[新手][校園] 當你中六果年先遇到教畜，最好嘅解決辦法就係‧‧‧‧‧‧: 17. 拚死一戰(上)
「真陰公，第一場就俾人大炒。」個死教畜見我哋輸都不忘攞景贈興一番。
喱個moment，我哋真係膠都廢事比，都懶得睬佢，拿拿林入男更換衫返去上堂好過。入到更衣室，大家都好似唔係好敢出聲。我自己更加唔夠膽講野，因為3:0果球失波就係由於我大意輸角球，之後再睇漏人比人射入。
「喂，唔好死老豆咁。學副校長話踢波最緊要係開心。我哋踢OSC唔係為咗贏冠軍，而係想比啲顏色教畜睇。所以喱場只係熱身，下場先係戲肉。」威廉真係好有領隊風範。
「好！」我首先大聲嗌。 「打倒死教畜！」喱句嘢其實真係好老土同好文革feel。
「打倒死教畜！」一提到喱條仆街，大家啲火即係著返晒。
兩日之後，就係對教畜嘅日子。喱一場係lunch time踢，所以我哋係上午果啲基本人就係休養生息，儲足精神去迎戰。
「叮噹、丁擋、頂當、叮噹」lunch鐘響咗，我哋十條友即刻攞埋袋PE衫一支箭咁衝出咗班房。
「加油呀！」「踢好啲呀！」「要嬴波呀！」係我哋衝出班房嘅同時，其他同學都幫我哋壯一壯聲色先。話晒我哋都用6D班嘅名義出賽，所以成班同學都希望我哋可以踢得好。其實有時諗番，334嘅唯一好處，就係成班人可以一齊相處成兩年半，大家已經慢慢由同學變咗兄弟姊妹，互相support大家。
我哋一換完衫出嚟，就已經見到班女同學霸佔咗最正中果個stand，一個二個係度食住高脂肪低營養嘅麥當勞。見到喱個場面，作為男人都咪話唔滾動。正所謂︰「成功嘅男人背後一定有班支持佢嘅女人。」
由於今場係生死大戰，我哋絕對唔可以好似上場咁兒戲，所以要夫添上陣。出場陣容排左個3-2-1。
GK︰阿風
DF︰河童、比利、聰哥
MF︰阿毛、Kevin
CF︰阿夫
DF︰河童、比利、聰哥
MF︰阿毛、Kevin
CF︰阿夫
後備︰我
領隊︰威廉、力仔
場務(姐係服侍班女仔)︰大口仔