《只有一棵樹的森林》: 第八章

「呼，終於考完試喇，終於可以想做咩就做咩，呀駿，打波囉」
「哦…好…」
「做咩死下死下咁呀？」
「冇，擔心緊test 啲成績姐」
「超，有乜好擔心」
「你梗係唔擔心喇，你就真係去考『天才』波」
「唉，都考完喇，依家先來驚都無用，放眼未來好過」
「唉…」
「嚟呀，我哋好耐無1 on 1」
.




你攻我守，球來球往，很快我們就濕透了。
「呼…呼…呼…嘩，點解你呢排好似勁左咁嘅？體能又強左」
「係咩？呢排我做緊特訓嘛」
「特訓？」
「係呀，我師傅聽到我話要變強就出手喇」
「咁練咩？」
「秘密！」
「挑！」
「不過師傅話個特訓要持續三個月先有效」
「三個月？！！！咁咪啱啱撞正班籃？」




「班籃？」
「係呀，聽Frankie話今年中三同中四都會搞班籃，就係一月考試之後」
「咁我哋兩個咪又可以同隊！」
「係呀，打波啦講！」
.
「媽，我返嚟喇」
「返嚟啦，喂，你又打波呀，成身臭味，快啲去換件衫」
「係嘅，母親大人！」
「係喎衰仔，考試考成點呀？」
「Er….」




「即係又衰咗啦，你個衰仔俾啲心機喇，已經留過一次班喇，係咪想再留多次呀？！！」
.
＂下次下次，下次大概可以…＂
.
其實，有誰會想成績差？有誰會渴望留班？
其實，有誰知道，當初我被告知要留班後，曾忍不住夜裏在房間留了幾滴眼淚；又有誰會知道，外表嘻嘻哈哈的我，其實心裏是多麼的抑鬱， 強行用笑容把壓力頂住。
.
我真的不是讀書的材料, 每次溫書我都會頂不順睡着了，但這不代表我沒有努力，只是我的努力不足以獲得回報。
.
「好喇，我哋今日就會派測驗成績表，大家記得攞返去比家長簽名。宜家聽到名既就行出嚟，鍾世傑」
「唉…死喇…死喇…」
「呀駿你係度喃嘸啲咩啊？」
「我真係好緊張…」
.
「司徒駿！」




「係！」
「下次要俾啲心機呀」
「係…」
.
驟眼一看除了英文和經濟合格，其他科全部都是括號，三科理科更是慘淡收場。
唉，都不知如何向媽媽交代。
.
「方晴！」
「係」
「大家要俾啲掌聲方晴同學，方同學今次考得全級第一名，為我哋班爭光。大家都要好好向方晴同學學習。」
啪啪啪啪啪啪…
.
唉，人家就全級第一，我也全班第一，不過是倒數的。這樣的距離…
.
「司徒駿同學，麻煩你等陣落嚟教員室搵我」




「係」
.
教員室外
「朱志宏老師有請」
「司徒同學」
「老師你有咩想鬧就即管出聲喇」
「點解你會覺得我想鬧你？」
「下？」
「因為上年畀人鬧得多？」
「唔…」
「上年你既事，我都略知一二，老師叫你嚟，唔係想鬧你。老師只係想知道出咗咩問題，老師可以點幫你。」
.
於是，我就把我溫書的情形全告訴予朱老師。
.
「原來以此，老師明白喇，老師想問你，你係咪好鍾意打籃球？」




「老師你又知？」
「係定唔係？」
「係！」
「點解？」
「因為鍾意」
「咁你有無為自己訂立一啲目標？」
「目標？」
「無錯就係目標，你之所以會不斷打籃球就因為你想進步，打得更好就係你嘅目標。所以，你都要為讀書定一啲目標，令自己有奮鬥心。」
「我明喇老師！多謝你呀！下次我一定唔會令你失望！」
「我都希望你可以成為大家嘅榜樣」
.
Facebook：微言
Instagram：smallpotatosay
一至六每晚7點，重溫當年走過青蔥的歲月
Facebook, Instagram, 紙言, 高登共同發佈