[魔法/武俠]《窮撚被女飛 之 鳩闖魔法世界》: 第三十三章 - 放假同班friend去深山練吓劍燒吓嘢食都唔錯吖
「我學嘅係日本劍道，日本劍道好著重精神力鍛鍊，呢個同五行術、魔法都好似，所以以你嘅根底要掌握唔係太難。」
接著楊兄就開始教我甚麼氣、劍、體一致，甚麼以靜制動、以不變應萬變，甚麼以弱勝強、以柔克剛等等，聽起來倒有點像太極。不過他強調了一點的是，劍道最重要是訓練出一種處變不驚、心如止水的狀態，這樣才能發揮劍道的真正威力。
「劍道喺我哋原來世界當然只係一種運動，但我要你學嘅唔係一種要嚟比賽嘅運動，而係一種殺人技巧。」
我吃了一驚﹕「殺...殺人......? 」
楊兄瞅了我一眼﹕「無錯，就係殺人。雖然你嚟呢度嘅時間唔長，但你應該知道要喺呢個世界生存，應該要點做。」
我默然無語，畢竟我的道德價值觀還停留在原來世界。
一個月前，我仲身處於搭地鐵唔讓座比老人家會比道德撚丟石頭打死嘅世界，楊兄你而家要我有殺人嘅覺悟? ......
「我知你諗緊咩。不過你諗吓，喺呢個世界，實力就係法律，如果我而家一掌打死你，我根本唔駛負任何責任。」
「呢個道理我明白，但係......」
「打個比如，如果當初赤丹子殺老伯嗰陣你有能力還手，你會點做? 」
「我緊係同佢打過啦！」
「咁如果你只有兩個選擇。一，打死赤丹子救返老伯。二，你只係打傷赤丹子，但老伯最後比佢殺咗。你會點做? 」
「咁.....如果係咁，我緊係會殺佢啦......」
「道理就係咁簡單。你永遠唔知道敵人下一刻會對你或者你嘅親人做啲咩，你亦唔會有時間去諗去選擇，所以你唯一要做嘅，就係即刻將威脅消除。你要知道你呢刻放過敵人，佢下一刻就有可能殺咗你最愛嘅人，而你就係殺人凶手。」
「.......................」
「我亦唔係要你即刻接受，我只係想你明白呢個世界唔係我哋原來嘅世界，喺呢個世界，對敵人仁慈就係對自己殘忍。」
道理我緊係明，但......殺人......殺人............
楊兄拍一拍我，笑道﹕「歡容啲啦，唔駛嗱口嗱面嘅。你經歷多啲就會明㗎啦。反正你而家喺書院裏面應該唔會面對咩生命危險。去搵枝樹枝啦，我教你劍法。」
我唯有先撇下心中的執念，撿了枝樹枝學習劍法。
楊兄抽出他一直揹著的，那把用白布包著的劍，然後解開了白布。
白布之下，竟然是一把木劍，而且只是有刺無鋒，簡單點說就是一把有護手的尖木棒。
「我頂你原來呢把係木棍嚟㗎? 等我仲以為係玄鐵重劍！唔怪得之前你比我同嗰個癲婆單挑時我覺得輕飄飄，又一嘢比佢削咗個頭啦！」
「哈！玄鐵重劍，虧你諗得出！」
他雙手高舉木劍，由上而下揮了一刀，道﹕「日本劍道雖然叫劍道，但係本身係日本武士戰鬥用嘅格鬥技，而日本武士嘅武器，原本係武士刀。」
日本武士刀刀身細長，刀身微微彎曲而利於砍劈，所以劍道招式亦以砍劈為主，並附以橫掃和刺擊。不過楊兄說他想我學的，主要是劍道的精神，亦即是冷靜、敏銳正確的判斷力，以發揮先發制人，又或以逸待勞等戰術取勝。而他教我的，實則是近似刀法的劍法。
「劍可以做出三種基本攻擊，分別係砍、割、刺。而日本刀相比常規劍，因為只有單邊鋒刃所以利於砍劈，而呢套劍法亦係以呢點為基礎。」
他瞬間疾步衝前向前方一株手臂粗的小樹由右上至左下斜斜劈出一刀，手起刀落之下，那株小樹無聲倒下，橫切面是一個完美的隋圓形
我張大了口，楊兄能一刀劈開樹幹我毫不驚訝，驚訝在於他現在用的是無鋒的木劍，而那樹幹的橫切面跟以利器所切無異。
「成套劍法只有五式，呢個係第一式起手式。雖然劍法只有五式，但每一式嘅意思，並唔係限制於揮劍嘅角度步法，我只係以揮劍嘅動作作分類，呢一式係『劈』。」
他走到另一株小樹旁，突然出刀由上而下直直斬向樹幹，「喀喇」一聲，小樹從中一開為二直至根部。
「呢一式『劈』，講求嘅係速度，要出其不意，以快打慢，喺敵人仲未意識到發生咩事已經中劍。簡單啲講就係偷襲，一定要做到快、狠、準三點......」
接著他慢慢講解此招出劍的竅門，例如時間掌握、運勁、步法、內力輸出，還有一點最重要的，就是如何令敵人墜入出奇不意的陷阱。這個，據楊兄所說其實就是心理學。
「楊兄你連心理學都識? 以前讀過呀? 」
「唔駛一定要讀過嘅，當你同過唔同嘅人打過交道，你就漸漸可以自己摸出一套道理。」
老實說，我從沒想過打架還會涉及心理學，只以為誰拳頭硬就是誰贏。
接下來楊兄繼續教我其餘四式，包括是『挑』、『刺』、『纏』、『攔』，雖說整套劍法只有五招，但其實所謂招式根本只是一個總綱。每一式都是千變萬化，完全是以自己的經驗和臨場反應而決定，所以我的『劈』可以跟楊兄的『劈』不同，就算同是我出招，這一秒的『劈』也可以和下一秒的完全不同。
學這五式很容易，不用一個時辰就學完了，不過當中的技巧變化、實際應用等等就要靠實戰來鍛鍊。
剛學完這五式劍招，呀牛和小瑩也已回來了，只見呀牛抬著一只野豬回來，而小瑩則捧了一堆野果。
「楊大哥南兄！看這頭野豬多肥！夠我們吃一整天了！」
小瑩捧著野果過來，道﹕「南大哥，我知道你不吃豬肉，所以採了些野果給你。不過我看你應該要吃點肉，或者我讓哥哥再打一頭免子給你吧。」
我唔食豬肉? 我幾時? ......啊，我記得啦，係第一次見佢嗰陣......
「哦哦，唔緊要唔緊要，我而家覺得豬肉都幾好食吖。」當然係只限豬肉而非豬扒啦。
「哦，那就好。」
呀牛在處理野豬的同時，我們搭好了燒烤的營火，然後楊兄離開了一陣子。
一會兒後，他拿著一個比藍球大一點的，滿是泥巴的東西回來。
「楊兄，你呢舊乜嚟? 」我好奇的看著這個泥球。
「啊！這是......」小瑩看見泥球驚叫起來，樣子有點害怕。
呀牛也很驚恐道﹕「楊大哥快拿走這東西！這泥球裏面有一種很兇惡會飛的昆蟲，有劇毒的！」
楊兄笑道﹕「唔駛擔心，啲蜜蜂我趕走哂啦。」
噢！原來是蜂巢。
我笑道﹕「呵，連蜜糖都有，原來你係BBQ達人。」
呀牛和小瑩聽見蜜蜂都被趕走了馬上放下心來，小瑩問﹕「南大哥，咩係蜜糖呀? 」
咦? 他們竟然不知道蜂蜜? 難道從沒吃過?
「蜂蜜呀，你無食過? 」
小瑩搖搖頭，呀牛道﹕「我們知道這泥球裏面有一種很兇惡會飛的昆蟲，但因為這種昆蟲很兇惡又有劇毒，常人被刺一下都會被毒死，所以平時看見了都遠遠避開了。不要說採了牠們的巢，連看也不敢多看呢。」
楊兄點頭道﹕「唔知點解呢度啲蜜蜂超毒，所以佢哋未食過蜜糖一啲都唔奇。」
我﹕「哈！咁你哋要試吓啦，燒嘢食要加蜜糖先好食。」
他倆以期待的目光等待著。頃刻，串在樹枝上的一塊塊野豬肉已經烤得香氣四溢，油脂都滴到柴火上發出「吱吱」聲了。
「好，差唔多時候喇。」楊兄以風刃劈開了泥球，六角形的蜂窩馬上流出金黃色的液體。
楊兄用樹枝將蜜糖均勻的塗在野豬肉上，使豬肉看起來更加令人垂涎欲滴。
我拿了一塊，撕給呀牛和小瑩讓他們試試。
「嘩！好吃！」呀牛吃了一塊又一塊，滋味得連連舔手指頭。
小瑩也道﹕「嗯！真的很好吃！比普通的烤肉好吃多了！」
楊兄一邊撕著肉塊餵Lucy，一邊向呀牛和小瑩道﹕「一陣食完飯就教你哋兩個武功同五行術，跟住好似之前咁你哋同呀南試招，呢三日都會係咁鍛鍊，我要呀牛你都可以參加五行術大賽。」
呀牛聞言大喜﹕「真的嗎? 太好了！」
楊兄微笑道﹕「咁你就好好努力喇。」
吃飽過後，我獨自練習剛才學的五式劍招，Lucy則留下來指導我。而楊兄則帶了呀牛小瑩去指導他們武功和五行術。黃昏時份，我跟呀牛小瑩比武試招，不過主要是我和呀牛過招，小瑩只是在一旁用五行術擾亂我。然後，這三天假期就這樣過去了。
到了最後一晚，晚飯過後，呀牛和小瑩早早已經入睡，而我還是坐在客棧屋頂上乘涼。
「點呀? 仲未慣早瞓? 」是楊兄。
「哈！你知我呢啲夜鬼㗎啦，未到十二點都唔會瞓得著。」
「嗯...咁又係......」
閒來無事，我趁機向他討教了一些武學上的疑問，有劍法上的，有內功上的，有身法上的，因為這幾天跟呀牛比武時都覺得有點手忙腳亂，若果加插小瑩來擾亂我情況更甚。最後，他道﹕「其實你資質比呀牛好，學嘢快過佢，不過你啲基本功唔夠佢紮實，所以好多時你都會錯失咗致勝機會。有時候如果唔係你出埋魔法，我諗你輸比佢幾次添啦。所以你努力啲睇嗰本《絕世武功》啦，本嘢真係有用㗎，咪以為我老點你啦。」
我想起那本黃頁一樣的《絕世武功》就有點無奈，唯有道﹕「知道啦，我有時間就拎嚟自修啦......」我頓了頓，道﹕「係呢，下一次放假已經係過年喎，咁你呢段時間會去做啲咩呀? 」
「反正我都無咩做，諗住喺中州周圍行吓。嗯......或者我會去中仁城搵司徒秦，喺佢身上攞返上次比咗佢啲錢，嘿嘿，你知啦，我話咗會還返啲錢比人，點都要搵搵司徒秦還錢。」
哈，估唔到呢個大俠真係會還錢............咦? 既然佢去搵司徒秦......
「楊兄，你可唔可以幫我查吓點解司徒秦會捉走呀牛佢哋，佢究竟想喺呀牛同小瑩身上問啲咩呢? ......」
「好呀，都係順便啫。」他打了一個呵欠﹕「喂，咁我瞓先啦，聽朝見啦。」
楊兄走後，我盤起腿來修練內功，閉上了眼的我感受著內息在體內緩緩流動。
早前運功時總覺得內息運行到某些穴道時會感到阻滯，但經過楊兄指點後，我明白是我運氣的方法有點小錯誤，經他修正後現在內息在經脈裏緩緩運行不斷，雖然並非澎湃無比，而且流動的速度也很慢，但我也感到每完成一次循環，丹田的內息都會稍稍增加一點。
正當我處於物我兩忘的境地，我感到身後有些異樣。
我睜開眼，將幾顆水球射往身後的目標，目標一個跳起，落在我的身側，怒道﹕「仆街仔偷襲? 」
「幾粒水珠又點會偷襲到你呀，Lucy大小姐。」
Lucy「哼」了一聲，沒有再說甚麼，只是靜靜的伏在我身邊。
我瞅了Lucy一眼，懶洋洋道﹕「咩料呀? 有嘢就講有屁就放啦。」
她狠狠的瞪了我一眼，就別過頭去，但過了一會兒，她終於開口﹕「你...你見過Cherry姐姐......佢...佢而家係點呀? ......」
原來想打探軍情。
「哈！做咩? 想知己知彼，百戰百勝? 」
她走到我面前，人立而起伸出兩手的利爪，森然道﹕「你再講廢話呢，我就......」她的利爪在我褲襠前比畫著，嚇得我連忙道﹕「得！唔講廢話！你想知Cherry啲咩? 」
Lucy﹕「你之前話佢霸道、自大、惡、仲有eq低......咁你覺得我哋有無搵錯人? 」
「喂大佬我點知呀? 我之前又無見過佢......不過你咁講即係你覺得搵錯人? 咁我都覺得楊兄唔會鍾意啲咁惡嘅女人......」
我感到她兇狠的目光，白了她一眼﹕「你慳啲啦，唔係話你呀！」
她悶哼一聲，道﹕「我唔係話搵錯人，始終佢同Cherry姐姐一樣樣，可能...可能佢個靈魂未記得返之前嘅記憶啫......」
靈魂? Lucy講緊咩? 又話Cherry只係失憶?
「無嘢啦，你繼續查啦。」她說完就跳下屋頂跑掉了。
其實，楊兄同Lucy係點嚟呢個世界呢? 嗰個龍姑娘又係咪真係Cherry呢? ......
翌日一早，我們一起吃過早餐後又要告別了。
「呀南呀牛，廢話我就唔講啦，你哋自己努力啲練習啦。」
呀牛大聲回答﹕「知道了，楊大哥！」
楊兄送了我一把黑黝黝的日本刀﹕「專登去訂造比你，你攞嚟練劍啦。」
我大喜﹕「多謝哂！係咪神兵利器嚟㗎? 」我拿在手中掂了掂，只覺得輕飄飄的沒有重量。而黝黑的刀身帶有一絲暗啞的光澤，不知是用甚麽物料所製。
楊兄懶洋洋道﹕「唔駛咁興奮，普通木劍嚟咋。」
我聞言馬上露出一個囧樣，楊兄看見我的樣子，笑道﹕「唔駛咁嘅樣，把刀雖然係木造，但呢隻都唔係凡木，你如果將內力貫輸入去，個威力...嗯，應該同普通鐵劍差唔多啦。」
OK！唔該哂，Thank you very much！咁做乜唔直接訂把鐵造嘅比我呀！?
楊兄又向小瑩道﹕「小瑩，麻煩要你睇住呢兩隻嘢啦。」
小瑩忙道﹕「不不......那是我應該做的......」
「係喎楊兄，你幫我比啲嘢比Lucy。」我給了他一個瓷瓶﹕「呢個係白玉凝脂丸，我自己煉㗎，係用嚟......呃...你當係口服SKII啦，總之女人食咗會靚啲啦。」
站在楊兄肩膊的Lucy瞅了我一眼，然後跳到地面逕自離開了。
楊兄見Lucy獨自走了，忙道﹕「咁我代佢多謝你啦，我哋過年再見，拜。」然後追上Lucy去了。