【劇情甜】港佬狂想曲: 第三章：神秘租客篇(4)

八、秘密揭盅(1)

（前文提要：新搬黎既租客神神秘秘咁……不過雞雄就好好彩識到其中一個靚女，仲一齊拍拖去食早餐添……）

　　雞雄同Carol一路都有講有笑，不過一返到樓下，Carol即刻收哂聲，仲有少少唔好意思咁同雞雄話：「阿雄哥，Jacky佢唔係好鍾意我同人傾計架，一陣上到去你記住扮唔識得我喎。」
　　
「哦……」雞雄雖然覺得有ＤＤ可疑，不過靚女叫到，當然冇話唔得啦！
　　
入到屋，Carol敲下房門，裡面即刻開門……果條仔半開住度門，仲怒啤左雞雄一眼，跟手一手扯左Carol返入房。臨閂門果下，雞雄仲隱約聽到佢細細聲同Carol唔知講乜野……
　　




雖然只係望左一眼，不過雞雄已經睇到果條仔生得非常靚仔，眼大大、鼻高高、唇紅齒白、青靚白淨咁，仲幾乎靚過Ｄ女仔添。難怪……唉！雞雄當堂自卑起上黎……
　　
雞雄返到茶餐廳，忙完早餐之後，趁住未到午市最繁忙時段之前既空閒抖返啖氣。佢見個肥老闆坐晌收銀處嘆緊報紙，就走埋去八卦兩句：「喂，老細，乜睇得咁入神呀？今日有乜大新聞咩？」
　　
「冇喎！又冇高空擲物，又冇死人塌樓；咪又係班『尊貴』既議員晌度鬧下梁特狗咁囉……」肥老闆放低份報紙：「仲有再追下陳大富個女懷疑畀人標左參單野囉！」
　　
「下！乜單野仲有下文咩？陳大富唔係已經否認左喇咩？」雞雄隱約記得先幾日睇新聞睇過。
　　
肥老闆就話：「哦！係呀！不過今日生果報又爆料，話陳大富個女一直都冇蒲頭，懷疑佢根本未贖返出黎喎！」
　　




「車！生果報都信得過既！」雞雄嗤之以鼻咁笑。
　　
「咁又係……」肥老闆都同意：「不過今次佢摷埋張相出黎喎，你睇下，條女原來都幾『試正』架喎。」
　　
「係？咁就要見識下喇！」雞雄一手拎左張報紙過黎，見到上面登左張學校映果Ｄ全班大合照出黎，仲有個放大左既紅圈圈住其中一個女仔添。
　　
「普通料，一般般啦……」雞雄一面彈一面望左兩眼，張相其實都幾矇，不過勉強都睇得出個女仔既輪廓生得幾靚……
　　
「車！咁高要求？夠薑就去溝件返黎畀我睇下丫？」肥老闆一句窒過去，一手想搶返份報紙。但係雞雄冇放手，仍然眼定定咁望實張相。
　　




「你做乜呀？Short左牙？」肥老闆大聲笑佢：「你咪話畀我聽你識得佢呀！」
　　
「唔……唔係……」雞雄回一回神，口窒窒咁。
　
　……佢唔係識得陳大富個女，不過佢認得企晌佢側邊果個！
　　
……果個，竟然係Carol！

-------------------------------------

　　果晚返到屋企，雞雄一直留意往頭房果邊既情況，一見到Carol出黎去廁所，佢即刻企定晌走廊等佢。
　　
Carol去完廁所出黎，一開門就見到雞雄企晌出面，就笑笑口咁同佢打招呼：「雄哥，咁岩既，你又去廁所牙？」
　　
「唔係！妳跟我黎，我有Ｄ野要同妳講……」趁住包租公同光頭伯去左晨運未返，雞雄神神秘秘咁拉左Carol去後門度，湊埋去細細聲同佢講：「妳唔駛再呃我喇，我已經知道哂妳地Ｄ野！」




　　
Carol即刻面青，有少少口震咁話：「你亂講Ｄ乜野呀？」
　　
「仲想呃我？」雞雄咄咄逼人咁再貼埋Ｄ：「陳大富個女單野係咪妳地做既？哼！估唔到妳好眉好貌，好既唔學，竟然學人去標參勒索？」
　　
Carol既面口當堂由青變白，仲衝口而出咁話：「你……你點知架！」
　　
雞雄大獲全勝，都唔記得左扮好人，連面目都有少少猙獰起上黎：「妳咪理！哼！我而家就走去報警！」隻手已經摸緊個手機……果陣晌佢心入面都十五十六，諗緊唔知有冇花紅呢？
　　
「唔……唔好呀！阿雄哥，件事唔係好似你諗咁樣架！」Carol已經驚到喊左出黎。
　　
一見到靚女流馬尿，雞雄當堂成個軟哂。
　　
「妳……妳咪喊住先……」雞雄越講，Carol就越喊……
　　




「好！好！我唔報警住，妳慢慢講啦……」雞雄一面一講一面順勢攬住左Carol，由佢僕晌佢心口度喊。
　　
「嗚……嗚……」Carol好似忍左好耐咁，一喊開就停唔到口。

(如果今日本人Facebook Page 達五十讚將加更兩篇) (各位支持下我個Facebook Page la
http://www.facebook.com/%E6%B7%AB%E8%A4%BB-445645792298358 )

待續……