[新手][校園] 當你中六果年先遇到教畜，最好嘅解決辦法就係‧‧‧‧‧‧: 35. 「你又嚟搞我？」之終章
門口堆滿晒人唔知係度搞乜野，淨係見到阿校工勝叔同傑叔不停咁叫啲人走，叫佢哋唔好係個學校門口圍住晒，阻住啲學生返學。不過，香港人就係咁，見有人圍埋去，驚蝕底點都會混入去睇吓，結果就越聚越多人。
我哋成班學生就企咗係學校門口外面，因為成班人塞住晒，根本都入唔到去。班Form 1仔仲係度大叫︰「今日係咪唔洗返學喇，咁搞法？！」班人塞到連啲老師車都停咗係路中心，入唔到學校。
勝叔見唔對路，就走出嚟搵我哋。勝叔一出校門，企係門前面班人就一湧而上，勝叔要夾硬迫先迫到出嚟。「喂，所有人跟住我行。」勝叔一聲號令，成班學生跟住佢一齊跑，好似成隊軍隊推灘登陸對面海咁，四十幾五十人直奔學校後門。
「呼呼呼……」畢竟大家都係尚在中層睡眠狀態，毫無熱身同預備下跑二三百米都幾係嘢。「喂，到底果班係咩人嚟咖！」「應該係示威者。」「我聽到佢哋話要搵咩校長出嚟喎。」班Form 1好似大鄉里出城咁，一啲大場面都未見過。我哋一返到入學校，就將個步速放慢返十零廿倍，慢慢上返去停課室。
行到上一樓果陣，係走廊已經聽到110室好熱鬧，嘈到拆天咁濟。
我︰「喂，你哋嘈乜鬼嘢呀？」我一入到停課室就問頭先笑到全層樓都聽到嘅威廉。
威廉︰「你過嚟睇吓先喇，有好嘢，包冇跣你！」威廉係咁揮手叫我快啲過去睇。
阿毛︰「你哋返嚟果陣有冇見到出面門口勁多人呀？痴線咖！」
阿風︰「你過嚟睇咪知發生咩事囉！」阿風指住威廉手上拎住嘅一份嘢。
威廉、河童︰「快啲喇！」
河童遞咗份嘢過嚟比我哋睇，份嘢成個大字標題寫住「教育界黑暗大揭秘 名校校長獨裁統治」，下面仲有個小標題寫住「老師化身網絡警察 體罰恐嚇招招勁辣」。「某一東區名校，學生疑因與校長對立，故此校長連同老師多番使出辣招迫害。校長的陰招層出不窮，包括無故要求學生重考，長時間停課，恐嚇學生將不會獲發DSE考生證等等。校長甚至聯同老師「夾口供」自編自導自演……」我捧住份報紙一直讀，覺得啲內容好似有啲奇怪。
我︰「喂，你整咖？！今晚放上聯盟開心些牙？」
威廉︰「傻的嗎，你自己睇清楚先喇？我邊會寫啲咁正經嘅嘢呀？」
我︰「哦？！」一頭霧水嘅我將份嘢拎轉去另一面。
我︰「你喱份嘢係假咖嗎？」我反轉之後見到寫住係生果日報，仲要係A1。我到喱一刻都覺得係威廉即出嚟嘅鬧劇。
小夫︰「你講真咖，你真係擲咗上去生果日報呀？」威廉點咗一點頭。
阿毛︰「咁姐係出面嘅係記者？」
比利︰「梗係喇，名校陰暗面喎，仲唔夠talking point呀？」
我︰「但係點解…點解？」我一時望吓份報紙，一時望吓威廉。喱一刻我都好疑惑。
威廉︰「其實係我搵記者，家長未必拆得掂咪搵學校剋星 — 傳媒囉。學校就最驚有醜聞或者搞上教育局。至於我唔出聲，係唔想我哋比人個感覺係壞學生。我要特登塑造出一個感覺，就係獨裁對天真，咁大眾仲會傾向buy我哋多啲。再加上生果個報導風格又可以幫我哋exaggerate。」
河童︰「都係你醒，我上年搵議員都搞咗一排，依家傳媒仲快捷迅速。」
「Wo！」聽到喱個咁完美嘅plan我哋都係度歡呼，同埋為威廉拍掌。
「嘭！」「你哋依家係度反我呀！」我哋係度慶祝嘅同時，盧毛入咗嚟，大大力一手拍落張老師枱度，碌大隻眼望住我哋。
「我哋如實匯報之嗎，好誠實嘅學生。」威廉喱一刻已經成為咗比較強勢果一方。
「你哋同我一齊落去交代，同我醒醒定定。」齋睇盧毛對眼就知佢想綁架再軟禁再殺埋我哋咁濟。
「Ok！」我哋呆咗咁望住威廉，明明大好形勢都收火。
「各位大家好，我係校長Mrs. Morena Lo。我想同大家交代一下今日係生果日報頭條所報導嘅事件嘅真確性。」我哋跟住盧毛落去學校閘門口度，配合佢做一場大龍鳳打發啲人。
「實情係咁嘅……」「你自己做過啲咩事，你自己最清楚 …… 你依家即刻同我係部電腦度開你個Facebook …... 喂，你咁姐係體罰姐？…… 係又點呀，咁多條罪？加加埋埋差唔多喇！……」係盧毛講嘢果陣，無段段有把同佢一模一樣嘅聲，仲有一把好似教畜嘅聲，同一時間係度講嘢。
我哋周圍望，睇吓邊個係度同盧毛玩疊聲。
喱個時候，我哋見到威廉，舉起咗一支白色好粗嘅筆，「你哋成日講果句咩球證旁證都係我嘅人，依家就比你試吓喱句說話嘅真正意思囉！……. 依家你哋咁樣，個Final Exam就唔洗考咖喇，冇考個Final Exam咁我連DSE準考證都唔洗比你 ……」。
「咔嚓……咔嚓」係喱個重要時候，啲相機即刻出晒嚟，好明顯出面果班就係各大媒體記者，等食喱粒花生等咗好耐。教畜同龜sir見到即刻想過去搶支錄音筆，我哋幾個即刻攔住佢，唔比佢掂到威廉。
「喂，你兩個做咩呀？」我哋指住教畜同龜sir大大聲咁講，去吸引記者嘅注意。
「大家都可以聽到喇，喱段錄音係我哋十個見Mrs. Lo果陣嘅對話。至於段錄音係真係假各位可以自行判斷。但係呢，啱啱兩位老師嘅反應已經講咗答案比大家知。大家如有需要進一步資料，歡迎聯絡。」喱一刻威廉真係同長毛一樣咁型。不得不讚，佢喱招引君入甕，迫到盧毛兩個豬一樣嘅隊友露出馬腳。
發表完「勝利宣言」之後，我哋就頭也不回咁行返上班房。