《只有一棵樹的森林》: 第三十八章

放學的時候，正當我準備收拾物品去圖書館時，
「呀駿，不如我地今日休息一日囉？」
「下？你無事嗎？係咪唔舒服呀？」
「唔係呀，我無事，不過呢，我想抖下」
「點解呀？」
「啱啱考完試，吊頸都要抖氣，同埋…」
「同埋咩呀？」
「我想…」
「？？？」
「同你拍拖呀！」方晴的臉紅得像搽了胭脂一樣。




「咁…你想去邊呀？」
「我想食雪糕！」
「雪糕？Err…有喇！」
.
商場旁有一間阿波羅，但由於平時太少人光顧，所以差點忘掉了。
我們找到雪糕店後，方晴便左挑右選，看了很久還未決定到想食的味道，還想得眉頭深鎖。
「其實…係咪啲雪糕唔啱口味？我知你一定食開高檔貨，未必啱呢啲平民野…」「咩呀？！！唔係呀，係我太耐冇食雪糕，隻隻味都想食呀」
「下，原來係咁，咁我揀喇」
.
最後我點了朱古力和咖啡雪糕各一球。




「點解你會揀呢兩隻味嘅？」方晴問。
「朱古力甜，咖啡苦，一啖甜，一啖苦，正如人生咁，高高低低。有人會係先甜後苦，亦有人選擇先苦後甜」
「咁你呢？你揀邊樣？」
「先苦後甜，至少我知道，喺我努力辛苦過後，最後我係會得到回報」
「嗯～」
「做咩呆左咁望住我！」
「我覺得我男朋友好型呀！」
「呢個唔係不嬲架咩？？」
「你呀！得寸進尺」
「好喇好喇，擘大個口，呀…」




「唔～好味！到我到我，呀…」
「唔～好甜！」
「下，呢隻咖啡黎架喎」
「好甜呀！你喂嘅咩都係甜！」
「口花花！」
難得的約會就在我們你一口我一口中渡過，然後再送她回家。
.
對於今次的成績，我一直都不敢跟媽媽說。
我想等所有成績確定後，再出了成績表，才跟她講。 我深怕如果現在跟她說，假若有什麼意外，我不想再讓她空歡喜一場。
.
好不容易才捱到星期一，除了要面對媽媽的提問外，還要忍受沒有方晴在身旁的六日…
古說：一日不見如隔三秋，我足足等了六個秋天啊！！
以前的時候，多麼渴望星期五的到來，然後迎接六日的狂歡；現在的我，星期五鐘聲響起會感到有點失落…到了星期一，卻變得活力十足！
.
「好，各位同學，宜家就要派測驗成績表，有冇邊位同學想第一個攞？」




「我！」我飛快地舉手
「司徒同學，第一個睇唔緊要，但要放上投影器俾全班一齊睇喎」
「冇問題！」我爽快地答應。
「好！」
老師就把我的成績表放在投影機上。
.
「嘩！！」全班都嘩聲四起。
「大家靜啲！朱老師叫道。
「嘩！呀駿你食左藥呀？」杜杜驚訝地問。
「你就食藥！」
大部份分數我都知道，我最着緊的，是平均分。
「呀駿，你得咗喇！」
「嗯！」
「司徒駿同學，仲唔出嚟拎成績表？」
「係！」




.
因為數學科的突飛猛進，加上中英文科都合格， 縱使理科三寶全都不合格，平均分仍能拉至合格，完成今次的目標！
.
「男班長你今次嘅進步大家都有目共睹，希望大家都會好好以佢為榜樣，效法佢永不認輸嘅努力同鬥心！」
.
榜樣…這真的是我多年來第一次被稱之為榜樣！
那種感覺，真的是…爽！！


Facebook：微言
Instagram：smallpotatosay
一至六每晚7點，重溫當年走過青蔥的歲月
Facebook, Instagram, 紙言, 高登共同發佈