[新手][校園] 當你中六果年先遇到教畜,最好嘅解決辦法就係‧‧‧‧‧‧: 37. 青蔥校園的最後一頁
Practice Paper對完卷之後兩個星期就係mock。不過,Mock 我哋都唔多care,因為學校個mock連出面公開考試個format都唔跟,啲卷唔係全份copy出版社啲exam practice,就係左抄一條question bank右抄一條past paper,有啲題目望到都真係得啖笑。班老師真係可以話係為出而出咁,完全冇諗過係出好啲份卷比我哋感受吓啲DSE考法。
考完mock對完卷,我哋都有差唔多三四日唔洗上堂,於是我哋就約埋出嚟,去搞farewell assembly嘅嘢。Farewell Assembly係last day果日,學校任由我哋班中六學生玩嘅一個週會。通常會玩下棟篤笑,播下片串勁班老師,亦都當係回味一下喱六年嘅生活。
中一果陣,見到成班大哥哥大姐姐係上面不停咁玩老師、又笑又喊,鍾意做咩都得,就會係度諗「呀,幾年後我都要好似佢哋咁型,係台上面講一大輪野吸引全場師兄妹。」。但係到咗依家,淨返兩三日,反而覺得唔想咁快到我。喱一次可能係我人生第一次係hall個台上講嘢,亦可能係最後一次。Last day之後,我唔會再有機會著住校服,戴住高Form果條色彩斑斕嘅校呔,踏上喱個寬大嘅講台。
我哋喱幾日都完全拋開晒我哋啲書、Past Paper、Notes,全情投入去喱次farewell assembly嘅preparation入面。我哋都好希望,留係學校禮堂嘅最後一個畫面會係最精彩、最完滿。
去到Last day前嘅一晚,我哋嘅離愁別緒都越嚟越強烈。我哋都係Facebook回味返六年發生過嘅件件大小事,回味大家一同走過嘅每一段路。
Sai Man Yeung
1 minute ago · Near Shaukeiwan
感謝你們出現在我的六年裡。
千萬年人和人遇過了。
「那些年,在204、605的日子」是人生最美好的歲月。
喱一晚,我係Facebook share咗Mr.首「遇到了」,簡單咁打咗喱幾句說話,作為我哋之間回憶嘅一個記認。我覺得,所有我哋之間嘅事唔需要赤裸裸咁係Facebook講晒出嚟,只要我哋記得就可以。
第二朝,我哋都一早返咗嚟,為我哋嘅Last Show綵排。雖然話就話有三堂要上,但係啲老師都隨得我哋想點就點。我哋唔係掛住寫thank you cards,就係背好一陣自己果part嘅稿。
「叮噹。叮擋。頂當。叮噹」「Guys,are you ready for the good show?」威廉一打咗鐘就企上自己張凳大聲嗌。
「Yeahhhhhhhhhhhhh!」37個同學,喱一下叫聲,為我哋完成咗中學最後一課而歡呼,為即將踏上屬於我哋嘅舞台而吶喊。
Assembly嘅開始係播放我哋每一班嘅Photo Slide Show。聽住Mr. 首遇到了,望住我哋係每年中秋party、Christmas Party唔同活動入面影過嘅大合照,每個畫面都係好似只係喱幾日發生咁,唔多唔少都會有啲眼濕濕。特別係望到最後一張,今年係Sports Day嘅大合照,我哋11個男仔搭全膊頭,面帶笑容咁企係女仔後面,喱個畫面真係特別珍貴。
「新聞報道,第一屆table-cal tennis比賽於東區正式展開,依家你哋睇到嘅係決賽,由日本代表吉村少夫對剛果代表Billysorian。」「Wow…….」「哈哈哈」打頭炮嘅係我哋男仔嘅搞笑部份,我哋將平時小息攞住部cal機拍兩張枱打乒乓波嘅埸面搬上大銀幕,比大家欣賞。壓軸我哋仲要疊高幾張枱整到成個擂台咁,叫比利同小夫企上張枱度打。其實我哋都係冒住比人屌嘅風險,播條片出嚟比大家睇,不過見到全場好似發現新大陸咁,就冇乜所謂喇。相信好多師弟妹未必記得我哋,但一定會記得我哋嘅table-cal tennis*。
Assembly完咗之後,我哋十一個都留咗係班房度玩。其實都好無聊下,上youtube播吓啲痴線歌,整個紙波出嚟亂踢,或者掛兩個紙箱當籃框咁射,總之就係唔捨得走。我坐咗係自己個位,環顧喱個坐咗半年嘅班房,盡力用我嘅眼睛記住喱度嘅一切。望到後面嘅璧報版,我定咗神咁望住上面嘅幾個數字。
![](http://holland.pk/uptow/i4/8a95bf51607580c7423034ab19396dc5.jpg)
因為我係坐最後,所以個DSE countdown都係由我每日返嚟換牌。最初喱個牌放上去係365,慢慢變二字頭、一字頭,到單位數。原來三百幾日咁快就過咗。我望望下,決定好自私咁拆咗塊牌落嚟,據為己有留個紀念。
「喂,夠鐘走喇!井sir話最多留到5點炸。」校工勝叔係我哋hyper緊果陣突然撞入嚟。
我哋執好晒嘢,行去黑板隔離熄晒所有燈,再行出走廊,慢慢掩埋房門。
再見,我的繽紛樂園!
___________________________________
*據聞係我哋條片面世之後,有一次某班因為落雨,出唔到playground上PE堂,跟住個PE老師叫學生搬啲考試枱出嚟,係禮堂打table-cal tennis。