We love but we can't (沒有發生的愛情): 第八集

第八集

（回到中二）

2010年9月13日 (MON)

（英文堂）

“第一行第二個點唔點呀？佢係肌肉蘇，好大隻架！”
“衰在冇樣呢？唔通一世只係賣身材咩？”




“咁第六行最尾個個mango呢，人地排球王子黎架！”
“太瘦啦！營養不良！好似d非洲飢民咁～”
“呢樣唔好個樣唔好。。。咁第三行最前個個呢？拉大提琴好點架！”
“你講Gordon?睇落去就好似好nice,但好串架佢，睇唔起一d低分過佢嘅人！”
“Oh My God!佢係咁嘅人黎架！？”
“小學個陣已經識啦！唉～Form one已經冇靚仔睇，到Form two又係咁。。。得啦可以努力讀書～”

“Tina姐，你嘈住我上堂呀，收埋你把死人聲啦唔該！”
突然傳黎嘅呢把聲，就係坐喺Snowy同Tina後面嘅係阿Nick, 中文名係。。。費卓然～





N:成堂就係聽你嘈嘈嘈！唔怪得你成績差過我啦！
T:收皮啦廢雀撚！你好好咩？做lab個陣攞住杯chemical同人地cheers!仲有呀！Snowy都有份傾計啦！你又唔話佢！
S:嘩姐姐！你依家拉我落水呀？仲話咩好姊妹！
N:但我只係聽到你把聲咋！呀係呀snowy，我係你我唔會咁委屈自己要同佢一齊做姊妹。

"Nick, Tina and Snowy, can you all shut up? So annoying!"
就係咁，若唔係英文老師出手，佢地又唔知鬧交鬧到幾時～

（小息）





“哎喲Snowy，做咩搞到俾人鬧呀！哈哈～”
“你收聲好唔好呀Gordon！你小學個陣咪成日比老師叫你罰抄！”
“我又點同呢？你之前講過咩我係d咩堆填區偷走出黎嘅廢物，但你唔同喎！你話你自己係鳳凰黎架嘛！你咁樣。。。”
“我邊有咁講過你呀！”
“你冇？唉算啦！咁又係嘅，好高尚架嘛，鬧完人就係唔記得。。。”
“你嘈完咩者依家，我比人鬧你好開心係咪呀？我上到中學第一次咁人十比人鬧呀！冇面啦！你好開心啦！”
“。。。Sorry啦！今日放唔放學呀？”
“放手啦色魔！同你好熟呀！捉住人地對手。。。放唔放學睇心情啦！”

（體育堂）

“個個正一死八婆黎嘅！我傾計都要理！鬼唔恨佢第二日俾人抄！”
“個個費卓然正一廢雀撚黎嘅！我傾計都要理！鬼唔恨佢返企俾阿爸打！”

懷仁書院係男校女生，所以每一班嘅女仔就只有大約五個，但反而因為咁，佢地更容易成為好姊妹。除咗Snowy同埋candy佢地，tina亦都係Snowy其中一個閨密。而一到體育堂，就係女生所講嘅吹水堂，亦都可以話係“睇肉堂”～





T:哎呀！呀呀呀！Snowy我唔得啦！肌肉蘇真係好型呀！見唔見到佢啱啱跳起入樽個吓？”
S:咁打籃球會入樽好正常者係咪？反而係個個Mango囉！咁容易被人搶咗個波，佢以為自己仲打緊排球呀？
T:喂！輪到Gordon啦！佢打籃球又有板有眼喎～
S:睇過。。。吓！佢都入到籃呀？
G:Snowy！你都過黎打啦！你唔係驚呀？我都入到樽囉！你冇理由唔得呀？
S:我有咩唔敢呀！就等本宮落場收拾你！
T:一個女仔點同成班男仔打呀？
S:你都黎打啦！咁多嗲！
T:痴線啦！我唔想死喺個籃球場度。。。

“Snowy你咁樣犯規架！係要一度拍住個波一度走架！唔係攬住個波架！”
“Snowy你唔可以推人架！”
“Snowy接啦。。。唉。。。”
落場唔夠五分鐘，Snowy唔係犯規就係接唔到個波，若果佢唔係女仔，成班男仔一定。。。唉。。。





G:黎啦Snowy！搶啦！你唔係好想搶我個波架咩？
S:我搶到嘅你同我一陣祼跑！
G:搶到先算啦！Tom！接波！
S:我就唔信搶唔到。。。呀Shit！好痛呀！
G:人地就用手接波者。。。你用面黎接嘅。。。hahaha...
S:頂！好痛呀你仲笑！你特登嘅！
G:自己接唔到就賴人。。。
S:有冇毀容呀？
G:嗱！眼鏡好在冇爛到。。。但係。。。你塊面嘅右邊就。。。
S:吓！我以後點見人呀？我仲點搵仔呀？我冇人要唯你是問呀！
G:你冇人要咪我要囉！

就係Gordon呢一句，令到本來發緊脾氣嘅Snowy收聲，唔只佢，就連在場嘅所有人都估唔到Gordon會講出呢句。Snowy個心跳突然加快，個一刻，佢解釋唔到點解個心跳會加快。。。或者咁講。。。佢未清楚自己原來鍾意咗Gordon...





G:塊面擦損咋。。。點會毀容呀？怕咗你啦！同你去office啦！

Snowy唔知道Gordon究竟係認真定講笑，佢好知道個原因。。。但係佢似終都冇問到。。。個一刻，佢只係想心唔好跳得咁快。。。