞張老闆的錢莊生意雄霸中州西南一帶，跟中部的司徒老闆可說是鼎足而立。而且聽說你父親跟炎氏關係密切，今日一看看來絕非虛言。」
張焌鴻微笑道﹕「『雄霸』二字，絕不敢說，這只是生意伙伴給個面子罷了，而且這一切全是我父親一人的功勞，晚輩我可絕不敢叨了父親的光。炎氏方面，他們跟我家確是世交。我家也是有賴炎氏的關照才有如此規模。」
仆你個街黐人金糠都仲好意思講出嚟嘅?
「爹！娘！你們怎麽查問起焌鴻家中的事，這叫我怎麽好意思！」紫月滿臉紅暈的嗔道。
伯母柔聲道﹕「傻丫頭，你爹只是關心你認識了甚麽人罷了，這怎麽算是查問呢? 」
喂頂你唔見你問楊兄? 唔見你問龍師姐? 做咩係都要問條柒頭?
伯母突然問我﹕「對了呀南，你在書院裏跟紫月是同一班嗎? 」
「哦，係呀，我啱啱升咗做火系嘅高級班，而家係同紫月一班。」
「那你有想過升做精英班嗎? 」
「當然有啦，我諗喺呢學期完結之前就會考到上精英班。」
紫月插口﹕「娘我跟你說，呀南他在第一次的檢定試就從基礎班一下子升上高級班了，你說厲害不厲害。」
伯母笑道﹕「果然是英雄出少年。」
世伯又問張焌鴻﹕「對了焌鴻賢侄(點解張賢侄又變埋焌鴻賢侄㗎！！！)，你是甚麽系的? 」
「晚輩是火、水兩系的，現在正在精英班中研修。」
此言一出，紫月老豆老母嚇了一跳不特止，連周圍斟荼遞水的僕人丫環也一齊扯旗出水。
仆街喇呢獲...無喇...無喇......
世伯有點口吃﹕「焌鴻賢侄你是兩...兩系法師? 這...這可真是不可多得的人材啊！」
點算點算? 我應唔應該攞五條煙出嚟哂佢冷? 但係一爆自己係五系肯定有無窮嘅麻煩。點算? 講定唔講? 但而家唔講，紫月老豆老母肯定嗒哂條柒頭嘅糖。就算我同紫月真心相愛，兩情相悅，喺呢個封建異世裏面，紫月都未必可以擺脫父母之命喎.......唉！死就死啦！
就在我站起來想大叫﹕「各位觀眾！五．條．煙！」然後以五色元素球奪回主動權之際，我耳邊傳來楊兄的聲音﹕「呀南！冷靜啲！唔好咁衝動！」
就是楊兄的說話，本來一股作氣的我變成打退堂鼓。眾人見我站起來但又沒有說話，紛紛朝我看來。
我搔搔頭道﹕「唔...唔好意思，我去一去洗手間。」這個時候還是先借尿遁。
上廁所的途中，Lucy跳上我的肩膊跟我說話﹕「大哥睇到你想爆自己係五系法師嘅事，佢叫我同你講唔好。」
我十分矛盾﹕「我知...但係...我......唉......」
「你如果講咗出嚟，你肯定會變得好危險。雖然會有好多勢力會招攬你，但係如果佢哋招攬唔到，就會改為破壞，正所謂自己得唔到都唔好益人。除非你本身實力非凡，自己可以擊退任何人，又或者有大家族照住，否則你都係低調啲好啲。」
「道理我緊明啦，但係......」
「如果紫月係鍾意你嘅，就算佢父母反對，佢哋都奈你唔何㗎，最多咪私奔。」
喺現世就話可以跟自己意願啫，呢度? ......
「你自己命仔緊要啲定而家認叻緊要啲，你自己衡量吓喇。」
在外面打了一個轉回來，衡量過後我還是忍一時之氣為佳，反正紫月喜歡的是我。
紫月見我回來，道﹕「南，娘親想問你畢業後有甚麽打算? 」
打算? 本身我入嚟就唔係為咗讀五行術，咁我而家點答好?
唯有老吹住先﹕「呃...畢業後我應該會去打幾年工先，蓄到一筆錢就搞吓小生意。咁我當然想早啲成家立室啦。」最後我望向紫月。
紫月臉上一紅，在枱下輕輕捏了我的大腿一下。
世伯喝了一杯酒，問道﹕「哦? 那你打算做甚麽生意? 」
「吓? 呃......」我都係老吹啫，世伯你唔駛問得咁detail呀?
我想了想，有香港這個樣板，金融地產一定無得輸。
「我諗住搞地產生意，咁話哂人點都要有間屋住，房地產一定有需求。到時我有錢，就可以喺市中心買一撻地起樓，起完之後賣又好租又好，賺到嘅錢就用嚟買更多地起更多樓，之後就一棟變兩棟，二棟變四棟，四棟變八棟，八棟之後上市，上市咪再集資囉！跟住搞埋金融，再分拆上市，跟住再賣殼再上市再分拆......」
我還未將我的地產王國數完，世伯就截停了我﹕「嗯嗯，年青人有夢想很不錯，你的想法也很創新，不過嘛......要買地起房子的話，跟上位人仕沒有點關係是很難辦得成的，賢侄你有認識甚麽人嗎? 」
唔撚記得呢度乜撚都要靠關係添！我唯一知道嘅權力人仕就係楊兄救過嘅富翁，但我唔知佢叫乜名喎，而家又問唔到......
「呃............」
就在我支吾以對的時候，幫我解圍的竟然是他。
張焌鴻道﹕「原來南兄打算做地產生意，這個好辦，我家在中州的幾個城鎮中都擁有不少地皮，而且我家跟炎氏熟稔，南兄若打算在他們的勢力範圍裏發展事業，跟我說一聲就是，我一定會盡力幫助南兄的。」
屌！又比佢入到位！
世伯欣然笑道﹕「還是焌鴻賢侄你有辦法，名門之後果然是名門之後。對了，你畢業後又有甚麽打算? 」
張焌鴻笑道﹕「我現在還沒拿定主意，我爹當然想我繼承家業，但一來我不擅長做生意，二來我不想靠父蔭，所以可能會先到炎家混混，希望能揚名立萬吧。」
「啪」的一聲，原來是世伯一拍大腿，他道﹕「對啊！年輕人就應該自己到外面闖一闖，老靠別人是沒有出色的。若賢侄你能在炎家混出一個名堂，這可是了不起的榮譽！來！我敬你一杯！」說罷就一飲而盡。
有無雞脾食查家宅問答環節到此完滿結束，之後世伯伯母的視線與注意力有九成都集中在張焌鴻身上，其餘一成則放在紫月身上，伯母還跟張焌鴻換了位置讓他可以坐在紫月身旁。我? 應該已經變成路人甲乙丙毫不相干了。
我見張焌鴻被世伯伯母塞得滿嘴雞脾，而我吃的則是雞屎忽，整頓飯當然味同嚼蠟，可恨的是紫月竟然沒有發現我臉色不善，猶自跟張焌鴻聊天談笑，到底她有沒有考慮過我這個做男朋友的感受?
背脊骨落的一餐飯，終於都吃完了。因為我們比較人多的關係，紫月早就在她家經營的客棧給我們預留了房間，不過世伯這時卻道﹕「焌鴻賢侄，若不嫌棄的話這兩晚就在此留宿如何，我還有些事情想向你討教。我會安排你的其他師兄師姐到我經營的客棧留宿的。」
「這......」張焌鴻看一看龍師姐，似是要徵求她的同意。
我死瞪著龍師姐，眼神不斷說「唔好！唔好！千祈唔好呀！」
龍師姐卻懶洋洋道﹕「隨你喜歡吧，別帶麻煩給別人。」
張焌鴻恭恭敬敬的道﹕「遵命。」
紫月領路將我們帶到客棧，臨別時她終於發現我有點不對勁。
「呀南你怎麽了? 整個晚上臉黑黑的，發生甚麽事了嗎? 」
你仲好意思問我? 你老豆老母咁樣係咩意思先?
內傷未癒加上怒氣攻心，我的語氣當然不好﹕「你唔知發生咩事? 而家你呀爸呀媽咩意思先? 見到條契弟條件好過我就即刻變面！」
紫月愕然﹕「你在胡說些甚麽? 我爹娘只是見他和炎氏關係密切才想多多親近，你想到哪裏去了? 」
「我諗咗去邊? 張焌鴻做咩要送咁多禮比你屋企? 盲嘅都睇得出佢對你有意思啦！又唔見佢送咁多嘢比綵兒屋企? 」
紫月眼眶一紅﹕「那...那你是不相信我麽? ......人家對我有沒有意思是人家的事，我也控制不了啊！但...但連你也......」
我見她一副淚眼汪汪，楚楚可憐的樣子，心裏暗駡自己給嫉妒矇了心，這件事根本和紫月沒有關係。
我馬將她擁入懷裏安慰﹕「對唔住，係我衰我亂諗嘢，你當然信你啦！你唔好唔開心啦。」
紫月邊哭邊搥打我的心口﹕「笨蛋！大笨蛋！只會弄哭人家！」
我笑著輕撫她的秀髮﹕「係喇係喇，我係大笨蛋，你快啲笑返唔好喊啦，一係聽日我哋食完早餐就撇甩哂佢哋，我哋兩個自己去拍拖好唔好? 」
紫月埋在我懷裏的頭輕輕點了點，然後她抬頭道﹕「那你再不許惱我爹娘，也不許再吃乾醋！」
「知道啦知道啦，紫月公主。」我輕輕親了她櫻唇一下，道﹕「好啦，你返去瞓啦，聽朝見。」
紫月紅著臉嗔道﹕「就只會佔人家便宜！」她打了我一下，柔聲道﹕「你的內傷還沒好，你也早點休息吧。」
跟紫月互道晚安後，我跟她才依依不捨的分別。
雖然得到了紫月的安慰，但我還是悶悶不樂。她父母明顯十分喜愛張焌鴻，而張焌鴻也明顯對紫月有意思，我到底要做些甚麽才可以打贏條仆街?